NEWS

Arestado ang isang Grade 12 student ng San Felipe Integrated School sa Llanera, Nueva Ecija matapos umano itong mag-post ng bomb threat sa kaniyang Facebook account noong umaga ng Hulyo 27, 2026.

Kasalukuyang nakapiit ang estudyante sa Llanera Police Station at nahaharap sa kasong paglabag sa Presidential Decree No. 1727 o Malicious Dissemination of False Information kaugnay ng Republic Act No. 10175, o ang Cybercrime Prevention Act of 2012.

Sa imbestigasyon, inamin ng estudyante na biro lamang ang naturang post at ginawa niya ito sa layuning makansela ang klase.

Ayon kay PCOL Ritchie R. Claravall, Provincial Director ng Nueva Ecija Police Provincial Office, agad namang umaksyon ang Llanera Municipal Police Station  matapos makatanggap ng ulat hinggil sa social media post na may kaugnayan sa umano’y banta ng pagpapasabog upang masiguro ang kaligtasan.  | mula sa panulat ni LJ Torrefiel

Pinaiimbestigahan na sa Department of Education ang viral video kung saan makikitang binubugbog ng mga estudyante ang isang guro sa Maco, Davao De Oro.

Ayon sa Alliance of Concerned Teachers, ipinapakita ng insidente ang kawalan ng proteksyon para sa mga guro at ang kakulangan ng kapangyarihan na magpatupad ng disiplina sa mga paaralan.

Batay sa ulat ng PNP, pinagsasabihan lamang ng lalaking guro ang isang mag-aaral dahil sa pagsusuot ng earrings.

Nagalit naman ang kapatid ng estudyante na isa ring mag-aaral sa naturang eskwelahan at pinagtulungan nila ang guro.

Sa ngayon, isinailalim na sa kustodiya ng Local Social Welfare Office ang mga menor de edad.  l mula sa panulat ni Reianne Antiquina

Ibinasura ng Sandiganbayan Fifth Division ang mosyon ni Senador Jinggoy Estrada na humihiling na itakda ang halaga ng piyansa sa kanyang kasong plunder kaugnay sa flood control scandal.

Sa resolusyon na may petsang Hulyo a-bente kwatro, inihayag ng korte na napaaga ang mosyon at wala itong sapat na batayang ligal.

Ayon sa Sandiganbayan, isang kasong may kaparusahang reclusion perpetua ang plunder kaya hindi otomatikong karapatan ang piyansa.

Binigyang-diin ng korte na hindi nito maaaring itakda ang halaga ng piyansa hangga’t hindi naghahain si Senador Estrada ng pormal na aplikasyon para sa garantiya, at hindi natatapos ang kinakailangang pagdinig para matukoy kung mahina ang ebidensya ng prosekusyon.   l mula sa panulat ni Jordan Gutierrez

Nagbitiw na sa puwesto si Atty. Rudolf Philip Jurado bilang Chief of Staff ni Senador Robin Padilla.

Sa isang nilagdaang pahayag, sinabi ni Jurado na isinumite niya ang kanyang resignation noong June 22, 2026, bago pa magsimula ang impeachment trial .

Ayon kay Jurado, tinanggap ni Senador Padilla ang kanyang pagbibitiw at magiging epektibo sa July 31, 2026.

Wala naman siyang ibinigay na dahilan sa kanyang pag-alis sa puwesto.   l mula sa panulat ni Jordan Gutierrez

Kinumpirma ni dating Senador Antonio “Sonny” Trillanes IV na inirekomenda na ng Department of Justice ang pagsasampa ng mga kasong cyberlibel at perjury laban kay Atty. Levito Baligod at sa labing walong dating bodyguards ni dating Congressman Zaldy Co.

Ayon kay Trillanes, inilabas na ng DOJ Ang apatnapu’t isang-pahinang resolusyon kaugnay ng mga reklamong kanyang isinampa, habang may patung-patong pa anyang complaints na inihahanda laban sa mga naturang personalidad.

Nauna nang kinumpirma ng Department of Justice na sampung kaso ang isasampa laban sa maleta boys at kay Atty. Baligod, kabilang ang anim na bilang ng cyberlibel at apat na bilang ng perjury.

