DWIZ 882

Tiniyak ng Food and Drug Administration (FDA) na epektibo ang mga COVID-19 vaccines laban sa banta ng mga bagong variant partikular na ang Delta variant.

Iginiit ni FDA Director-General Eric Domingo na sa kabila ng mas mababang efficacy rate, gumagana pa rin ang mga bakuna at nakapagbibigay ng proteksyon laban sa mga bagong variant ng coronavirus.

Inihalimbawa ni Domingo, ang Pfizer vaccine na mayroong 88% lamang na bisa laban sa Delta variant kumpara sa nakuhang 93% na efficacy rate sa Alpha variant o UK variant.

Habang ang astrazeneca naman ay 60% na mabisa laban sa Delta variant, kumpara sa 66% laban sa Alpha mutation.

Sinabi pa ni Domingo na pinag-aaralan pa sa ngayon ang bisa ng Sinovac, Sputnik V, Sinopharm, Janssen, at Moderna laban sa Delta variant. —sa panulat ni Hyacinth Ludivico

Nasa 1,500 public utility vehicle (PUV) drivers at delivery riders ang nabakunahan kontra COVID-19 sa Maynila kapalit ang P500.00 fuel card.

Ayon sa Office of the Vice President (OVP), nangyari ito sa unang araw ng proyektong vaccine express kung saan katuwang nila ang lokal na pamahalaan ng maynila.

Ang drive-thru COVID-19 vaccination services para sa mga tricycle, pedicab at delivery services drivers ay hanggang ngayong araw na lamang.

Nakipagtulungan ang OVP sa Seaoil Philippines at Shell Philippines para sa limang daang pisong gas cards.

Ayon kay Vice President Leni Robredo, magpapatuloy ang vaccine express project sa Maynila kung saan ang mga market vendors naman ang magiging benepisyaryo nito. —sa panulat ni Hyacinth Ludivico

Inihayag ni Senador Kiko Pangilinan na hindi sagot o solusyon sa problema ang banta ni Pangulong Rodrigo Duterte na ipapaaresto ang mga tatangging magpabakuna laban sa COVID-19.

Giit ng senador, dapat na pagtuunan ng gobyerno ang science based at malawakang information dessimination ukol sa kahalagahan ng vaccine, at mabilis na vaccination rollout upang mahikayat ang mas marami na magpabakuna.

Ayon naman kay Senator Panfilo Lacson, ang ganitong pahayag at pagbabanta lalo na kung galing sa pangulo ay hindi na dapat patulan o komentuhan pa.

Samantala, sinabi naman ni Senate President Vicente Sotto III hindi batid kung kasama sa iminungkahi ng mga eksperto sa pangulo ang ipaaresto ang mga ayaw magpabakuna. —sa panulat ni Hyacinth Ludivico

Umaasa si Senadora Imee Marcos na maipapasa ang panukalang expanded early voting para sa “COVID-19 proof” na 2022 elections.

Ayon kay Marcos, sa pamamagitan ng maagang pagboto o early voting ay matitiyak ang kaligtasan ng mga senior citizen, persons with disabilities (PWD) at mga buntis laban sa COVID-19.

Giit ng senadora, kung hindi umabot ang batas para sa early voting ay maaaring  palawakin ng Comelec ang resolusyon o utos nito ukol sa pagtatakda ng accessible polling places at emergency accessible polling places.

Posible aniyang maihabol ang pag-apruba sa  naturang panukala  sa Agosto.

Sa ngayon, nasa plenary debates pa ng senado ang panukalang batas ukol sa expanded early voting para  sa mga nakatatanda. —sa panulat ni Hyacinth Ludivico

Umabot na sa 60 milyon ang reshitradong botante para sa eleksyon sa 2022.

Ayon sa datos ng Commission on Elections (Comelec), pumalo na sa 60,117,780 ang registered voters.

Sa nasabing bilang,  58,231,612 ang existing registered voters; 1,226,412 ang mga bagong botante; at 816,183 ang tutuntong sa 18-anyos sa araw ng halalan at maaari nang bumoto.

Ang bilang ng mga botante ay mula sa 81 probinsya, 146 lungsod, at 1,488 mga munisipalidad.

Tatagal ang pagpaparehistro para sa mga bagong botante hanggang Setyembre 30. —sa panulat ni Hyacinth Ludivico

Pursigido si Labor Secretary Silvestre Bello III na isulong sa Inter-Agency Task Force na bawasan ang quarantine period para sa mga bakunadong overseas Filipino workers.

Sinabi ni Bello na dapat gawing pitong araw na lamang ang quarantine period taliwas sa panuntunan ngayon na 10 araw kung saan isasailalim sa swab test ang mga OFW sa ika-pitong araw at pag-home quarantine sa mga ito ng apat na araw.

Una nang pinayagan ng IATF ang 7-day quarantine sa mga bakunadong biyahero ngunit hindi kabilang rito ang mga OFW. —sa panulat ni Hyacinth Ludivico

Isinusulong ni Senador Win Gatchalian na maipatupad ang panukalang “One Filipino, One Bank Account Act” simula Enero 2023.

Layunin nito na magkaroon ng sariling bank account ang mga pilipinong rehistrado na sa national identification system upang paglagakan ng mga ayuda at iba pang serbisyong pinansyal ng gobyerno.

Sa ilalim ng nasabing panukala, awtomatikong magbubukas ng bank account ang  Land Bank of the Philippines  at Development Bank of the Philippines sa sinumang Pilipinong nakapagrehistro sa Philippine Identification System (PhilSys) simula Enero 1, 2023.

Hindi na rin kailangang magbayad ng opening o maintenance fees o charges sa naturang bank account.

Sinabi ni Gatchalian na sa ganitong paraan ay mabilis,  at makakasiguro pa ang ating gobyerno na sa tamang kamay mapupunta ang mga tulong pinansyal. —sa panulat ni Hyacinth Ludivico