SHOWBIZ

Inirekomenda ni Land Transportation Office (LTO) Chief Markus Lacanilao ang pagtanggal sa lisensya ng negosyanteng si Anthony Jude Violago, na driver ng supercar na nakapangalan sa aktor na si Derek Ramsay.

Ito’y matapos patawan ng show cause order sina Violago at Ramsay matapos mahuli si Violago na nagmamaneho ng isang Porsche 918 Spyder na may hindi awtorisadong plaka na may initials nito.

Kaugnay nito, nananatili sa kustodiya ng LTO ang supercar ni Ramsay alinsunod sa disposisyon ng Bureau of Customs matapos madiskubreng na-misdeclare umano ng aktor ang import records nito. | Sa panulat ni Anjo Riñon

Nagsalita na ang actor na si Janus Del Prado matapos siyang makatanggap ng mensahe na mistulang nagbabanta sa kanyang buhay dahil sa kanyang mga kritikal at mapanuksong post sa social media ukol sa pulitika.

Kilala si Janus sa pagbabahagi ng kanyang opinyon tungkol sa mga kontrobersyal na tao at isyu sa bansa.

Kamakailan, pinaulanan ng aktor ng biro ang pagkakapasa sa Bar Examinations noon ni singer-turned-lawyer Jimmy Bondoc.

Sa kanyang Facebook post, sinabi niya na, “Huwag kayo kabahan sa Bar Exams, si Jimmy Bondoc nga, nakapasa eh.”

Nakatanggap ito ng magkakaibang reaksyon, kabilang ang kritisismo mula sa ilang social media users at miyembro ng legal profession.

Matapos ang post, nakatanggap si Janus ng mensahe mula sa isang account na humamon sa kanya sa komprontasyon at nagmistulang nagbabanta ng karahasan.

Sa halip na urungan ang kanyang mga kritiko, sinagot niya ito sa pamamagitan ng panibagong mapanuksong post at tinugunan din ang mga lawyer na nainis sa kanyang biro.

Samantala, nagpatuloy ang debate online tungkol sa hangganan ng biro, kritisismo, at pananalita sa social media.

Giit ng aktor, pinahalagahan niya ang mga lawyer friends na nakakaunawa sa kanyang humor, bagama’t may ilan din sa kanila na nagsabing nakasakit ang paraan ng pagkakapresenta ng naturang biro. | Sa panulat ni Reabelle Medina

Kumalas na ang aktres at Quezon City Councilor na si Aiko Melendez sa manager na si Ogie Diaz matapos ang tatlong taong partnership.

Gayunman, nilinaw ng aktres na nananatili silang magkaibigan.

Naging usap-usapan ang pagkalas ni Aiko dahil kilala ito bilang supporter ni Vice President Sara Duterte habang si Ogie naman ay isang Kakampink.

Sa isang panayam, ipinaliwanag ni Ogie na naging maayos ang pagpapaalam sa kanya ng aktres, at iginiit na normal lamang ito sa isang manager-talent relationship, ang importante anya ay ang pagiging magkaibigan.

Aniya, naiintindihan niya ang naging desisyon ng aktres lalo’t 80% na ng buhay ni Aiko ay nakatuon sa kanyang political career, habang 20% na lamang ang natitira para sa pagiging artista.

Tiniyak naman ng talent manager na naririyan lamang siya kung kailanganin ng tulong ni Aiko bilang isang kaibigan.  l mula sa panulat ni Reianne Antiquina

Pinipili ng aktres na si Bea Alonzo na panatilihing pribado ang kanyang buhay may-asawa, isang buwan matapos ang kanilang intimate civil wedding ng businessman na si Vincent Co.

Ayon kay Bea, nais niyang protektahan ang personal na buhay na binubuo nila ni Vincent bilang mag-asawa.

Aniya, hindi niya naramdaman na kailangang ibahagi agad sa publiko ang kanilang kasal dahil nais niya na maging para sa kanilang dalawa lamang ang mahalagang sandali na iyon.

