INTERNATIONAL NEWS

Rumagasa ang isang malawakang flash flood sa Trishuli River sa pagitan ng Nepal at China, na hinihinala ng mga eksperto na dulot umano ng magnitude 5.2 na lindol at avalanche mula sa isang glacial lake sa Himalayan mountain range.

Ayon sa mga otoridad ng dalawang bansa, hindi bababa sa 160 ang namatay, habang mahigit 1,000 naman ang nawawala, kabilang ang ilang turista mula sa iba’t ibang bansa tulad ng Estados Unidos, Russia, India, Australia, Britanya, at Canada.

Gayunman, posible pang tumaas ang bilang ng mga patay sa mga susunod na oras at araw.

Kuha naman sa isang viral na CCTV footage kung paano rumagasa ang flash flood sa Gyirong border crossing sa pagitan ng dalawang bansa.

Nagpahatid na rin ng joint solidarity statement ang ilang bansa at ang European Union, kung saan ipinananawagan ng mga ito sa mga apektadong lugar na sumunod sa anumang abiso ng mga lokal na otoridad.

Samantala, wala pang abiso ang Department of Foreign Affairs at ang mga embahada ng Pilipinas sa China at India kung may mga Pilipinong apektado sa naturang sakuna. | Sa panulat ni Anjo Riñon.

Inilunsad kahapon, Hulyo 25, ang nationwide pilgrimage ng relikya ni Bl. Michael McGivney, ang tagapagtatag ng organisasyong Knights of Columbus.

Nagsimula ang paglalakbay ng “ex ossibus” relic, o ang relikyang nanggaling sa buto ni McGivney, mula sa Knights of Columbus Headquarters sa Intramuros, Maynila papuntang Baclaran Church sa Paranaque sa pamamagitan ng motorcade.

Dinaluhan naman ng mga miyembro ng Knights of Columbus at ilang mananampalatayang Katoliko ang misa sa Baclaran Church, na natapos sa pagpaparangal ng publiko sa relic ni McGivney.

Inaasahan namang aabutin ng isang taon ang paglibot ng naturang relikya sa buong bansa.

Ang Pilipinas ang isa sa pinakamaraming miyembro ng nasabing organisasyon para sa mga Katolikong kalalakihan, kasunod lamang ng Estados Unidos, Mexico, at Canada.

Itinatag ni McGivney ang Knights of Columbus noong 1882, habang naitatag naman ang unang konseho nito sa Pilipinas, ang Manila Council 1000, noong 1905.

Idineklara namang “beato” ni Pope Francis si McGivney noong 2020. | Sa panulat ni Anjo Riñon

Isang katao ang nasawi habang hindi bababa sa 16 ang nasugatan matapos araruhin ng isang sasakyan ang mga tao sa ginaganap na Christopher Street Day (Berlin Pride) sa lungsod ng Berlin, Germany, nitong Sabado ng gabi.

Ayon sa mga awtoridad, naganap ang insidente malapit sa Tiergarten sa central Berlin. Ilan sa mga nasugatan ay nagtamo ng malubhang pinsala at agad na isinugod sa ospital.

Sinabi ng pulisya na nagsasagawa na sila ng malawakang manhunt upang matunton ang isa o higit pang suspek. Patuloy pa rin ang imbestigasyon at wala pang inilalabas na motibo sa insidente.

Dahil sa nangyari, kinansela ng mga organizer ang natitirang bahagi ng taunang Pride celebration.

Kinundena naman ni German Chancellor Friedrich Merz ang insidente at nangakong paiigtingin ang imbestigasyon upang mapanagot ang mga responsable. Inilarawan din ni Berlin Mayor Kai Wegner ang pangyayari bilang isang pag-atake sa malaya at bukas na lipunan.

Umabot na sa mahigit walumpung libong indibidwal ang lumikas sa España at France matapos sumiklab ang malawakang wildfire sa Pyrenees Mountain Range na naghihiwalay sa dalawang bansa.

Ito’y sa gitna ng nagpapatuloy na heatwave na nakaaapekto sa ilang bansa sa Europa, na kumitil na rin ng daan-daang buhay.

Nabatid na nasa animnapung libong Pranses at dalawampung libong Español ang lumikas mula sa naturang sunog.

Dahil dito, humingi na ng saklolo sina Spanish Prime Minister Pedro Sanchez at French President Emmanuel Macron sa mga kapwa bansa sa European Union upang mailikas ang mga residenteng posibleng ma-trap dahil sa wildfire. | Sa panulat ni Anjo Riñon

Nagbanta si U.S. President Donald Trump na pasasabugin ng Estados Unidos ang imprastraktura ng Iran sa bawat pag-atake nito sa mga barkong dumaraan sa Strait of Hormuz.

Bilang tugon, sinabi ng isang opisyal ng militar ng Iran na maghihiganti rin ang Tehran laban sa mahahalagang pasilidad sa rehiyon.

Kasabay nito, nagdulot ng panibagong pangamba ang banta ng grupong Houthi na harangin ang pagdaan ng mga barkong nagdadala ng langis ng Saudi Arabia sa Bab el-Mandeb Strait.

Dahil dito, ilang oil tanker ang nagbago ng ruta habang sumirit ang presyo ng langis sa global market.

Sa kabila nito, patuloy ang mga hakbang ng mga tagapamagitan sa dalawang bansa upang maabot ang isang pansamantalang tigil-putukan. | Sa panulat ni Aileen Arnido.