NATIONAL NEWS

Naniniwala ang Makabayan Bloc na hindi si dating House Speaker Martin Romualdez ang tunay na “big fish” sa flood control scandal.

Ito ang sinabi ni House Assistant Minority Leader at Kabataan Party-list Rep. Renee Co, na ang pag-aresto kay Romualdez ay simula pa lamang ng laban kontra kurapsyon.

Para kay Co, dapat na may managot sa mga miyembro ng Gabinete ni Pangulong Ferdinand Marcos Jr. na sangkot umano sa katiwalian.

Aniya, hindi nagsimula at hindi matatapos kay Romualdez ang laban kontra korapsyon.

Kinuwestiyon din ni Co ang umano’y pagbabalik ng pork barrel sa panukalang 2027 National Budget, sa kabila ng nagpapatuloy na corruption scandal.

Dismayado rin ang kongresista sa pagbabalik ng bilyun-bilyong pisong pondo para sa flood control projects, na malaking bahagi umano ay nakasentro sa DPWH Central Office. | via Geli Mendez (Patrol 30)

Igagalang ng House prosecution panel ang magiging desisyon ni Vice President Sara Duterte kung siya ay dadalo o hindi sa kaniyang impeachment trial.

Ito ang sinabi ni House Lead Prosecutor Gerville Luistro, sakaling hilingin na ng prosecution sa Senate impeachment court na ipasubpoena ang Bise Presidente.

Ayon kay Luistro, nakay VP Sara pa rin ang desisyon kung haharap siya sa pagdinig, lalo’t kinikilala ng prosecution ang kaniyang karapatan laban sa self-incrimination.

Ito’y matapos sabihin ni Private Prosecutor Atty. Lorna Kapunan na nais ng prosecution na iharap ang Bise Presidente sa witness stand upang tuluyang mabigyang linaw ang alegasyong nakapaloob sa Article 1 o maling paggamit ng confidential funds.

Iginiit ni Luistro na ang nagpapatuloy na impeachment trial ang tamang forum para sagutin ng Bise Presidente ang mga alegasyon laban sa kaniya.

Binanggit din niya na noong impeachment trial ni dating Supreme Court Chief Justice Renato Corona noong 2012, personal itong dumalo sa mga pagdinig.

Gayunpaman, nirerespeto aniya ng prosecution ang magiging desisyon ni VP Sara at mahalagang malaman kung ano ang mas matimbang sa kaniya—ang pananagutan sa ilalim ng Konstitusyon o ang paggamit ng karapatan laban sa self-incrimination. | via Geli Mendez (Patrol 30)

Kinumpirma ng Office of the Ombudsman na marami pang inihahandang kaso laban kay dating House Speaker Martin Romualdez kasunod ng plunder case na isinampa nitong Lunes, Setyembre 7.

Ayon kay Assistant Ombudsman Mico Clavano, natukoy ng mga imbestigador ang mga ebidensya hinggil sa umano’y 56 hanggang 57 billion pesos na ipinadala sa kongresista na nagmula umano sa mga flood control projects.

Ipinaliwanag ni Clavano na bagama’t 7.4 billion pesos na kickback pa lamang ang saklaw ng kasong isinampa, hindi ito kumakatawan sa kabuuang halagang sinisiyasat ng mga otoridad.

Aniya, ito muna ang inihain na kaso dahil ito pa lamang ang halagang may sapat na ebidensyang napatunayan ng mga imbestigador.

Samantala, pinag-aaralan din ng Ombudsman ang paghahain ng money laundering case sa pagpapatuloy ng imbestigasyon sa mga ari-arian na may kaugnayan sa mambabatas.—sa panulat ni Reianne Antiquina

Pumalo sa mahigit 3.14 million na Pilipino ang walang trabaho noong Hulyo.

Batay sa July Labor Force Survey ng Philippine Statistics Authority, sumipa sa 6% ang unemployment rate noong Hulyo mula sa 4.9% o katumbas ng 2.59 million na naitala noong Hunyo.

