SHOWBIZ

Humingi ng paumanhin ang dating aktor at nakababatang kapatid ni Jericho Rosales na si Jeremiah Rosales matapos maiulat na nawala nitong Hunyo.

Matatandaang iniulat noong Hunyo na nawala si Jeremiah, ngunit kalaunan ay kinumpirma ni Jericho na ligtas ang kaniyang kapatid at kasama na ng kanilang mga kaanak sa Bicol.

Ayon kay Jeremiah, tumakas siya patungong Bicol nang matunugan niya na nagpa-plano ang kaniyang pamilya na ipasok muli siya sa isang rehabilitation center para gamutin ang kaniyang drug addiction.

Anya, nagpasya siyang lumayo upang pagbutihin ang kaniyang sarili para sa kapakanan ng kaniyang pamilya.

Humingi rin siya ng tawad sa kaniyang pamilya, lalo na sa kanyang kuya na si Jericho, at nagpasalamat sa patuloy na pagsuporta at pagmamahal sa kanya sa kabila ng kanyang pinagdaanan.

Sa ngayon ay bumalik na si Jeremiah sa kaniyang asawa at mga anak sa Antipolo habang inaayos ang kanilang relasyon.  l mula sa panulat ni Reianne Antiquina

Inamin ng aktor na si Ruru Madrid na minsan na siyang nangaliwa sa kaniyang long-time girlfriend na si Bianca Umali ilang taon na ang nakalilipas.

Sa isang panayam sa “Fast Talk with Boy Abunda,” tinanong si Ruru tungkol sa kaniyang pahayag na “Anyone can still change and we will prove it.”

Ayon sa aktor, nagkahiwalay sila ng walong buwan ngunit nagkabalikan din at hanggang ngayon ay pinatutunayan nila na kayang magbago ng isang cheater.

Aniya, ang karanasang iyon ang nagmulat sa kaniya sa tunay na halaga ni Bianca sa kaniyang buhay.

Dagdag pa ng aktor, ang pagtataksil ay isang pagpili, ngunit naniniwala siyang may kakayahang magbago ang sinuman kung taos-puso ang pagsisisi at handang ituwid ang nagawang pagkakamali.

Sa kasalukuyan, matatag pa rin ang relasyon nina Ruru at Bianca matapos ang walong taon.   l mula sa panulat ni Reianne Antiquina

Pumanaw na kahapon sa edad na 65 ang beteranong showbiz columnist na si Jobert Sucaldito.

Inanunsyo ang malungkot na balita sa kanyang podcast page na OOTD Jobert at Chaps Channel.

Ayon sa pamilya ng journalist, isinugod siya sa ospital bandang 9:45 ng umaga kahapon, ngunit hindi na siya naisalba ng mga doktor.

Sa kasalukuyan, hinihintay pa ang opisyal na resulta upang matukoy ang sanhi ng pagpanaw ni Sucaldito.

Humihingi naman ng panalangin at paggalang sa kanilang privacy ang pamilya ng namayapang mamamahayag sa gitna ng kanilang pagdadalamhati.

Nakilala si Sucaldito bilang isa sa mga batikang showbiz columnist sa bansa sa pamamagitan ng kanyang panunungkulan sa Bandera at DZMM.    l mula sa panulat ni Reianne Antiquina

Kinoronahan bilang Miss Supranational 2026 si Ma. Katrina Llegado, labintatlong taon matapos ang huling tagumpay ng bansa mula sa pagkapanalo ni Mutya Datul noong 2013.

Tinalo ni Katrina ang animnapu’t anim na kandidata mula sa iba’t ibang bansa.

Nagpakitang-gilas si Katrina sa iba’t ibang bahagi ng kompetisyon, kabilang ang national costume na hango sa gumamela, swimsuit, evening gown, at question-and-answer portion.

Sa final round, ibinahagi ng beauty queen ang mensahe ng pagtanggap sa sariling pagkatao at ang pagsisikap na maging pinakamahusay na bersyon ng kanyang sarili sa halip na sumunod sa inaasahan ng iba.

Matatandaang naging fifth runner-up din si Katrina sa Reina Hispanoamericana noong 2020.  l mula sa panulat ni Reianne Antiquina

Nasasaktan ako roon sa sinasabi na bobo si Robin. I hate that word. Kumbaga, wala namang bobong tao. Tsaka, very insulting. Sa mga basher, ‘wag naman tayong umabot sa gano’n kababa. Itaas naman natin ang quality ng pagsasalita natin. May pinag-aralan naman ang mga Pilipino.

Dinepensahan ng komedyante na si Dennis Padilla si Senador Robin Padilla mula sa mga kritiko nitong nagsasabing isang “bobo” umano ang senador.

