Iginiit ng House prosecution panel na ebidensya, at hindi political survey, ang dapat maging batayan ng desisyon sa impeachment trial laban kay Vice President Sara Duterte.
Sa kabila ito ng mataas na resulta na nakuha ni VP Sara sa kamakailang Pulse Asia survey tungkol sa mga nais ng publiko na maging susunod na pangulo ng bansa.
Ayon kay prosecution adviser at trial spokesperson Robert Ace Barbers at House prosecutor Terry Ridon, tungkulin ng prosecution na ilahad ang mga katotohanan at patunayan ang mga alegasyon laban sa Bise Presidente.
Kumpiyansa si Barbers na matibay, mabigat at kapani-paniwala ang kanilang mga ebidensya laban kay VP Sara.
Para kay Barbers, hindi dapat diktahan ng 1,500 respondent ng survey ang magiging desisyon ng mga senator-judge.
Binigyang-diin naman ni Ridon na magkaiba ang halalan at impeachment trial, kung saan ebidensya ang dapat timbangin ng mga hukom.
Aniya, nananatiling nakatuon ang prosecution sa pagpapapanagot sa Bise Presidente kaugnay ng mga alegasyon ng hindi maipaliwanag na yaman, pagbabanta, at maling paggamit ng confidential funds.
Sa kasalukuyan, nakumpleto na ng prosecution ang paglalahad ng mga ebidensya sa ilalim ng Article II, matapos ang testimonya ni forensic financial analyst Atty. Alexander Cabrera.| Sa panulat ni Geli Mendez 
