FOREIGN

Inilunsad kahapon, Hulyo 25, ang nationwide pilgrimage ng relikya ni Bl. Michael McGivney, ang tagapagtatag ng organisasyong Knights of Columbus.

Nagsimula ang paglalakbay ng “ex ossibus” relic, o ang relikyang nanggaling sa buto ni McGivney, mula sa Knights of Columbus Headquarters sa Intramuros, Maynila papuntang Baclaran Church sa Paranaque sa pamamagitan ng motorcade.

Dinaluhan naman ng mga miyembro ng Knights of Columbus at ilang mananampalatayang Katoliko ang misa sa Baclaran Church, na natapos sa pagpaparangal ng publiko sa relic ni McGivney.

Inaasahan namang aabutin ng isang taon ang paglibot ng naturang relikya sa buong bansa.

Ang Pilipinas ang isa sa pinakamaraming miyembro ng nasabing organisasyon para sa mga Katolikong kalalakihan, kasunod lamang ng Estados Unidos, Mexico, at Canada.

Itinatag ni McGivney ang Knights of Columbus noong 1882, habang naitatag naman ang unang konseho nito sa Pilipinas, ang Manila Council 1000, noong 1905.

Idineklara namang “beato” ni Pope Francis si McGivney noong 2020. | Sa panulat ni Anjo Riñon

Isang katao ang nasawi habang hindi bababa sa 16 ang nasugatan matapos araruhin ng isang sasakyan ang mga tao sa ginaganap na Christopher Street Day (Berlin Pride) sa lungsod ng Berlin, Germany, nitong Sabado ng gabi.

Ayon sa mga awtoridad, naganap ang insidente malapit sa Tiergarten sa central Berlin. Ilan sa mga nasugatan ay nagtamo ng malubhang pinsala at agad na isinugod sa ospital.

Sinabi ng pulisya na nagsasagawa na sila ng malawakang manhunt upang matunton ang isa o higit pang suspek. Patuloy pa rin ang imbestigasyon at wala pang inilalabas na motibo sa insidente.

Dahil sa nangyari, kinansela ng mga organizer ang natitirang bahagi ng taunang Pride celebration.

Kinundena naman ni German Chancellor Friedrich Merz ang insidente at nangakong paiigtingin ang imbestigasyon upang mapanagot ang mga responsable. Inilarawan din ni Berlin Mayor Kai Wegner ang pangyayari bilang isang pag-atake sa malaya at bukas na lipunan.

Umabot na sa mahigit walumpung libong indibidwal ang lumikas sa España at France matapos sumiklab ang malawakang wildfire sa Pyrenees Mountain Range na naghihiwalay sa dalawang bansa.

Ito’y sa gitna ng nagpapatuloy na heatwave na nakaaapekto sa ilang bansa sa Europa, na kumitil na rin ng daan-daang buhay.

Nabatid na nasa animnapung libong Pranses at dalawampung libong Español ang lumikas mula sa naturang sunog.

Dahil dito, humingi na ng saklolo sina Spanish Prime Minister Pedro Sanchez at French President Emmanuel Macron sa mga kapwa bansa sa European Union upang mailikas ang mga residenteng posibleng ma-trap dahil sa wildfire. | Sa panulat ni Anjo Riñon

Nagbanta si U.S. President Donald Trump na pasasabugin ng Estados Unidos ang imprastraktura ng Iran sa bawat pag-atake nito sa mga barkong dumaraan sa Strait of Hormuz.

Bilang tugon, sinabi ng isang opisyal ng militar ng Iran na maghihiganti rin ang Tehran laban sa mahahalagang pasilidad sa rehiyon.

Kasabay nito, nagdulot ng panibagong pangamba ang banta ng grupong Houthi na harangin ang pagdaan ng mga barkong nagdadala ng langis ng Saudi Arabia sa Bab el-Mandeb Strait.

Dahil dito, ilang oil tanker ang nagbago ng ruta habang sumirit ang presyo ng langis sa global market.

Sa kabila nito, patuloy ang mga hakbang ng mga tagapamagitan sa dalawang bansa upang maabot ang isang pansamantalang tigil-putukan. | Sa panulat ni Aileen Arnido.

Nagbanta ang Iran na haharangin ang iba pang mahahalagang ruta ng kalakalan sa rehiyon kasunod ng panibagong pag-atake ng Estados Unidos sa kanilang bansa.

Ayon sa Iran’s Revolutionary Guards, mananatiling sarado ang Strait of Hormuz hangga’t hindi itinitigil ng Amerika ang pagpapasabog nito.

Samantala, kinumpirma ng U.S. Central Command na nagsagawa ito ng panibagong drone, air, at naval strikes laban sa mga military facilities ng Iran upang pahinain ang kakayahan nitong umatake sa mga barkong dumaraan sa naturang rutang pandagat.

