NATIONAL NEWS

Nagpakita ng suporta sa mga tumatakbong pangulo sa halalan 2022 ang iba’t ibang sektor sa bansa.

Nitong linggo ay nagsagawa ng motorcade ang mga supporter ni dating Senador Bongbong Marcos na tinawag na ‘Solidarity Caravan’.

Nagmula sa iba’t ibang lungsod sa Metro Manila ang supporters ni Marcos na nag-ikot sa ilang mga lungsod kabilang ang Quezon City, Muntinlupa, at Valenzuela.

Sa San Juan City naman idinaos ang ‘Pink Bike Day’ bilang pagsuporta kay Vice President Leni Robredo, kasabay ng pagdiriwang ng National Bicycle Day.

Iba’t ibang grupo ang nagbisikleta kabilang ang ‘Doctor Influencers for Leni’.

Nagtungo ang supporters ni Robredo sa Pasig City kung saan sinama rin ng mga ito ang kanilang mga alagang aso at tinawag na ‘Dogs for Leni’.

Sinuportahan naman ng ilang Labor Leader si Manila Mayor Isko Moreno Domagoso sa paglunsad ng manggagawa para kay Isko Moreno o mismo nitong sabado.

Habang ang tambalan nina Partido Reporma Presidential bet Senador Panfilo `Ping’ Lacson at running mate na si Senate President Vicente `Tito’ Sotto III ay sinuportahan naman ng mga lider at miyembro ng iba’t ibang evangelical group. —sa panulat ni Hya Ludivico

Nadagdagan pa ang mga bansa na napabilang sa red list sa harap ng banta ng COVID-19 Omicron variant.

Ayon sa Inter-Agency Task Force for the Management of Emerging Infectious Disease, kasama sa travel red list ang Austria, Czech Republic, Hungary, the Netherlands, Switzerland, Belgium at Italy kung saan epektibo na simula kahapon ang travel ban na tatagal hanggang December 15, 2021.

Nauna nang nailagay sa red list category ang South Africa, Botswana, Namibia, Zimbabwe, Lesotho, Eswatini, at Mozambique.

Ayon kay Cabinet Secretary at Acting Palace Spokesperson Karlo Nograles hindi papayagan ang lahat ng mga inbound international travel, na galing sa red list countries sa nakalipas na 14 araw.

Tanging ang mga Pilipinong pabalik sa bansa sa pamamagitan ng government-initiated o non-government-initiated repatriation at bayanihan flights ang papayagang makapasok sa bansa ngunit kinakailangan pa ring sundin ang protocols sa mga red list countries.

Samantala, ang mga pasahero namang papunta na sa Pilipinas na nanggaling sa red list countries sa nakalipas na 14 na araw, ay papayagan pa rin namang makapasok ngunit kailangan ng mga ito na sumailalim sa facility-based quarantine sa loob ng 14 araw, at sumailalim sa testing sa ika-pitong araw. —sa panulat ni Hya Ludivico

Aabot sa P5.4-M halaga ng shabu ang nasabat ng Manila Police District Station 7 sa ikinasang buy bust operation nitong linggo sa Tondo, Maynila.

Target sa naturang operasyon ang Top 1 most wanted person na si Alyas Dante.

Naganap ang transaksyon sa isang gasolinahan sa Juan Luna Street kung saan nagbenta umano ang suspek at mga kasamahan nito ng P40-K halaga ng hinihinalang shabu.

Nakuha sa mga suspek ang walong plastic ng umano’y iligal na droga.

Ayon sa mga otoridad, bahagi ng sindikato ng droga sa Tondo ang apat na suspek at kabilang rin ang mga ito sa newly-watchlisted drug personalities.

Nahaharap ang mga suspek sa Comprehensive Dangerous Drugs Act. —sa panulat ni Hya Ludivico

Karagdagang 20-M doses ng pfizer COVID-19 vaccine ang binili ng Pamahalaan para sa susunod na taon.

Ayon kay National Task Force against COVID-19 Chief Implementer at Vaccine Czar Secretary Carlito Galvez, Jr., layon nito na mapataas ang bilang para sa Pediatric Vaccination.

