NATIONAL NEWS

Nilimatahan na ng Land Transportation Franchising and Regulatory Board hanggang animnapung piso ang booking o platform fee na maaaring singilin ng mga app-based taxi, layong tiyakin ang malinaw at patas na sistema ng paniningil para sa mga pasahero.

Kasunod ito ng mga reklamo ukol sa hindi pare-pareho at hindi otorisadong dagdag-singil sa mga taxi na gumagamit ng online booking platforms.

Ayon sa LTFRB, nakasaad sa Memorandum Circular 2026-055 na katumbas ito ng dalawampung porsyento ng aprubadong pasahe o hanggang animnapung piso, alinman ang mas mababa, ang maaaring singilin bilang booking fee sa mga pasahero.

Dito, ipinagbawal ng ahensya ang additional booking fee, convenience fee, service fee, o anumang dagdag-singil na walang paunang pahintulot mula sa kanila.

Nagbabala si LTFRB Chairman Vigor Mendoza na sasailalim sa kaukulang parusa ang sinumang operator, platform provider, o driver na lalabag sa memorandum, kabilang ang multa, suspensyon, o kanselasyon ng prangkisa o akreditasyon. | Sa panulat ni Reabelle Medina

Tiniyak ng Department of Trade and Industry na wala pang pagtataas sa presyo ng mga pangunahing bilihin sa kabila ng inaasahang oil price hike sa susunod na linggo.

Ayon kay Trade Secretary Cristina Roque, wala pang manufacturer na naghahain ng kahilingan para sa price adjustment, kaya nananatiling walang pagbabago sa presyo ng basic necessities at prime commodities.

Wala pa rin aniyang natatanggap na aplikasyon ang DTI para sa anumang dagdag-presyo.

Giit ni Sec. Roque, mas mabuting hintayin muna ang magiging takbo ng sitwasyon bago magbigay ng anumang hakbang o pagtaya.

Samantala, patuloy na binabantayan ng DTI ang galaw ng presyo ng langis at ang posibleng epekto nito sa merkado, upang matiyak na mapoprotektahan ang kapakanan ng mamimili. —sa panulat ni Reabelle Medina

Isusumite na ng Land Transportation Franchising and Regulatory Board sa Department of Transportation ang rekomendasyon na pisong dagdag-pasahe sa mga pampasaherong jeepney.

Saklaw din sa panukala ang sampung pisong kada litro na fuel subsidy para sa mga kwalipikadong operator at tsuper.

Ayon kay LTFRB Chairman Vigor Mendoza II, alinsunod ito sa direktiba ng DOTr na pag-aralan ang dagdag na ayuda para sa transport sector.

Anila, suportado ng ahensya ang hiling ng mga transport group dahil sa inaasahang pagtaas ng presyo ng langis bunsod ng tensyon sa pagitan ng Estados Unidos at Iran.

Samantala, iginiit ng ahensya na maaari namang bawiin ang dagdag-pasahe sakaling bumaba ang presyo ng langis, ngunit kailangan muna itong dumaan sa public hearing.—sa panulat ni Reabelle Medina

Nasawi ang Philippine eagle sa Bukidnon, Sawaga-Dalwangan, habang sumasailalim sa rehabilitasyon sa Philippine Eagle Center.

Ayon sa Philippine Eagle Foundation, nagsagawa na ang PEF ng paunang necropsy kasabay ng histopathological examinations upang matukoy ang eksaktong naging sanhi ng pagkamatay nito.

Samantala, nagpaabot ng pakikiramay ang PEF sa lahat ng sumubaybay sa kalagayan ng agila, at nagpasalamat sa mga rescuer, komunidad, mga beterinaryo, at mga ahensyang tumulong sa pagliligtas at pag-aalaga rito.

Matatandaang nasagip ang batang babaeng agila noong July 3 sa Barangay Dalwangan, Malaybalay City, matapos itong matagpuang napapalibutan ng mahigit tatlumpung unggoy.—sa panulat ni Reabelle Medina

Alan Peter Cayetano claims Marcos rejected P10K aid after 2022 polls win

Iginiit ni Senador Alan Peter Cayetano na hindi inaprubahan ni Pangulong Ferdinand Marcos Jr. ang panukalang mamahagi siya ng tig-sasampung libong pisong ayuda sa mga kwalipikadong benepisyaryo matapos ang halalan noong 2022.

Ayon kay Sen. Cayetano, sapat ang pondo ng pamahalaan noon upang maipatupad ang naturang ayuda.

Kasunod nito, binatikos ng senador ang pinalawak na “Uplift Program” ng administrasyong Marcos at kinuwestiyon kung bakit ngayong 2026 lamang ipinatutupad ang mas malaking cash assistance.

Nagbitiw rin si Sen. Cayetano ng alegasyon na may nawaldas o ninakaw na pondo bago inilunsad ang programa.

Sa ngayon, wala pang pahayag ang Malacañang ukol sa alegasyon ng mambabatas.

Samantala, inanunsyo ng Department of Social Welfare and Development na magsisimula sa Lunes, July 20, ang pamamahagi ng ayuda sa ilalim ng pinalawak na Uplift Program.