Dahil sa lumalalang tensyon, muling sumirit ang presyo ng krudo sa global market habang huminto ang pagdaan ng mga oil tanker sa Strait of Hormuz.

Ipinahayag ng mga opisyal na 27 katao ang nasawi matapos sumiklab ang isang malaking sunog sa Rong Beer Na Lat Phrao, sa Bangkok, Thailand, ilang sandali bago maghatinggabi noong Hulyo 12, 2026. Samantala, 63 katao ang nasugatan, at 22 sa kanila ang nasa kritikal na kondisyon, ayon kay Suriyachai Rawiwan, direktor ng Bangkok Metropolitan Administration’s Department of Disaster Prevention and Mitigation.

Sa paunang imbestigasyon ng mga awtoridad, pinaniniwalaang nagsimula ang sunog dahil sa electrical short circuit sa isang air conditioner na nakakabit sa kisame ng establisimyento. Makikita sa mga kuhang ibinahagi sa Facebook ang mga kostumer na sumisigaw at nagtatakbuhang palabas ng bar habang nilalamon ng apoy at makapal na usok ang harapang pasukan.

Ayon sa mga saksi, nagsimula ang sunog malapit sa entablado at mabilis na kumalat ang makapal na usok at apoy sa buong establisimyento. Sinabi ni Punong Ministro Anutin Charnvirakul na maraming kostumer ang nagtungo sa likurang bahagi ng gusali kung nasaan naroon ang kusina at mga palikuran upang maghanap ng ligtas na daan palabas.

Patuloy pa ring iniimbestigahan ng mga awtoridad ang sanhi ng sunog. Ayon kay Gobernador ng Bangkok Chadchart Sittipunt, patuloy na sinusuri ng mga forensic investigator ang lugar upang matukoy ang eksaktong pinagmulan ng sunog at ang iba pang mga salik na maaaring nagpalala sa insidente. | mula sa panulat ni Angela Maurer

Kinumpirma ni National Assembly President Jorge Rodriguez nitong Linggo, Hulyo 12, na umabot na sa 4,490 ang bilang ng mga nasawi sa kambal na lindol na tumama sa Venezuela noong Hunyo 24. Hindi pa rin natutukoy ang pagkakakilanlan ng 315 sa mga nasawi. Ayon sa pinakahuling tala, 16,740 katao ang nasugatan, 6,462 ang nasagip, at halos 17,907 ang napilitang lumikas o nawalan ng tirahan.

Iniulat din ni Rodriguez na 856 na gusali ang naapektuhan ng lindol, kabilang ang 190 na tuluyang gumuho o nagtamo ng matinding pinsala sa imprastraktura. Dagdag pa niya, nakatakdang simulan sa susunod na linggo ang pamamahagi ng pabahay para sa mga naapektuhang pamilya sa pangunguna ni acting President Delcy Rodriguez.

Sa tinatayang 25,000 pabahay na kinakailangan para sa mga apektado, nasa 200 pa lamang ang unang nakatakdang ipamahagi. Ayon sa pamahalaan, mayroon nang natukoy na humigit-kumulang 40 lupang pagtatayuan ng housing projects sa Osma at Chuspa, na may kabuuang lawak na 584,000 metro kuwadrado.

Patuloy naman ang isinasagawang search and rescue operations sa kabila ng dumaraming bilang ng mga nasawi, ayon kay Rodriguez. “As long as there is life, there is hope.

We still have one or two sites where the situation remains uncertain, active sites where we are searching for survivors.,” dagdag pa niya

Dalawang lalaki ang nasawi at anim na iba pa ang nasugatan sa pamamaril na naganap sa taunang Salsa on Street Clair Festival sa Toronto, Canada.

Ayon kay Toronto Police Deputy Chief Frank Barredo, apat sa mga sugatan ang nagtamo ng malalang tama ng bala na agad isinugod sa ospital.

Tinatayang nasa labing tatlong libong indibidwal ang dumalo sa naturang street festival, at nakarekober ang mga otoridad ng dalawang baril sa pinangyarihan ng insidente.

Patuloy ang imbestigasyon at paghahanap ng pulisya sa mga suspek sa pamamaril.

Inanunsyo ni US President Donald Trump na natapos na ang tigil-putukan ng kanyang bansa at ng Iran matapos maitala ang panibagong palitan ng missile at drone sa Gitnang Silangan.

Gayunman, iginiit ni Trump na pinag-iisipan pa ng Estados Unidos kung ano ang mga susunod na hakbang nito.

Ginawa ng Pangulo ng Amerika ang pahayag habang nasa Turkey ito para sa NATO Summit.

Samantala, tinawag naman ng Iran na “kasuklam-suklam” ang “Memorandum of Understanding” sa pagitan nito at ng Amerika, na naging batayan ng nasabing tigil-putukan. | Sa panulat ni Anjo Riñon