Nakakuha ng positibong pananaw mula sa global investment bank na Morgan Stanley ang Globe Telecom Inc. habang papalapit ang inaabangang initial public offering o IPO ng Mynt, parent company ng GCash.
Sa pinakahuling research report nito, pinanatili ng Morgan Stanley ang positibong assessment sa Globe, kabilang ang potensiyal ng operasyon nito at paglago ng digital economy sa Pilipinas.
Napapanahon ang naturang assessment habang naghahanda ang Mynt sa IPO matapos aprubahan ng Philippine Stock Exchange ang aplikasyon nito para sa listing.
Patuloy namang kabilang ang telco sa pinakamalalaking minority shareholder ng Mynt, kasama ang Ayala Corp., na kapwa may pinagsamang 33-percent stake sa GCash parent company.
Dahil dito, maaaring makinabang ang kumpanya sa patuloy na paglago ng GCash at ng digital financial-services sector, kahit hiwalay na capital-markets transaction ang IPO.
Gayunman, hindi direktang ipinapahiwatig ng Morgan Stanley assessment kung ano ang magiging valuation o magiging resulta ng GCash IPO.
Inaasahang tututok ang mga investor sa magiging presyo ng shares, demand sa offering at pagtanggap ng merkado sa IPO habang papalapit ang pricing stage.
Samantala, nananatiling mahalagang bahagi ng growth strategy ng Globe ang pagpapalawak ng digital services, kasabay ng telecommunications business at investments nito sa digital infrastructure.
