FOREIGN

Nananawagan na ang bansang Nepal sa mga kapwa bansa sa buong mundo ng tulong sa nagpapatuloy nitong search, rescue, at retrieval operation matapos ang mapaminsalang flash flood malapit sa border nito sa Tibet.

Ayon kay Nepalese Foreign Ministry Spokesman Lok Bahadur Poudel Chhetri, kabilang sa mga hinihinging tulong ng pamahalaan ang mga essential non-food products, tulad ng mga freezer at DNA testing kits, habang patuloy na sumisirit ang bilang ng mga nakukumpirmang patay.

Dagdag pa ng pamahalaan ng Nepal, partikular na itong humihingi ng tulong mula sa Estados Unidos, Singapore, China, at Singapore.

Nauna nang nagpaabot ng tulong ang United Kingdom sa Nepal matapos mabatid na maraming British national ang kabilang sa mga nawawalang indibidwal sa naturang sakuna.

Sa huling datos ng Nepal, umabot na sa mahigit siyamnaraan ang namatay at mahigit apatnalibong indibidwal ang naitalang nawawala, kabilang ang Pilipinong si Doctor Juan Carlos Manalo.—sa panulat ni Anjo Riñon

Nakatakdang bumaba sa pwesto si White House Press Secretary Karoline Leavitt sa katapusan ng Agosto.

Ayon kay US President Donald Trump, nais ni Leavitt na magkaroon ng mas maraming oras para sa kanyang pamilya.

Sa kabila nito, nilinaw ni Trump na mananatili si Leavitt bilang isa sa kanyang mga senior advisor.

Bukod sa pagiging pinakabatang spokesperson ng White House sa edad na bente-otso anyos, kinilala si Leavitt dahil sa kanyang matapang at palaban na pakikipagpalitan sa mga reporter, habang mariin niyang ipinagtatanggol ang mga polisiya at pahayag ng US President.

Sa ngayon, wala pang inaanunsyo si Trump kung sino ang papalit bilang tagapagsalita ng White House.  l mula sa panulat ni Reianne Antiquina

Hindi bababa sa 44t katao ang nasawi matapos tumaob at lumubog ang isang ferry sa Lake Kariba sa Zimbabwe noong Martes, August Eleven.

Batay sa imbestigasyon ng mga otoridad, overloading ang tinitingnang dahilan ng paglubog ng naturang sasakyang pantubig.

90 pasahero at 5 crew member lamang umano ang kapasidad ng ferry ngunit ayon sa isang lake official, nasa 120 katao ang sakay nito kabilang ang 12 bata.

Bunsod nito, nagdeklara na si Zimbabwe President Emmerson Mnangagwa (Muh-Nang-Gag-Wuh) ng state of disaster sa pagpapatuloy ng search and rescue operations.

Sa ngayon, 77 katao pa lamang ang nasasagip mula sa lumubog na sasakyang pantubig.  l mula sa panulat ni Reianne Antiquina

Umakyat na sa mahigit 200 at 50 katao ang patay sa magnitude 7.4 na lindol na yumanig sa Colombia nitong Lunes, Agosto 10.

Ayon sa mga otoridad sa Colombia, mahigit 2,000 katao pa ang naiulat na nawawala at patuloy na pinaghahanap.

Batay sa pagtataya ng United Nations Office for the Coordination of Humanitarian Affairs o OCHA, nasa 5,000 kabahayan ang nasira sa pagyanig.

Sa ngayon, ayon sa Colombian Geological Service, halos isangdaan na ang aftershocks na naitala.

Samantala, nagtungo na si Colombian President Abelardo de la Espriella noong Lunes ng gabi sa Quibdó, at pinakilos ang buong puwersa ng militar at pulisya upang tumugon sa sitwasyon. l mula sa panulat ni Reianne Antiquina

Sumampa na sa mahigit labing-isang libo’t limangdaan ang kaso ng cyclosporiasis sa Michigan, United States.

Dalawang katao na rin ang kumpirmadong nasawi dahil sa naturang outbreak.

