Ayon kay Luistro, tulad ng mga private prosecutor, pro bono o wala ring bayad ang serbisyo ni Cabrera bilang huling testigo ng prosecution panel sa impeachment trial.
Batay sa report ni Cabrera, lumabas na aabot sa P817.9 million ang umano’y hindi idineklarang yaman ng mag-asawang Duterte-Carpio sa kanilang Statement of Assets, Liabilities and Net Worth o SALN.
Paliwanag ni Luistro, ang impeachment court ang nagbigay ng access sa prosecution at depensa sa mga bank at tax records, gayundin sa ulat ng Anti-Money Laundering Council o AMLC, para maisagawa ang pagsusuri sa mga ebidensya.
Kinilala rin ni Luistro ang malawak na karanasan ni Cabrera sa kaniyang trabaho bilang financial analyst at hindi matatawarang reputasyon sa kaniyang propesyon.
Binigyang-diin ni Luistro na bago naging expert witness si Cabrera, sinabi nito sa prosecution na nais niyang maging independent at hindi pakikialaman ang kaniyang trabaho, lalo na pagdating sa findings.
Ang hiling ni Cabrera ay kanilang napagkasunduan, dahilan kaya naging maayos ang pagtalakay sa presentasyon ng mga ebidensya at testimonya ng witness. | Sa panulat ni Geli Mendez
