RONDA PROBINSYA

Nasawi ang isang 21-anyos na college student na babae matapos umanong saksakin ng kanyang dating kasintahan sa loob ng isang boarding house sa Barangay Poblacion, Sibonga, Cebu.

Batay sa paunang imbestigasyon, nagtungo umano ang suspek sa boarding house ng biktima upang makipagbalikan. Iniwan muna sila ng kapatid ng biktima upang makapag-usap, ngunit nang tumanggi ang biktima na makipagbalikan, naganap ang pananaksak.

Nang bumalik ang kapatid ng biktima, nadatnan nito ang dalawa na kapwa nakahandusay sa loob ng kwarto.

Ayon sa pulisya, nagtamo ang biktima ng mga saksak sa leeg at dibdib at idineklarang patay sa pinangyarihan ng insidente.

Samantala, nagtamo rin ng mga saksak sa leeg at dibdib ang suspek na pinaniniwalaang siya rin ang may gawa sa sarili niyang mga sugat. Isinugod siya sa ospital at patuloy na ginagamot.

Patuloy ang imbestigasyon ng mga awtoridad upang matukoy ang kabuuang pangyayari at maisampa ang kaukulang kaso.

Nasamsam ang isang caliber .38 revolver na walang bala mula sa isang Grade 6 student na umano’y nagdala nito sa Pulang Bato Elementary School sa bayan ng Almeria, Biliran.

Ayon sa Almeria Municipal Police Station, ipinaalam ng school principal ang insidente matapos umanong madiskubre ang baril sa isinagawang school visitation noong Hulyo 29. Agad na kinumpiska ang baril at isinuko sa mga rumespondeng pulis.

Nakipag-ugnayan din ang pulisya sa Municipal Social Welfare and Development Office (MSWDO), barangay chairman, principal, at magulang ng bata. Matapos ang assessment at counseling, ibinalik ang mag-aaral sa pangangalaga ng kaniyang magulang alinsunod sa Juvenile Justice and Welfare Act, habang dinala ang baril sa Almeria MPS para sa kaukulang imbestigasyon at disposisyon.

Kasunod ng insidente, nagsagawa ang Women and Children Protection Desk ng briefing sa mga mag-aaral upang magbigay ng emotional support at hikayatin sila na agad ipagbigay-alam sa mga kinauukulan sakaling may mapansing banta sa loob ng paaralan.

Tiniyak ng Biliran Police Provincial Office na patuloy nitong paiigtingin ang Safer Schools Initiative sa pamamagitan ng regular na pagbisita sa mga paaralan, pakikipag-ugnayan sa mga administrador, lokal na opisyal, at iba pang stakeholder upang maiwasan ang kahalintulad na insidente.

Patay ang isang 52-anyos na guro matapos umanong suntukin ng isang 19-anyos na lalaki sa Brgy. Mabilo, New Washington, Aklan.

Ayon sa imbestigasyon ng mga awtoridad, magkasama sa isang pagtitipon ang dalawa nang magkaroon ng hindi pagkakaunawaan.

Paalis na sana ang biktima sakay ng kaniyang motorsiklo nang bigla umano itong suntukin ng suspek, dahilan upang matumba at mawalan ng malay.

Agad na isinugod sa ospital ang biktima ngunit binawian din ng buhay habang ginagamot.

Samantala, hawak na ng pulisya ang suspek.

Iniimbestigahan na ng DEPED Schools Division Office ng Davao de Oro ang panununtok ng dalawang estudyante sa isang guro sa isang paaralan sa Maco, Davao de Oro.

Ayon sa salaysay ng biktima sa mga awtoridad, pinagsabihan umano niya ang isang lalaking estudyante dahil may suot itong hikaw, na ipinagbabawal sa loob ng paaralan.

Nagalit umano ang estudyante at tinangkang suntukin ang guro ngunit napigilan ng ito ng ibang pang mga estudyante.

Ilang sandali lang, natumba ang guro matapo suntukin ng isang pang estudyante mula sa likuran.

Nabatid na kapatid pala ng estudyanteng una niyang pinagsabihan.

Dito na lumala ang sitwasyon, kung saan pinagtulungang bugbugin ng dalawa ang guro.

Arestado ang 18-anyos na binatilyong itinuturong nasa likod ng online bomb threats sa mga paaralan sa San Ildefonso, Bulacan.

Batay sa ulat ng Police Regional Office 3, naaresto ang suspek noong Hulyo 21 sa Barangay Hilera, Jaen, Nueva Ecija matapos ang pinagsamang operasyon ng San Ildefonso, Talavera, at Jaen Municipal Police Stations.

