NATIONAL NEWS

Bukas si Defense Secretary Delfin Lorenzana sa alok ni Presidential Spokesperson Harry Roque na pangasiwaan ang pakikipag-usap sa pamunuan ng University of the Philippines.

Ito ay matapos na ipawalang bisa ng Defense department ang kasunduan nito sa unibersidad o ang tinawag na UP-DND 1989 accord.

Ayon kay Roque, sa kasalukuyan ay si Lorenzana pa lamang ang pumayag na pag-usapan ang isyu sa kanyang tanggapan habang wala pa aniyang tugon si UP President Danilo Concepion.

Samantala, iginiit ni Roque na walang pangangailangang umakyat pa sa lebel ni Pangulong Rodrigo Duterte ang naturang usapin at sapat nang si Lorenzana ng makipag-usap para rito.

Una nang sinabi ni Roque na handa siyang i-alok ang kanyang tanggapan, kung kinakailangan para pangasiwaan ang diskusyon sa pagitan ng DND at UP para maresolba ang mga isyung bumabalot sa nabanggit na kasunduan.

Nasaid na ang nakalaang pondo ng Department of Foreign Affairs (DFA) para sa passport revolving.

Ito mismo ang ibinunyag ni Foreign Affairs Secretary Teodoro Locsin Jr.

Sa kanyang Twitter account, sinabi ng kalihim na nagamit ang pondo para sa travel allowance, insurance at iba pa kung saan tiniyak naman ng kalihim na gagawan nila ng paraan para maibalik ang nasabing pondo gayong pumapalo na sa P388 million ang utang ng kagawaran sa Apo Production Unit—ang government owned firm na namamahala sa pag-imprenta ng passport.

Dahil dito sinabi ni Locsin na ipahihinto muna niya ang foreign travels, at conference trips kung saan makikipag-ugnayan din ang DFA kay DBM Sec. Wendel Avisado para sa realignment ng pondo.

Nananatiling buo ang tiwala ni Pangulong Rodrigo Duterte kay Bangko Sentral ng Pilipinas Governor Benjamin Diokno.

Ito ay matapos na masangkot ni Diokno sa iregularidad sa rollout ng National I.D. System kung saan aabot umano sa P1.75 billion ang halaga ng kontratang nalabag sa procurement process.

Ayon kay Presidential Spokesman Atty. Harry Roque, tiwala ang pangulo sa integridad ni Diokno, at bibigyan nila ng pagkakataon si Diokno na makapag paliwanag sa kinasasangkutan nitong isyu.

Matatandaang pinasasampahan ni Ricardo Fulgencio IV ng Stop Corruption Organization of the Philippines ng kasong graft sina Diokno at ilan pang opisyal ng BSP matapos nitong pahintulutan ang bilyung pisong halaga ng kontrata para sa implementasyon ng National I.D. System ng hindi man lang dumadaan sa public bidding.

Posibleng sa Narso umarangkada ang COVID-19 vaccination program ng pamahalaan.

Ito mismo ang inianunsyo ng Malacañang kasabay ng inaasahang pagdating ng bakunang likha ng Sinovac sa darating na Pebrero 20.

Ayon kay Presidential Spokesman Atty. Harry Roque, kakailanganin kasi ng hanggang 10 araw ng pamahalaan para inspeksyunin ang mga bakunang darating sa bansa.

Gayunman, sinabi ni Roque na umaasa silang may maturukan na ng COVID-19 vaccine sa darating na Pebrero gamit ang bakunang mag mumula sa Covax facility.

Hinimok ng Department of Agriculture (DA) ang mga backyard at malalaking commercial hog raisers o magbababoy na kumuha ng insurance package.

Ayon kay Agriculture Secretary William Dar, layun nitong matiyak na makababawi ang mga magbabababoy sakaling tamaan ng African Swine Fever (ASF) ang kanilang hog farms.

Aniya, matibay na seguridad at proteksyon sa investment ng isang mangangalakal ang maibibigay ng insurance.

Dagdag ni Dar, dapat na samantalahin ng mga hog raisers ang libreng livestock insurance na iniaalok ng Philippine Crop Insurance Corporation ng DA kung saan sakop ang ASF.

Muling inihihirit ng grupong Kilusang Mayo Uno (KMU) ang malakihang omento sa arawang sahod ng mga manggagawa.

Sa ikinasang kilos protesta ng KMU sa labas ng Mega Q-Mart sa Quezon City, nanawagan ang grupo namaitaas sa P750.00 ang daily minimum wage ng mga mangagawa sa buong bansa.

Ayon sa KMU, hindi na sapat ang kasalukuyang minimum wage rate ng mga manggagawa lalu na sa pagsirit ng presyo ng mga pangunahing bilihin sa gitna na rin ng nararanasang pandemiya.

Iginiit ng grupo, kakailanganin ng isang libong piso kada araw ng isang pamilyang may limang miyembro para makapamuhay ng maayos.

Nobyembre 2019 pa nakabinbin ang petisyon ng KMU para sa omento sa sahod sa Metro Manila wage board.

Hindi makatuwiran sa kasalukuyang sitwasyon ang hirit na omento sa arawang sahod ng isang grupo ng mga manggagawa.

Ito ang iginiit ng Employers Confederation of the Philippines (ECOP), dahil maging ang mga negosyo anila ay matindi ring naapektuhan ng COVID-19 pandemic.

Ayon kay ECOP Chairman Edgardo Lacson, hindi napapanahon at magdudulot lang ng mas maraming problema ang hirit ng mga labor groups na itaas sa P750.00 ang arawang minimum wage.

Ani lacson, pinakamatinding tinamaan ng crisis na dulot ng COVID-19 ang mga small and medium enterprises na bumubuo sa halos 99 na porsyento ng ekonomiya ng bansa.

Binigyang diin ni Lacson, maging ang malalaking negosyo at kumpanya tulad ng Makati Shangri-La ay naapektuhan at napilitang magsara, 10 buwan magmula nang magpatupad ng lockdown.