Bagaman nauunawaan ni Bea ang interes ng publiko sa kanyang personal na buhay, hindi aniya nangangahulugang kailangan niyang ibahagi ang bawat detalye ng kanilang pagsasama.  l mula sa panulat ni Reianne Antiquina

Nanindigan ang aktor na si Dennis Trillo na 100% loyal siya sa asawang si Jennylyn Mercado.

Sa isang panayam, sinabi ng aktor na kailanman ay hindi sila nagkaroon ng problema pagdating sa usapin ng loyalty.

Iginiit pa ni Dennis na marami na siyang responsibilidad bilang artista, ama, at mapagmahal na asawa, kaya ayaw na niya nang dagdagan pa ang kanyang mga problema sa pamamagitan ng pangangaliwa.

Binigyang-diin ni Dennis na nais niyang maging panatag at secure si Jennylyn sa kanilang relasyon, kaya sinisiguro niyang walang puwang para sa anumang pagseselos o pagdududa sa isip nito.  l mula sa panulat ni Reianne Antiquina

Naniniwala ang aktres na si Bianca Umali na dapat manaig ang pagpapatawad kaysa galit matapos aminin ng kanyang boyfriend na si Ruru Madrid na minsan na itong nag-cheat sa kanilang relasyon.

Sa halip na magkimkim ng sama ng loob, sinabi ni Bianca na naniniwala siya sa pagbibigay ng ikalawang pagkakataon lalo na sa mga taong taos-pusong umaamin sa kanilang pagkakamali, nagsisisi, at nagsisikap na magbago.

Para kay Bianca, dapat patuloy pa ring piliin ng mga tao ang kabutihan at pang-unawa, sa kabila ng sakit at pagkadismayang maaari nilang maranasan sa kanilang mga relasyon maging ito man ay sa mga kaibigan, kapamilya, o kasintahan.

Hinimok din ng aktres ang publiko na subukang unawain ang mahihirap na sitwasyon sa halip na hayaang manaig ang galit at sama ng loob sa kanilang puso.

Anya, wala nang mas tama pa sa pagpapatawad.  l mula sa panulat ni Reianne Antiquina

Tanggap na tanggap umano ng pamilya ni Pankie Capistrano ang aktres na si Andrea Brillantes.

Matatandaang kinumpirma ni Andrea ang relasyon nila ng non-showbiz boyfriend noong January.

Sa isang panayam, inilarawan ng aktres na “very tight” ang relasyon nito sa pamilya ng kanyang boyfriend.

Ayon kay Andrea, ipinakilala na siya ni Pankie sa kanyang parents sa Lucban, Quezon noong Holy Week.

Nagpasalamat naman ang aktres sa kanyang boyfriend dahil sa pagtanggap sa kanyang trabaho bilang isang artista, at iginiit na hindi sila umabot na pinagbabawalan siya nito sa mga gagawin niya sa isang project. l mula sa panulat ni Reianne Antiquina

Usap-usapan sa social media ang umano’y hiwalayan ng mga aktor na sina Elijah Canlas at Miles Ocampo.

Lalo pang uminit ang isyu matapos aminin ni Elijah sa isang panayam na may dinaranas siyang problema sa personal na buhay at hindi siya lubusang masaya sa kasalukuyan.

Gayunman, hindi nilinaw ni Elijah ang tunay na estado ng kanilang relasyon.

Sa kasalukuyan ay nagpapaka-busy muna siya sa kanyang trabaho kung saan nakatakda siyang lumipad patungong Finland para sa isang proyekto.

Sa ngayon, wala ring pahayag si Miles tungkol sa espekulasyon. l mula sa panulat ni Reianne Antiquina

Nilinaw ng pamunuan ng “It’s Showtime!” na hindi suspendido sa palabas ang host na si Vice Ganda.

Ito’y matapos ipatawag ng MTRCB o Movie and Television Review and Classification Board ang producers ng naturang palabas dahil sa “racism” complaints na inihain laban sa kanila.

Ayon sa “It’s Showtime!” executives, nasa bakasyon lamang si Vice.

Gayunman, hindi nito nilinaw kung kailan magbabalik ang komedyante sa programa.

Nag-ugat ang espekulasyon dahil sa pag-absent ng komedyante mula pa noong July twenty-nine.   l mula sa panulat ni Reianne Antiquina