Itinuring ni Manila 3rd District Representative at House prosecutor Joel Chua na isang “gray area” ang usapin kung maaaring sampahan ng criminal case ang mga impeachable official, maliban sa Pangulo, habang nananatili ang mga ito sa kanilang puwesto.
Ayon kay Chua, naniniwala siyang ang Pangulo lamang ang may immunity from suit habang nakaupo sa puwesto.
Ginawa ng mambabatas ang pahayag kasunod ng kasong isinampa ng Department of Justice laban kay Vice President Sara Duterte kaugnay ng mga banta umano nito laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Sinabi ni Chua na nagiging komplikado ang usapin dahil bukod sa Pangulo ay kabilang din sa mga impeachable official ang Bise Presidente, mga mahistrado ng Korte Suprema, mga miyembro ng constitutional commissions, at Ombudsman.
Samantala, umaasa naman si Chua na haharap mismo si VP Sara sa impeachment trial upang masagot ang mga ebidensyang iniharap ng House prosecution, kabilang ang mga isyung may kaugnayan sa kanyang mga negosyo at financial records. Ang House prosecution ay nagpahayag na si Duterte ang maaaring pinakamainam na makapagpaliwanag sa mga alegasyong iniharap laban sa kanya. | Sa panulat ni Anjo Riñon
