SPORTS

Sinita ni Filipina tennis sensation Alex Eala ang isang fan matapos nitong ihagis ang isang puting cap sa kaniyang direksyon habang palabas siya ng court matapos ang kaniyang laban sa 2026 Asian Games sa Nagoya, Japan.

Sa isang video na kumakalat sa social media, makikitang naglalakad palabas ng court si Eala nang biglang ihagis ng isang lalaki ang cap, na nais papirmahan sa atleta.

Agad na huminto si Eala at pinulot ang cap bago pinagsabihan ang fan na hindi dapat naghahagis ng mga gamit sa mga manlalaro.

Aniya, maaari namang maayos na humingi ng autograph kung nais ng fan na magpapirma.

“Sir, hindi ka dapat nagtatapon ng mga gamit sa player. You say it nice and I will sign for you pero huwag kang magtatapon please?,” saad ni Eala.

Sa kabila ng insidente, pinirmahan pa rin ni Eala ang cap at ibinalik ito sa fan.

Nagkamit ng bronze medal si Karl Eldrew Yulo sa Men’s Horizontal Bar Final ng 2026 Asian Games sa Japan ngayong Biyernes, September 25.

Nagtala si Eldrew ng iskor na 13.666, mula sa 5.0 sa difficulty, 8.566 sa execution, at may dagdag na 0.1 bonus point, para makuha ang ikatlong puwesto.

Ito ang kauna-unahang Asian Games medal ni Eldrew, na muling nagpakita ng kaniyang galing sa international competition.

Samantala, mas maaga ring nakasungkit ng gintong medalya ang kaniyang kuya na si Carlos Yulo matapos magwagi sa Men’s Vault Final, kung saan ito na ang ikalawang gold medal ng Pilipinas sa Asian Games. | Sa panulat ni Reabelle Medina

Nagtapos sa ikaanim na puwesto ang Team Philippines sa men’s artistic gymnastics team final ng Aichi-Nagoya 2026 Asian Games matapos makapagtala ng kabuuang 227.359 sa Rainbow Hall ng Nagoya General Gymnasium nitong Miyerkules, Setyembre 23.

Hindi nakakuha ng medalya ang koponan na pinangunahan ng magkapatid na Carlos at Eldrew Yulo matapos ang anim na rotations. Nanguna ang China na may 255.095, sinundan ng host country na Japan na nagtala ng 254.026 at Chinese Taipei na may 239.896.

Kasama ng Yulo brothers sa koponan sina Justin Ace de Leon, Zachary Nuñez at Miguel Besana.

Si Carlos ang nanguna sa individual performance ng Team PH. Nakuha niya ang pinakamataas na marka sa floor exercise matapos magtala ng 14.266 mula sa 5.7 difficulty score. Nasa ikaapat naman siya sa vault sa 14.566, mula sa 5.2 difficulty.

Nagkaroon din si Carlos ng 14.166 sa parallel bars para sa tumabla sa ikalimang puwesto at 13.333 sa rings para sa ika-siyam na ranggo.

Samantala, nagtapos si Eldrew sa ika-siyam na puwesto sa horizontal bar matapos makakuha ng 13.166.

Bagama’t hindi umabot sa podium ang Pilipinas sa team event, may mga individual event pa ring haharapin ang magkapatid na Yulo sa pagpapatuloy ng Asian Games gymnastics competition.

Nakuha ng Philippine women’s soft tennis team ang bronze medal sa 2026 Asian Games.

Ito’y matapos silang talunin ng host nation na Japan sa semifinals sina Bien Zoleta at Princess Catindig sa doubles category, at si Christy Sanosa sa singles.

Gayunman, itinuturing pa rin ni Zoleta ang podium finish bilang makasaysayan para sa soft tennis sa Pilipinas dahil ito ang kauna-unahang panalo ng bansa sa naturang sport matapos itong gawing medal event sa Asian Games noong 1994.

Ito rin ang unang medalyang iuuwi ng Team Pilipinas sa nagpapatuloy na palaro.

Samantala, assured podium finish din ang nakamit nina Jean Claude Saclag at Carlos Alvarez matapos pareho silang makalusot sa semifinals ng men’s traditional mixed martial arts ng kani-kanilang mga dibisyon. | Sa panulat ni Anjo Riñon

Na-disqualify sa finals ng 4×100-meter freestyle relay ng 2026 Asian Games ang Philippine women’s swimming team na kinabibilangan nina Kayla Sanchez, Heather White, Xiandi Chua at Teia Salvino nitong Linggo, Setyembre 20 sa Tokyo Aquatics Center.