Kaugnay nito, makatatanggap ng hanggang dalawang libong piso na dagdag-ayuda ang mga benepisyaryo ng 4P’s at Walang Gutom Program, habang ang mga pamilyang hindi kabilang.—sa panulat ni Reabelle Medina

Hindi nabubura ng kagustuhan ni Pangulong Ferdinand Marcos Jr. na makipagkasundo sa lahat, kabilang ang mga Duterte, ang umano’y grave threats na naging bahagi ng impeachment case laban kay Vice President Sara Duterte.

Paglilinaw ito ni Palace Press Officer Claire Castro, walang kaugnayan ang pahayag ng Pangulo tungkol sa reconciliation sa alegasyon ng pagbabanta.

Sinabi ni Castro, hindi lamang tungkol sa grave threats ang isyu sa impeachment, kundi pati na rin sa kakayahan at asal ng isang opisyal na humahawak ng mataas na posisyon sa pamahalaan.

Sinabi rin ni Castro na layunin ng impeachment trial na matukoy kung karapat-dapat mamuno ang isang lider para sa kapakanan ng taumbayan.

Nasa taumbayan, aniya, ang paghusga kung may kakayahan ang bise presidente na mamuno sa bansa sa hinaharap.

Hinamon ng Malacañang si Vice President Sara Duterte na patunayang wala siyang pagkakasala at walang itinatago patungkol sa pondo ng bayan.

Sagot ito ng Palasyo sa pahayag ng kampo ni Duterte na wala silang kinatatakutang mga dokumento pero tutol sa hiling na mabuksan ang financial records ng bise presidente dahil sa usaping legal.

Una nang ipinunto ng abogado ng depensa na ang impeachment ay makapangyarihang constitutional tool pero hindi magic wand.

Ayon naman kay Palace Press Officer Claire Castro, hindi magic wand ang impeachment pero ang magic word ay truth o katotohanan.

Binigyang-diin ni Castro na kung walang kinatatakutan, obligasyon ni V.P. Sara sa taumbayan na ipakita ang katotohanan.

Duda naman si Castro kung pipirma ng waiver ang bise presidente para sa kanyang financial records.

Mariing itinanggi nina Christy Ladao at Jocelyn Dela Cruz ang alegasyong tumanggap sila ng pera mula kay Charlie “Atong” Ang kapalit ng pag-atras sa kaso ng mga nawawalang sabungero.

Sa kanilang counter-affidavit na inihain sa Department of Justice, sinabi ng dalawa na walang katotohanan ang mga paratang, at iginiit na sila mismo ang kusang nakipag-ugnayan kay Attorney Caroline Cruz, abogado ni Ang, upang humingi ng payo at tulong kaugnay ng kanilang sitwasyon.

Ayon kina Ladao at Dela Cruz, nagkaroon ng pagpupulong kasama si Atty. Cruz noong Marso at Abril ngayong taon, ngunit walang naging usapan tungkol sa pag-atras sa kaso o pagpigil sa paghahanap ng hustisya.

Kinumpirma rin nila na may naibigay na maliit na tulong-pinansyal si Atty. Cruz sa ilang kaanak ng mga nawawalang sabungero, ngunit iginiit na kusang-loob na ayuda ang mga ito at hindi kapalit ng anumang pabor.

Samantala, mariin pa ring itinatanggi ng kampo ni Ang na nagkaroon ng anumang negosasyon o alok na areglo kaugnay ng naturang kaso.

Patuloy namang iniimbestigahan ng DOJ ang reklamong obstruction of justice na isinampa laban nina Ladao at Dela Cruz kontra Atty. Cruz at iba pang mga respondent.

Itinanggi ng Chinese Foreign Ministry na bahagi ng operasyon nito ang kumakalat na AI-generated na video kung saan inilarawan ang mga Pilipino bilang mga unggoy.

Ayon kay Chinese Foreign Ministry spokesperson Lin Jian, labas ito sa pagiging “act of the government.”

Gayunman, nananatili ang paninindigan ng China na walang kuwenta ang 2016 arbitral ruling tungkol sa South China Sea, at tinatawag pa itong illegal, null and void, at wala umanong katibayan.

Nabatid na nag-isyu na rin ang Department of Foreign Affairs ng diplomatic protest kaugnay sa naturang insidente dahil sa pagiging “racist” at “deeply offensive.”

Ipinaliwanag ni Dr. Andrew Vicencio ng Philippine Pediatric Society, na malaki ang safety profile ng deworming agents ginagamit sa mass deworming tulad ng mebendazole at albendazole. Ito ay kasunod masawi ang isang Grade 4 student matapos ang deworming activity.

Ayon kay Dr. Vicencio, libo-libong bata na ang nabibigyan ng naturang gamot ngunit bihira lamang umano ang naiulat na masamang reaksyon. Gayunman, sinabi niyang hindi pa matitiyak kung ang deworming mismo ang naging dahilan ng pagkasawi ng bata dahil kailangan munang suriin ang medical history nito.

Batay umano sa nakita niyang bahagi ng death certificate, nakasaad na septic shock ang primary cause of death, na maaaring dulot ng bacterial infection sa dugo, habang binanggit din ang posibleng central nervous system (CNS) infection gaya ng meningitis.

Paliwanag ni Vicencio, posibleng may dati nang karamdaman ang bata bago ito nabigyan ng pampapurga. Aniya, maaaring magdagdag ng stress sa katawan ang proseso lalo na sa mga batang may iniindang sakit, kaya karaniwang iniiwasan ang pagbibigay ng pampapapurga sa mga may karamdaman.