Ayon sa imbestigasyon ng Food and Drug Administration (FDA), posibleng may kaugnayan ang pagkalat ng sakit sa iceberg lettuce na inihahain sa ilang fast food chain na kumukuha ng supply mula sa Taylor Farms Operations sa Central Mexico.

Nagpapatuloy naman ang imbestigasyon ng mga otoridad upang matukoy kung mayroon pang ibang sanhi ng outbreak.

Batay sa pinakahuling datos noong Hulyo a-trenta, umabot na sa halos dalawangdaan ang bilang ng mga naospital dahil sa naturang sakit.

Ang Cyclospora infections ay kumakalat sa pamamagitan ng pagkain ng hilaw na prutas at gulay o sa pag-inom ng kontaminadong tubig at nagdudulot ng pagtatae, pagsusuka, at iba pang gastrointestinal symptoms.   l mula sa panulat ni Reianne Antiquina

Ipinag-utos na ng mga otoridad sa Guatemala ang agarang paglikas sa dalawang komunidad matapos pumutok ang Fuego Volcano.

Partikular na inilikas ang mga residente sa El Porvenir (El Por-veh-neer) at Las Lajitas (Lah-hee-tahs) sa munisipalidad ng San Juan Alotenango (Ah-loh-teh-nahn-goh).

Itinaas na rin ang orange alert at pinaigting ang pagbabantay sa mga aktibidad sa bulkan.

Ayon sa mga opisyal, umabot na sa limang bangin ang pagdaloy ng pyroclastic materials na posible pang lumala kung lalo pang titindi ang aktibidad ng bulkan.

Ibinabala rin ng mga otoridad na maaaring umabot sa hanggang isangdaang kilometro sa kanluran at hilagang-kanluran ng bulkan ang ash cloud dispersal.  l mula sa panulat ni Reianne Antiquina

Nagkasundo ang Estados Unidos at Israel na pansamantalang itigil ang pag-atake sa Iran.

Ito ang kinumpirma ni U.S. President Donald Trump sa kanyang social media, sa kondisyon na mabilis na maaabot ang isang kasunduan na magwawakas sa ilang buwang alitan.

Ayon kay Trump, nakiusap ang ilang bansa mula sa Gitnang Silangan, kabilang ang Tehran, na ipagpaliban muna ang mga pag-atake upang makumpleto ang isang kasunduan na magbubunga ng agaran, ganap, at lubos na pagbubukas ng Strait of Hormuz at magwawakas sa banta ng nuclear programs ng Iran.

Matatandaang nabigo ang naunang peace deal ng mga nasabing bansa kaya mas lalong hinigpitan ng Iran ang kontrol nito sa naturang kipot.  l mula sa panulat ni Reianne Antiquina

Sumampa na sa limampu’t-isa katao ang kumpirmadong nasawi sa landslide na naganap noong Hulyo a-disi-siyete sa Chongqing, China.

Sa kasalukuyan, sampu katao pa ang nawawala at patuloy na pinaghahanap.

Ayon sa mga otoridad, nananatili pa rin sa mga evacuation center ang mahigit isanglibo isangdaang apektadong residente.

Bagaman tinapos na ang search efforts sa lupa, nagpapatuloy pa rin ang dredging at search operations sa Wu River.  l mula sa panulat ni Reianne Antiquina

Ipinaaaresto ng Russia si Telegram Founder at CEO Pavel Durov dahil sa umano’y pagkakasangkot sa terrorismo.

Ang Telegram ang isa sa mga pinakamalaking messaging platform sa nasabing bansa.

Batay sa ulat ng russian authorities, ginagamit umano ng Ukrainian Security Services ang Telegram upang manghikayat ng mga Russo na manggulo kung saan nabigo umano si Durov na tanggalin ang ipinagbabawal na impormasyon.

Bukod dito, nahaharap din si Durov sa iba pang mga alegasyon dahil sa mga iligal na content sa naturang app.  l mula sa panulat ni Reianne Antiquina