RONDA PROBINSYA

Dinala sa Barangay Matiompong Hall ang isang 13-anyos na Grade 8 student para sa intervention matapos umano itong mag-post ng banta ng shooting sa isang paaralan sa Lambayong, Sultan Kudarat.

Ayon sa Lambayong Municipal Police Station, ini-report sa kanila bandang 1:20 A.M. ngayong araw ng Lunes, Setyembre 21 ang mga post sa Facebook na umano’y naglalaman ng mga larawan ng baril at banta na target ang Kapingkong National High School.

Nakipag-ugnayan ang pulisya sa pamilya ng menor de edad at dinala siya, kasama ang kanyang guardian, sa Barangay hall. Isinailalim siya sa intervention ng Municipal Social Welfare and Development Office (MSWDO) para sa counseling at suporta.

Patuloy namang imo-monitor ng pulisya ang insidente bilang precautionary measure. Iniimbestigahan ito kaugnay ng umano’y paglabag sa Article 282 ng Revised Penal Code o Grave Threats, in relation to Republic Act 10175 o Cybercrime Prevention Act.

Kinilala ng Philippine Military Academy ang kabutihang ginawa ng isang sibilyan mula Baguio City na nanita ng kapwa manonood sa isang sinehan kamakailan.

Ayon sa PMA, hindi napigilan ni Russel Garcia Jaravata na komprontahin ang isang indibidwal sa loob ng sinehan na nambastos umano sa akademya habang ipinapalabas ang recruitment advertisement nito bago magsimula ang papanoorin sanang pelikula.

Sinubukan pang himukin ni Jaravata ang nambastos sa PMA na humingi ng paumanhin bago iniulat ang insidente sa mga otoridad.

Gayunman, hindi na idinetalye ng akademya ang insidente.

Pinuri ng PMA ang aksyong ginawa ni Jaravata dahil napansin nito ang kawalan ng respeto sa institusyon, at maging sa buong Armed Forces of the Philippines.

Dahil dito, personal na nagpasalamat si PMA Superintendent Lt. Gen. Michael Logico kay Jaravata, at ibinigay niya ang kanyang kauna-unahang Superintendent’s Challenge Coin sa nasbing sibilyan. | Sa panulat ni Anjo Riñon

Nasawi ang isang 20-anyos na babaeng estudyante matapos umanong sakalin ng kaniyang 19-anyos na pamangkin kasunod ng kanilang mainitang pagtatalo sa Calamba City, Laguna.

Natagpuang wala nang buhay ang biktima sa isang residence sa Alihan Street, Purok 3, Barangay 2, bandang 6 P.M. noong Setyembre 13, 2026.

Sa isinagawang follow-up investigation ng Calamba City Police Station, natukoy ang 19-anyos na lalaki na huling nakasama ng biktima. Bandang 1:20 A.M. noong Setyembre 14, kusang isinuko ng mga magulang ang suspek sa pulisya.

Sa pamamagitan ng Extra-Judicial Confession, umamin umano ang suspek sa kaniyang partisipasyon sa insidente. Ayon sa kaniyang salaysay, nauwi sa pisikal na komprontasyon ang kanilang pagtatalo at ni-restrain umano niya ang biktima gamit ang “choke hold.”

Batay sa initial autopsy findings ng Regional Forensic Unit-4A, asphyxia resulting from manual strangulation ang ikinamatay ng biktima.

Dahil sa mga nakalap na impormasyon at ebidensya, itinuring ng pulisya ang insidente bilang homicide. Nasa kustodiya na ng Calamba Police ang suspek.

Isinampa na rin noong Setyembre 14 ang homicide case sa pamamagitan ng inquest proceedings sa Office of the Prosecutor sa Calamba City, Laguna.

Isang taxi driver ang ipinapatawag ng Land Transportation Office Western Visayas matapos itong umihi umano sa gitna ng daan sa Iloilo City.

Ayon sa LTO-6, ipinapatawag nito ang driver matapos mag-viral sa social media ang video kung saan umihi sa gilid ng taxi ang driver habang dumadaan ang ibang sasakyan sa highway na bahagi ng Barangay San Rafael sa Mandurriao District.

Nagpalabas na ng show cause order ang LTO-6 sa driver at operator ng taxi, at kailangan nilang magsumite ng paliwanag kung bakit hindi sila dapat kasuhan.

Bibigyan ang taxi operator at driver na sangkot sa insidente ng limang working days mula sa pagtanggap ng show cause order upang magpaliwanag.—sa panulat ni Anjo Riñon

Nasawi ang 21-anyos na nursing student na nakatakdang magtapos matapos itong sakalin ng kaniyang 27-anyos na pinsan sa San Antonio, Nueva Ecija.

Ayon sa pulisya, nagtungo ang suspek sa bahay ng biktimang si Ann Pauline Fajardo noong Setyembre 6 upang manghiram ng ₱5,000. Nang tumanggi ang dalaga, nauwi umano sa pagtatalo ang kanilang pag-uusap bago ito sinaktan at sinakal.

Matapos ang insidente, tinangka umano ng suspek na palabasing nagpakamatay ang biktima sa pamamagitan ng pagtali ng kumot sa leeg nito at pagkakabit sa kama. Kinuha rin umano nito ang iPhone 16 Plus ng dalaga bago tumakas.