Samantala, inihayag ni Atty. Baligod na maghahain siya ng motion for reconsideration, kasabay ng paggigiit na nagkamali ang mga piskal ng DOJ sa pagsasampa ng kasong cyberlibel dahil wala anyang patunay na siya o ang kanyang mga kliyente ang nag-post sa social media ng pinagsamang affidavit ng 18 maleta boys.

Nag-ugat ang kanilang mga kaso sa serye ng mga press conference at mga post sa facebook na nag-aakusa sa ilang matataas na opisyal ng pamahalaan ng umano’y kickback sa mga flood control projects.   l mula sa panulat ni Jordan Gutierrez

Hiniling ni Senador Rodante Marcoleta sa kanyang mga kasamahan sa Senado na humanap ng paraan upang makalahok sila ng kapwa-detainee na si Senador Jinggoy Estrada sa impeachment trial ni Vice President Sara Duterte.

Ayon kay Senador Marcoleta, naghain na siya ng manifestation sa senado upang ipaliwanag ang ligal na batayan ng kanyang kahilingan.

Iginiit ng senador na hindi nawawala ang kanyang mandato bilang isa sa 24 senators na magpapasya kung mapapawalang-sala o mahahatulan ang bise presidente sa kabila ng kanyang pagkakakulong dahil sa kasong plunder.

Nauna nang inihayag ni Senate Impeachment Court Presiding Officer Francis Escudero na bukas siyang ikonsidera ang kahilingan ni Senador Marcoleta hangga’t hindi ito nasususpinde sa puwesto.

Samantala, inatasan ng sandiganbayan si Senador Marcoleta na magpaliwanag kung bakit hindi siya dapat isailalim sa preventive suspension alinsunod sa Anti-Plunder Act, habang nauna nang ibinasura ng fifth division ang kahilingan ni Senador Estrada na makalahok sa impeachment trial. l mula sa panulat ni Jordan Gutierrez

Nanindigan si dating House Speaker Martin Romualdez na sa kanyang panunungkulan bilang lingkod-bayan hindi siya kailanman humingi ng espesyal na pagtrato.

Kasunod ito ng pahayag ng kanyang pinsan na si Pangulong Ferdinand Marcos Junior na nalalapit na ang pagsasampa ng kaso laban sa kanya kaugnay sa flood control scam.

Ayon kay Congressman Romualdez, bagaman masakit para sa kanilang pamilya ang pahayag ng pangulo, iginagalang niya ito at handa siyang dumaan sa tamang proseso.

Muli namang nanindigan ang kongresista na wala siyang nilabag na batas at handa rin siyang patutunayan ang kanyang pagiging inosente. Trust at performance ratings nina Pangulong Marcos at VP Sara, bumagsak sa ikalawang quarter ng 2026

Parehong bumulusok ang trust at performance ratings nina Pangulong Ferdinand Marcos Junior at Vice President Sara Duterte sa ikalawang quarter ng 2026.

Batay sa survey ng octa research, bumagsak ng 5 percent sa 49 percent ang trust ratings ni Pangulong Marcos habang bumaba rin ng 8 percent sa 47 percent ang kanyang performance rating.

Samantala, sumadsad din ng 8 percent ang trust rating ni VP Sara habang 5 percent naman ang binagsak ng kanyang performance rating sa 45 percent.

Bunsod nito, bahagyang naungusan ni Pangulong Marcos si Vice President Duterte.

Isinagawa ang nasabing survey sa pamamagitan ng face-to-face interview sa 1,200 na Pilipino sa buong bansa mula July 4 hanggang July 11.  | mula sa panulat ni Reianne Antiquina

Kinumpirma ng Philippine National Police na naging “generally peaceful” ang pagdaraos ng ikalimang State of the Nation Address ni Pangulong Ferdinand Marcos Junior kahapon.

Sa kabila ito ng mga natagpuang improvised explosive devices sa labas ng opisina ng Department of Justice at Senado, gayundin ang pagkakaaresto sa limampu’t-isang indibidwal sa kilos-protesta sa Quezon City.

Ayon kay PNP Chief General Jose Melencio Nartatez Junior, nagsimula at nagtapos nang mapayapa ang okasyon at wala silang naitalang untoward incident.

Dagdag pa ni National Capital Region Police Office, Major General Anthony Aberin, bagaman may mga inaresto sa protesta, naging maayos naman ang kanilang operasyon sa kahabaan ng Commonwealth Avenue.  | mula sa panulat ni Reianne Antiquina