Narekober mula sa suspek ang isang cellphone na pinaniniwalaang ginamit sa pagpapakalat ng mga banta online noong Hulyo 20 at 21.

Nasa kustodiya na ngayon ng San Ildefonso Municipal Police Station ang suspek. Isasailalim naman sa technical at forensic examination ang cellphone bilang bahagi ng patuloy na imbestigasyon.

Nahaharap ang suspek sa kasong paglabag sa Presidential Decree No. 1727 o Anti-Bomb Joke Law at Article 282 ng Revised Penal Code, kaugnay ng Section 6 ng Cybercrime Prevention Act. | Sa panulat ni Reabelle Medina

Kalaboso ang isang 42-anyos na lalaking vendor matapos masakote sa ikinasang buy-bust operation sa City Baywalk, Brgy. Bagong Pag-asa, Puerto Princesa City, Palawan dahil sa pagbebenta ng shabu.

Nagsilbing poseur-buyer ang isang operatiba at matagumpay na nakabili mula sa suspek ng isang sachet na naglalaman ng hinihinalang shabu na nakasilid sa heat-sealed transparent plastic sachet kapalit ng ₱1,000 marked money. Tinatayang 0.67 gramo ang timbang ng nakumpiskang hinihinalang shabu na may halagang nasa ₱4,556 batay sa standard drug price.

Nasa kustodiya na ng Puerto Princesa City Police Office ang suspek habang inihahanda ang pagsasampa ng kasong paglabag sa Section 5, Article II ng Republic Act 9165 o Comprehensive Dangerous Drugs Act of 2002. Ang hinihinalang droga ay isusumite para sa pagsusuri sa forensic unit.

Hawak na ng Philippine National Police ang tatlo sa apat na suspek sa pagpatay sa American marine biologist na si Dr. Kent Carpenter, na binaril sa loob ng kanyang bahay sa Sibulan, Negros Oriental.

Ayon kay PNP Public Information Chief, Col. Allan Rae Co, naaresto kagabi sa Sibulan ang dalawa na kinilalang sina alyas “Mo” at “JF” na nanggahasa umano sa live-in partner ng biktima.

Sunod namang natimbog ang isa pang suspek na si alyas “CD” na nagsilbi aniyang lookout.

Patuloy na tinutunton ng PNP ang isa pang suspek sa krimen, pero hindi pa nila matukoy ang naging partisipasyon nito.

Nilinaw naman ng Pambansang Pulisya na nananatiling robbery ang nakikitang motibo sa pamamaslang.—sa panulat ni Reabelle Medina

Arestado ang isang 21-anyos na lalaki matapos tangkain nitong sunugin ang bahay ng journalist na si Marlon Ramos ng Bilyonaryo News Channel sa Santa Rosa City, Laguna.

Pasado alas dos kaninang madaling araw nang magising si Ramos matapos makarinig ng pagsabog at nang kanyang silipin ay may apoy na sa kusina kaya’t agad niyang pinalabas ng bahay ang kanyang pamilya.

Narekober sa kusina ang galon ng gas at martilyo habang naaresto ang suspek ng mga rumespondeng security guard sa Villa Caceres Subdivision, sa Barangay Balibago.

Kinumpirma ni Ramos na kaibigan at kaklase ng kanyang bunso ang suspek na itinuring niya ring anak, pero tila nawala ito sa tamang pag-iisip kanina at kalauna’y umaming binu-bully umano ng kanyang anak.

Nakuwento na rin aniya ng kanyang anak na iniiwasan nilang magka-klase ang suspek dahil kakaiba na umano ang pag-iisip at sinasabi nito.—sa panulat ni Reabelle Medina

Patay ang isang American marine biologist matapos umano’y barilin at pagnakawan ng tatlong kawatan sa loob ng kaniyang bahay sa Sibulan, Negros Oriental.

Kinilala ng mga awtoridad ang biktima na si Dr. Kent Carpenter, 73-anyos.

Ayon sa Sibulan Police, nanonood ng TV ang biktima kasama ang kaniyang 34-anyos na partner nang puwersahang pasukin ng tatlong lalaking nakasuot ng bonnet ang kanilang bahay.

Agad na nasawi si Carpenter matapos barilin sa ulo, habang ang kaniyang partner ay umano’y pinagsamantalahan ng tatlong suspek, ayon sa pulisya.

Samantala, nagpapatuloy ang imbestigasyon at hot pursuit operation ng mga awtoridad upang matukoy ang motibo at madakip ang mga suspek.