Una umanong inakala ng mga awtoridad na suicide ang nangyari, ngunit nagduda sila matapos makita ang mga marka ng pananakit sa katawan ng biktima. Sa isinagawang autopsy, lumabas na asphyxia by strangulation ang sanhi ng kaniyang pagkamatay.

Natunton umano ng mga pulis ang suspek gamit ang “Find My” feature ng cellphone ng biktima. Sa kaniyang extrajudicial affidavit confession, inamin umano nito ang pananagutan sa pagkamatay ng dalaga.

Nahaharap ngayon sa kasong murder ang suspek.

Kinondena naman ng Wesleyan University-Philippines ang insidente at inilarawan si Fajardo bilang isang promising future nurse, mabuting kaibigan at anak.

BOTOLAN, Zambales — Tuloy-tuloy ang pagbibigay ng tulong ng Pamahalaang Panlalawigan ng Zambales sa mga residenteng naapektuhan ng malalakas na ulan dulot ng Habagat.

Ngayong araw, Setyembre 6, 2026, nagsagawa ng relief operation sa silangang bahagi ng Botolan upang matulungan ang mga kababayang lubhang naapektuhan ng walang tigil na pag-ulan.

Dahil sa masamang panahon, maraming residente, lalo na ang mga magsasaka, ang lubos na naapektuhan. Pero ayon kay Governor Hermogenes Jun Ebdane Jr., hindi nila ito hahayaang mag-isa.

Mahigit 2,282 pamilya ang makakatanggap ng food packs mula sa provincial government. Kabilang sa mga target na barangay ang:

• Brgy. Villar
• Brgy. Moraza
• Brgy. Belbel
• Brgy. Burgos
• Brgy. Poonbato
• Brgy. Maguisguis
• Brgy. Palis
• Brgy. Nacolcol
• Brgy. Cabatuan

Katuwang ng pamahalaang panlalawigan sa paghahatid ng tulong sina PDRRMO Rolex E. Estella, Engr. Julio Arbolante, MDRRMO Andy Divino, MAJ Michael Vincent F. Perandos, PAF, LTC Mark Anthony B. Ruelos, PA, mga kawani ng Office of the Governor, at ang Office of Civil Defense sa pangunguna ni Sir Mike Dumaloa.

Ayon sa mga opisyal, patunay lamang ito na sa bawat pagsubok, patuloy ang suporta, pagkakaisa, at bayanihan ng mga Zambaleño upang matiyak na makarating ang tulong sa bawat nangangailangan.

Nagpapasalamat naman ang pamahalaan sa patuloy na pakikiisa at panalangin ng bawat isa para sa kaligtasan ng lahat. | mula sa panulat ni Jennifer Go

Kalaboso ang isang 19-anyos na college student matapos umanong magpakidnap sa sarili para makapanghingi ng P300,000 ransom sa kaniyang mga magulang sa Lipa, Batangas.

Ayon sa pulisya, nagpadala ang suspek ng mensahe mula sa kaniyang social media account at sinabing kailangan ng ransom para sa kaniyang paglaya.

Ngunit matapos i-backtrack ng mga awtoridad ang mga impormasyon, natunton ang estudyante sa isang hotel at nalamang walang naganap na kidnapping.

Umamin ang suspek at sinabi umanong gagamitin niya ang pera para bayaran ang kaniyang utang sa sugal.

Inihahanda na ang kaukulang reklamo laban sa estudyante.

#DWIZ #DWIZNews #DWIZ882AM

Narekober ng Philippine Coast Guard (PCG), local rescue team, at mga residente ang mga labi ng isang ama at kanyang anak na babae na nawawala matapos anurin ng malakas na agos sa Botolan, Zambales.

Ayon sa imbestigasyon, pauwi sila sakay ng kariton na hila-kalabaw noong Setyembre 1, 2026, nang biglang bumaha at tumaas ang agos mula sa bundok. Nasemplang ang kariton at kapwa naanod ang mag-ama pababa ng ilog.

Natagpuan ang bangkay ng ama noong Setyembre 2, at ng anak noong Setyembre 3—kapwa sa baybayin ng Botolan. Kinilala sila ng pamilya at naisagawa na ang mga hakbang para sa kanilang libing.

Nagpaabot ng pakikiramay ang PCG sa pamilya at pinasalamatan ang suporta ng komunidad sa buong operasyon ng paghahanap. | via Jennifer Go (DWIZ Correspondent)

#DWIZ #DWIZNews #DWIZ882AM

Sumasailalim ngayon sa social welfare intervention ang isang high school student matapos umanong bantaan na sasaksakin at babarilin ang kaklase nito sa isang messaging app sa Cebu City.

Lumabas sa imbestigasyon ng pulisya, na nag-private message ang suspek sa biktima na naglalaman ng mga pagbabanta, kalakip ang larawan ng isang handgun.

Inamin naman ng suspek ang pagpapadala ng mensahe sa biktima dahil umano sa galit ngunit itinanggi nito na pag-aari niya ang baril at iginiit na larawan lamang umano ito na nakuha niya sa internet.

Agad namang itinurnover ng mga awtoridad ang menor de edad sa Department of Social Welfare and Development (DSWD) para sa tamang disposisyon.

Samantala, nanawagan ang pulisya sa publiko partikular na sa mga kabataan na ang pagbabanta kahit sa social media o paggamit ng pekeng armas ay may kaukulang pananagutan.