Higit pang pinalawak ng Globe Telecom ang network infrastructure nito at pinag-aralan ang paggamit ng satellite direct-to-cell technology upang mapahusay ang mobile connectivity.
Batay sa pinakahuling pagsusuri ng National Telecommunications Commission (NTC), nakapagtala ang kompanya ng 99.41% SMS success rate sa Metro Manila. Sinasabing sa quality-of-service tests ng NTC, pinakamataas ang average SMS success ratio ng Globe laban sa tatlong mobile operator sa bansa. Ito rin ang nag-iisang provider na nakapasa sa itinakdang pamantayan ng regulator na higit sa 99%. Nakuha ng telco ang average call drop ratio na 0.74%, mas mababa sa 2% na limitasyon ng NTC, at peak mobile download speed na 381 megabits per second (Mbps).
Sa kabuuan, 113 sa 142 test campaign ng tatlong operator ang nakapagtala ng mobile broadband speed na lagpas sa 50 Mbps. Ayon sa NTC, lubos na kasiya-siya ang performance ng mobile broadband sa karamihan ng mga lugar na kanilang sinuri. Binanggit naman ng Globe na patuloy nitong pinatitibay ang network sa pamamagitan ng mga naka-target na infrastructure upgrade, mas mabilis na pagtatayo ng mga network site, at pagpapalawak ng coverage sa mga komunidad na kulang sa serbisyo.
Kabilang sa mga hakbang nito ang paggamit ng satellite direct-to-cell technology upang mapalawak ang koneksiyon sa mga lugar na hindi naaabot ng tradisyonal na mobile network. “These results demonstrate the strength of Globe’s network in delivering the essential services Filipinos rely on every day, from making calls and sending messages to accessing mobile data,” sabi ni Globe General Counsel Atty. Froilan Castelo. “We welcome the NTC’s continued monitoring as it provides an important measure of service quality and helps us identify where further improvements are needed,” dagdag pa niya.
Bukod dito, nagpakita rin ng pagbuti sa performance ng network ng Globe ang hiwalay na monitoring ng Department of Information and Communications Technology (DICT). Nabatid na sa ilalim ng nationwide Oplan Bantay Signal initiative ng ahensiya, tumaas ang overall performance score ng Globe mula 77.2 noong Enero tungong 82.6 noong Setyembre. Sumampa rin sa 41% ang average download speed nito, mula 36.5 Mbps tungong 51.53 Mbps.
Samantala, sa Telco Report Card ng DICT, hawak ng Globe ang 44.76% ng mobile market noong Setyembre ngunit 6.1% lamang ng mga reklamo tungkol sa disconnection ang naitala rito. Bumaba nang 64% ang mga naturang reklamo kumpara sa antas noong Enero.
Pahayag ng telco, nakatuon ang mga pamumuhunan nito sa mga lugar kung saan mas maraming Pilipino ang makikinabang sa dagdag na imprastraktura, lalo na sa mga komunidad na limitado ang access sa maaasahan at epektibong mobile connectivity.