Inihayag ni Dennis na hindi niya nagugustuhan ang mga pananalitang tumatawag na “bobo” kay Sen. Robin Padilla, at aminado siyang nasasaktan siya sa mga ito.

Aniya, sa kabila ng mga puna at pambabatikos na natatanggap ng senador, patuloy pa rin itong tinatangkilik ng maraming Pilipino, na aniya’y makikita sa mga preference survey para sa 2028 national elections.

“I’m sure, ‘yung mga comments ng mga taong iyan, tandaan n’yo ito, babalik sa inyo ‘yan. God will prove you wrong,” dagdag pa niya.

Kinumpirma ng Star Magic na itutuloy pa rin ng aktres na si Kim Chiu ang kasong qualified theft na inihain laban sa kanyang kapatid na si Lakambini Chiu.

Kasunod ito ng muling pagkalat ng lumang interview ni Kim noong 2023 kung saan pinag-usapan ang kanyang kapatid.

Ayon sa Star Magic, nananatiling determinado si Kim na ituloy ang kaso at nilinaw na sinasalamin lamang ng lumang interview ang sitwasyon ng kanilang samahan noong panahon na iyon ngunit hindi na ito angkop sa isyu ngayon.

Sa kabila ng pagiging magkapatid, iginiit ng kampo ng aktres na ang usapin ay tungkol sa pananagutan at tamang proseso ng batas.

Matatandaang nagsampa si Kim ng kasong qualified theft laban sa kapatid na si Lakambini noong 2025 matapos matuklasan ang hindi maipaliwanag na mga anomalya sa pananalapi ng kanilang negosyo.  l mula sa panulat ni Reianne Antiquina

Walang nakikitang problema ang Actor at Leyte Representative Richard Gomez kung sakaling mauwi sa pag-iibigan ang ugnayan ng kanyang anak na si Juliana Gomez at basketball player na si Ricci Rivero.

Ayon sa kongresista, nasa tamang edad na si Juliana at may kakayahan na itong magpasya para sa sarili, lalo na pagdating sa usaping pag-ibig.

Ang tanging request lang aniya ni Richard ay kung may manliligaw sa kanyang anak ay dapat sa kanilang bahay ito gawin.

Matatandaang naging usap-usapan sina Juliana at Ricci matapos silang mamataang magkasama sa ilang pagkakataon.

Gayunman, wala pang pormal na kumpirmasyon ang dalawa kung ano ang tunay na estado ng kanilang relasyon.  l mula sa panulat ni Reianne Antiquina

Kinumpirma ng K-Pop group na BTS na hindi sila magsusumite ng entry para sa Grammy Awards na nakatakdang ganapin sa Pebrero.

Kasunod ito ng anunsyo ng Recording Academy na magdadagdag sila ng mga bagong kategorya tulad ng Best Asian Pop Music Performance.

Paliwanag ng k-pop icons, nais nilang kilalanin at mahalin ang musika batay sa tunay nitong halaga, sa halip na paghiwa-hiwalayin ayon sa rehiyon o wika.

Pinasalamatan naman ng BTS ang kanilang fans sa pag-unawa sa kanilang desisyon at patuloy na pagsuporta sa kanila.  l mula sa panulat ni Reianne Antiquina

Inamin ng actor-singer na si James Reid na nawalan siya ng isangdaan limampung milyong piso nang maloko siya ng kanyang business partner na si Jeffrey Oh sa record label niya na Careless Music.

Ayon kay James, katumbas na ito ng sampung taong pagtatrabaho niya sa industriya.

Bukod dito, nasaktan din aniya ang aktor dahil hindi niya akalain na magagawa ito ni Jeffrey na aniya’y itinuring niyang tunay na kaibigan.

Dagdag pa ni James, naging sandalan niya ang kanyang girlfriend na si Issa Pressman na tumulong sa kanya na makabangon muli.  l mula sa panulat ni Reianne Antiquina

Naging mas simple ang pagdaraos ng SONA o State of the Nation Address ngayong taon alinsunod sa direktiba ni Pangulong Ferdinand Marcos Junior.

Bagaman walang red carpet, hindi pa rin nagpahuli sa fashion ang mga panauhin.

Karamihan sa mga dumalo ang nagsuot ng simple ngunit elegante at makabagong filipiniana, habang ang ilan ay ginamit pa ang kanilang kasuotan upang isulong ang mga adbokasiya gaya ng pangangalaga sa kalikasan, karapatan ng kababaihan, at pagtataguyod sa likhang pilipino.

Kabilang sa mga agaw-pansin sina First Lady Liza Araneta Marcos, Senador Risa Hontiveros, DOJ Undersecretary Margarita Gutierrez, ang asawa ni Senator Juan Miguel Zubiri na si Audrey Zubiri at iba pa.  | mula sa panulat ni Reianne Antiquina