Malakas ang naging simula ng Pilipinas matapos ang unang leg ni Sanchez, habang naiangat naman ni White sa ikatlong puwesto ang koponan.

Gayunman, na-disqualify ang Pilipinas sa leg ni Salvino matapos umano siya umalis sa starting platform bago tuluyang mahawakan ni Chua ang wall.

Ayon kay Philippine Aquatics Secretary General Eric Buhain, nagkaroon ng “too early take off” dahil may pagitan sa touch ni Chua at pag-alis ng paa ni Salvino sa platform.

Dumating sa bansa kagabi, Setyembre 13 sina Elias at Ifeoma Adili, mga magulang ng yumaong Ateneo student-athlete na si Divine Adili.

Paglapag sa Ninoy Aquino International Airport (NAIA) Terminal 3, sinalubong sila ng mga kinatawan ng Ateneo de Manila University (AdMU).

Ayon sa pahayag na inilabas ng AdMU, makakasama ng mga magulang ni Divine ang Ateneo Men’s Basketball Team at dadalo ang mag-asawa sa unang dalawang laro ng Blue Eagles sa University Athletic Association of the Philippines (UAAP) Season 89.

Ang UAAP campaign ng Blue Eagles ngayong season ay iniaalay ng Ateneo sa alaala nina Divine Adili at Rene Clert Baterbonia.

Bumangon ang Gilas Pilipinas mula sa pagkatalo sa Bahrain matapos tambakan ang Kazakhstan, sa score na 109-78, sa Aichi-Nagoya 2026 Asian Games.

Nagpakawala ng malakas na laro sina Jerrick Ahanmisi at Robert Bolick laban sa Kazakhstan. Kumamada si Ahanmisi ng 22 puntos habang nagdagdag si Bolick ng 20 puntos para tulungan ang Gilas na makuha ang unang panalo sa naturang torneo.

Dahil sa panalong ito, 1-1 ang record ng Gilas sa Group C at muling nabuhay ang tsansa nitong makapasok sa quarterfinals.

Sunod na makakaharap ng Gilas ang China sa Setyembre 14 sa isang mahalagang laro para sa kanilang pag-asa sa group stage.

Aminado si Gilas Pilipinas head coach Tim Cone na tagahanga siya ng Filipino tennis star at kasalukuyang world number 18 na si Alex Eala.

Ayon kay Cone, nais sana niyang mapanood si Eala noong 2023 Asian Games sa Hangzhou, China.

Kaya lang, sinabi ng Gilas head coach na nabulilyaso ang lahat ng kanyang mga plano matapos ang talo noon ng Gilas kontra Jordan, na nag-resulta sa naging laro ng pambansang koponan kontra Qatar, na nataon naman sa laban ni Eala, na kalauna’y nakakuha ng bronze sa naturang palaro.

Gayunman, umaasa siyang makakapanood siya ng laro ni Eala, lalo na’t lalo nang tumingkad ang tennis career nito dahil sa Wimbledon dream run at sa pagkapanalo nito sa Mubadala DC Open kamakailan.

Samantala, ibinahagi rin ni Cone na masaya siyang makakasama sa Gilas lineup ang tatlong big men ng koponan na sina June Mar Fajardo, Kai Sotto, at AJ Edu, na pare-parehong makakasali sa susunod na sigwada ng FIBA World Cup Asian Qualifiers ngayong Agosto. | Sa panulat ni Anjo Riñon

Nakamit ni Filipina tennis sensation Alex Eala ang kampeonato sa 2026 Mubadala DC Open matapos talunin ang WTA world no. 3 at pambato ng United States na si Jessica Pegula sa scores na 4-6, 6-4, 6-0.

Ito ang kauna-unahang WTA singles title ng 21-anyos na Pinay tennis player at ang kanyang ikalawang pagpasok sa isang WTA final matapos mabigo sa Eastbourne noong nakaraang taon.

Bago nakarating sa finals, tinalo ni Eala ang defending champion na si Leylah Fernandez sa second round, sinundan ng world No. 10 na si Elina Svitolina sa quarterfinals, at dating world No. 1 na si Naomi Osaka sa semifinals ng naturang torneo. | via Jordan Gutierrez/DWIZ News