Ito na ang pinakamataas na bilang ng mga walang trabaho mula noong Disyembre 2021 na nakapagtala ng 6.6 na unemployment rate.

Samantala, bumaba naman sa 94% ang employment rate noong Hulyo, mula sa 95.1% noong Hunyo.—sa panulat ni Reianne Antiquina

Kinumpirma ni Interior Secretary Jonvic Remulla na itinuturing pa rin na “flight risk” si dating House Speaker Martin Romualdez sa kabila ng pagkakaaresto sa kanya, kagabi.

Ayon kay Secretary Remulla, dalawang private jet, tatlong helicopter at tatlong yate ang pag-aari ng kongresista na maaaring gamitin sa posibleng pagtakas.

Sa ngayon anya, bantay-sarado pa rin mga kapulisan ang kwarto ng kongresista sa Cardinal Santos Hospital ngunit ihiihirit nila sa Sandiganbayan na mailipat ang kustodiya ng mambabatas sa PNP General Hospital sa Kampo Crame.

Nahaharap si Romualdez sa kasong plunder kaugnay sa 7.4-billion pesos kickback scheme sa maanomalyang flood control projects.—sa panulat ni Reianne Antiquina

Naniniwala si dating Sandiganbayan Associate Justice Alex Quiroz na hindi dapat pagsabayin ang impeachment trial at ang kasong grave threats laban kay Vice President Sara Duterte.

Ayon kay Justice Quiroz, kabilang na ang kasong grave threats sa articles of impeachment kaya’t hindi maaaring maghain ng hiwalay na kaso habang nagpapatuloy ang paglilitis.

Samantala, nilinaw ni Justice Quiroz na hindi special treatment ang hindi pagkuha ng mugshot ng Bise Presidente dahil kusa itong sumuko.—sa panulat ni Reianne Antiquina

Itutuloy sa Lunes ng House prosecution panel ang pagtalakay sa Article 2 na tumutukoy sa unexplained wealth o hindi maipaliwanag na yaman ni Vice President Sara Duterte.

Sa kabila ito ng kahilingan ng depensa na bigyan sila ng dalawang linggo para mapag-aralan ang mga dokumentong may kaugnayan sa kaso.

Kaugnay nito, nangako ang prosecution na kanilang isusumite sa Senate impeachment court ang listahan ng mga testigong ihaharap sa susunod na linggo maging ang mga stipulations na nais nilang mapagkasunduan kasama ang depensa.

Layon aniya nito na hindi masayang ang araw o itinakdang schedule ng korte at magpatuloy ang impeachment trial.

Nabatid na kasama sa paghahandaan ng prosecution para sa Article II ang 1,800 na dokumento kung saan bukas, September 9 at 10 ay isasagawa ng magkabilang panig ang document marking sessions. | via Geli Mendez (Patrol 30)

Hihilingin ng House prosecution panel sa Senate impeachment court na ipasubpoena si Vice President Sara Duterte.

Ito’y para tuluyang mabigyang-linaw ang mga alegasyong nakapaloob sa Article 1 na tumutukoy sa maling paggamit ng confidential funds ng OVP at DepEd.

Sa Day 23 ng impeachment trial, sinabi ni private prosecutor Atty. Lorna Kapunan na hindi na maghahain ng karagdagang testigo ang prosecution para sa naturang artikulo.

Ayon kay Kapunan, ihahain nila ang pormal na kahilingan para sa pagdalo ng bise presidente sakaling matapos na nila ang presentasyon sa lahat o apat na Articles of Impeachment.

Nilinaw naman ni House Lead Prosecutor Gerville Luistro, wala pang pormal na manifestation para sa pagpapasubpoena sa bise presidente.

Binigyang-diin ni Luistro ang kahalagahan na makita ng Senate impeachment court at ng taumbayan kung paano sasagutin ni VP Sara ang mga alegasyong ibinabato laban sa kanya sa ilalim ng Konstitusyon. | via Geli Mendez (Patrol 30)