“NUMBERS DO NOT LIE!”
Ito ang binigyang-diin ni House lead prosecutor Gerville Luistro matapos ang naging pahayag ni Vice President Sara Duterte sa isang press conference na nag-iimbento lang ng mga ebidensya ang prosekusyon para siya ay pabagsakin sa 2028 elections.
Ayon kay Luistro, malinaw na mismong mga numero ang nagbunyag ng katotohanan matapos ang naging pagsusuri ng huling witness ng prosecution na si forensic financial analyst Atty. Alexander Cabrera.
Paliwanag ni Luistro na ang kanilang huling witness ay isang eksperto na may malawak na karanasan at katapatan sa kaniyang propesyon.
Aniya, nakabatay ang pagsusuri ni Cabrera sa mga dokumentong isinumite ng mga ahensyang ipinasubpoena ng Senate Impeachment Court, kabilang ang mga dokumento at records mula sa bangko, insurance company, BIR, SEC, at AMLC.
Iginiit ni Luistro na lahat ng pagsusuring isinagawa ni Cabrera sa mga yaman ni VP Sara at asawang si Atty. Mans Carpio ay tumugma sa alegasyong nakapaloob sa Articles of Impeachment.
Para sa prosecutor, kung nais ni VP Sara na i-address o sagutin ang mga paratang laban sa kaniya, dapat sinagot na niya ito sa pagdinig pa lamang ng House Committee on Justice.
Sinabi ni Luistro na ang Senate Impeachment Court ang proper forum, kaya mas mainam kung haharap si VP Sara sa paglilitis at sasagutin ang mga alegasyon laban sa kaniya. | Sa panulat ni Geli Mendez
