HEADLINES

Isang petisyon na may aabot sa 320,000 na lagda ang isinumite sa tanggapan ni House Speaker Faustino Dy III, para isulong ang pagtaas ng personnel economic relief allowance o pera ng mga civilian government workers.

Pinangunahan ni ACT Teachers Party-list rep. Antonio Tinio at Alliance of Concerned Teachers ang pagsusumite ng petisyon na layong itaas sa P5,000 mula sa kasalukuyang P2,000 ang buwanang pera ng mga kawani ng gobyerno.

Ayon kay Tinio, kayang-kaya ng pamahalaan na magbigay ng mas malaking allowance, lalo’t huling itinaas ang P2,000 pera noon pang 2009.

Sa ilalim aniya ng panukalang 2027 national budget, may nakalaang P11 billion para rito, pero ayon kay Tinio, P500 lang ang katumbas na dagdag.

Iginiit ni Tinio, na kailangan Ito sa gitna ng patuloy na pagtaas ng presyo ng mga pangunahing bilihin at serbisyo. | Sa panulat ni Jenn Patrolla (DWIZ Patrol)

Umuugong ang panawagan ng tech community na magbitiw sa pwesto si Henry Aguda bilang kalihim ng Department of Information and Communications Technology.

Ito’y matapos magdeklara ng ban ang DICT at Cybercrime Investigation and Coordinating Center laban sa mga social media platform na Discord at Reddit dahil sa kaugnayan ng mga ito sa mga nangyaring karahasan sa paaralan kamakailan.

Naniniwala ang tech content creator na si Carlo Ople na dapat nang magbitiw sa pwesto si Aguda dahil anya sa kapalpakan nito sa pag-responde sa isyu tungkol sa Discord.

Sang-ayon din ang tech journalist na si Art Samaniego sa panawagang magbitiw bilang DICT secretary si Aguda, lalo na’t may mga ugong-ugong ng korapsyon sa kagawaran dahil sa mga umano’y ghost internet project na iniimbestigahan na ng Office of the Ombudsman.

Naghahanda na rin si dating DICT Undersecretary Jeffrey Ian Dy upang kwestyunin sa Korte Suprema ang mga naging hakbang ni Aguda tungkol sa isyu.

Samantala, kabilang din sa mga pinagbibitiw ng mga netizen, lalo na sa Reddit, si CICC Executive Director Renato “Aboy” Paraiso dahil sa hakbang ng ahensya sa isyu; habang may ilan din sa mga “Redditor” ang sinusubukang ungkatin ang mga kapalpakan ni Paraiso bago siya naging bahagi ng pamahalaan. | Sa panulat ni Anjo Riñon

Pansamantalang sinuspinde ni Pangulong Ferdinand Marcos Jr. ang excise tax sa liquefied petroleum gas at kerosene sa pamamagitan ng Executive Order Number 125.

Sa ilalim ng direktiba, saklaw ang LPG maliban kung ginagamit bilang raw material sa petrochemical products o bilang panggatong sa mga sasakyan.

Bukod dito, hindi rin saklaw ang kerosene kung ginagamit bilang aviation fuel.

Ginawa ang suspensyon matapos umabot sa 99.41 dolyar kada bariles ang average Dubai crude oil price sa nakaraang tatlumpung araw, mas mataas sa 80 dolyar na threshold para sa suspensyon ng excise tax.

Inirekomenda ito ng DBCC, kasama ang Department of Energy. | Sa panulat ni Reabelle Medina

Inaprubahan ni Acting Transportation Secretary Giovanni Lopez ang rekomendasyon ng Land Transportation Franchising and Regulatory Board para sa pagtaas ng pamasahe sa mga public utility vehicle.

Kabilang sa inaprubahan ang pisong dagdag sa minimum fare ng mga traditional jeepney at dagdag na dalawang piso sa bawat susunod na kilometro.

Ayon kay Sec. Lopez, mula sa dating labintatlong piso, magiging labing-apat na piso ang pamasahe para sa unang apat na kilometro.

Samantala, para sa mga modern jeepney naman, magiging labing-pitong piso ang minimum fare mula sa labinlimang piso at magiging dalawang piso at apatnapung sentimo naman ang dagdag sa bawat susunod na kilometro, mula sa dating dalawang piso at dalawampung sentimo.

Kasabay nito, inaprubahan din ng DOTr ang rekomendasyon ng LTFRB para sa provisional fare hike sa UV Express at taxi services alinsunod sa mga fare adjustment na inaprubahan ng LTFRB noong Marso. | Sa panulat ni Reabelle Medina