Aminado ang Malacañang na pinagkakasya lang ng pamahalaan ang budget para matulungan ang mga sektor na apektado ng mataas na presyo ng langis.
Ayon kay Palace Press Officer Claire Castro, limitado ang budget ng gobyerno kaya inuuna munang tulungan ang mga mahihirap at mga sektor na pinaka-apektado ng krisis sa gitnang silangan.
Gayunman, iginiit ni Castro na nakikinabang din ang middle class sa mga hakbang ng pamahalaan, tulad ng subsidiya sa transportasyon upang hindi muna tumaas ang pasahe at libreng toll sa mga delivery truck para mapigilan ang pagmahal ng mga bilihin.
Una nang inanunsyo ni Pangulong Ferdinand Marcos Junior ang panibagong ayuda para sa mahihirap na pamilya at low-income families kasunod ng muling pagsirit ng presyo ng langis. | mula sa panulat ni Jordan Gutierrez
