Iimbestigahan na ng National Bureau of Investigation (NBI) ang mga host ng podcast na “Machong Chismisan” at posibleng kasuhan dahil sa panlalait sa kapansanan ng anak ni Kris Aquino na si Josh.
Ayon kay NBI Director Melvin Matibag, inatasan na niya ang Cybercrime Division at Special Action Unit na imbestigahan ang mga sangkot at maghain ng naaangkop na kaso alinsunod sa batas.
Binigyang-diin ni Matibag na tungkulin ng NBI na itaguyod ang katarungan at ipagtanggol ang dignidad ng mga taong may kapansanan.
Nagmula ang isyu sa episode ng Machong Chismisan na “Ang Pagbabalik ni Kris Aquino,” na ipinost nitong October 5, kung saan nagbitaw ang mga host ng mga mapanlait na komento tungkol kay Josh at sa kaniyang kapansanan.
Matapos umani ng batikos mula sa mga celebrity, mambabatas at PWDs advocates, tinanggal na ang episode at humingi ng paumanhin ang podcast at ilang host nito.
Samantala, inanunsyo ng Pod Network na pormal na nitong tinapos ang kontrata sa “Machong Chismisan.” | Sa panulat ni Jordan Gutierrez