Target aniya na mabakunahan ang 90-M populasyon kasama na ang pagbibigay ng booster shot sa A1, A2, at A3 priority group sa ikalawang kwarter ng 2022.

Layon din ng Pamahalaan na mabakunahan ang 54-M Pilipino, kabilang ang 80% porsyento ng mga batang nasa edad 12-17 taong gulang sa pagtatapos ng taon.  —sa panulat ni Hya Ludivico

Dapat na hintayin ng mga pribadong sektor na makapaglabas ng Emergency Use Authorization o EUA ang Pamahalaan bago gamitin bilang booster shots ang kanilang mga bakuna na malapit nang mag-expire.

Ayon kay Vaccine Czar Secretary Carlito Galvez Jr., ang EUA na inisyu ng FDA ay para lamang sa pagtuturok ng booster shots sa mga health workers, senior citizens at mga may comorbidities.

Sang-ayon naman sina Galvez, Health Secretary Francisco Duque III at Trade Secretary Ramon Lopez na magamit ng mga pribadong sektor ang kanilang mga biniling bakuna bilang booster shots subalit kailangan muna ng EUA.

Sinabi pa ni Galvez na humingi na rin sila ng direktiba sa World Health Organization kaugnay dito at prayoridad pa rin aniya ang pagbibigay ng booster shots sa nabanggit na priority groups. —sa panulat ni Hya Ludivico

Muling binuksan sa publiko ang Rizal Park o luneta park sa ilalim ng ipinatutupad na Alert level 2 sa bansa.

Dahil dito, papayagan nang makapamasyal ang mga ordinaryong pamilya kabilang na ang mga bata at mag-asawa upang makapag-relax kasama ang kanilang mga mahal sa buhay.

Kasabay nito, nilagyan narin ng colorful christmas décor ang nabanggit na lugar katulad ng mga parol, christmas light at christmas tree.

Layunin nitong maalis ang pagkaboring ng mga menor de edad at pagkalulong sa gadgets ng mga kabataan dulot ng banta ng COVID-19 pandemic. —sa panulat ni Angelica Doctolero

Naaresto na ng mga otoridad ang apat na most wanted person sa San Jose Del Monte, Bulacan.

Kinilala ang mga wanted na sina Jaymil Manalili, 27-anyos; Francis De Leon Ariola, 23-anyos; Kenneth Masong, 25-anyos; at Jestony Demetrio, 31-anyos.

Sa impormasyong nakuha ng SJDM Police, naaresto ang mga suspek sa bisa ng warrant of arrest mula sa RTC branch 19,9,12 at 21 sa Malolos City na isinilbi ng mga otoridad sa magkakahiwalay na lugar sa naturang lungsod.

Sinasabing si Manalili ay may kasong  robbery, si De Leon ay nahaharap naman sa R.A 6539 na may 5 counts o anti-carnapping law of 1972, si Masong ay nahaharap naman sa violation of section.11, Article II of Republic Act na walang piyansa habang si Demetrio naman ay nahaharap sa kasong rape-2 counts.

Nakakulong na ngayon sa SJDM Custodial Facility ang mga naarestong wanted. —sa panulat ni Angelica Doctolero

Nasawi matapos atakihin sa puso ang isang 14-anyos babae makaraang magsagawa ng demolisyon sa Antipolo.

Kinilala ang menor de edad na nasawi na si Mica Antoinette Ferrer na nakatira sa V. V. Soliven, Open Space, Brgy., Mayamot Antipolo City.

Sa imbestigasyong nakuha ng mga otoridad, natakot ang nasawing bata dahil sa dalang mga malalaking baril ng demolition team.

Nabatid na ilang mga kabahayan ang giniba kung saan, mahigit isangdaang pamilya ang naapektuhan o nawalan ng tirahan sa nasabing lugar.

Nakaburol na ngayon ang 14-anyos na bata sa nagiba nilang bahay sa Antipolo. —sa panulat ni Angelica Doctolero