Puso At Kalinga – Rotary Para Sa Calumpit!
Nagsagawa ng charity mission ang mga Rotary Club sa Metro Manila sa dalawang barangay ng Calumpit, Bulacan na nalubog sa baha, sa pangunguna ng Rotary Club of Jose Abad Santos Manila at Rotary Club of Manila Alpha.
Partikular na pinuntahan ng mga Rotarian ang Barangay San Miguel na mahigit dalawang buwan nang lubog sa baha at sa Sitio Nabong ng Barangay Meysulao, na nagmistulang “Water World” dahil mahigit dalawang taon nang lubog din sa baha.
Sa tulong ng Rotary Club of Calumpit, namigay ang grupo ng “Super Relief Packs”, bigas, at dishwashing liquid sa mga residente, kung saan unang pinuntahan ng mga ito ang Barangay San Miguel na maging ang Barangay Hall ay nalubog din sa baha.
Sunod na pinuntahan ng mga Rotarians ang Sitio Nabong sa Brgy. Meysulao, kung saan naantig ang kanilang puso dahil mahigit dalawang taon nang lubog sa baha ang buong komunidad.
Nakakalungkot ding makita ang mga naggagandahang bahay na inabandona na ng tuluyan dahil hindi na matirahan, habang ang iba naman ay gumawa ng paraan para mapataasan ang bahay dahil wala nang ibang matitirahan.
Kasamang tumulong din sa pamimigay ng ayuda ang DWIZ 882, Aliw Channel 23, ICP Elmer Espinosa ng Rotary Club of Mabini Manila, at iba pang mga Impact Creating Presidents, Past at Current Officers at mga Rotarians ng RI District 3810 sa ilalim ng pamumuno ni Governor Bing Carrion.
