METRO PATROL

Patay ang isang 29-anyos na lalaki matapos siyang saksakin sa dibdib ng kinakasama niya sa Barangay Gulod, Novaliches, Quezon City.

Ayon sa mga pulis, nangyari ang krimen madaling araw ng Linggo, Agosto 2, kung saan, bukod sa pananaksak, tumanggap din ng ilang sipa ang biktima mula sa 22-anyos nitong live-in partner habang nakahandusay ito.

Dinala pa sa ospital ang biktima, ngunit idineklara ring dead on arrival; habang agad naaresto ang suspek.

Batay sa imbestigasyon ng mga otoridad, parehong nakainom ang dalawa sa magkahiwalay na inuman bago nagpang-abot sa kanilang bahay.

Dagdag pa ni Novaliches Police Duty Officer, Lieutenant Benhur Jose, sinaktan din ng suspek ang anak ng biktima mula sa unang asawa nito.

Paliwanag naman ng suspek, nagawa niya ang pananaksak dahil nauna umano siyang sinaktan ng biktima; ngunit itinanggi naman ito ng ina ng biktima.—sa panulat ni Anjo Riñon

Arestado ang isang 27-anyos na babae dahil sa panloloko umano nito sa mga fans ng K-pop supergroup na BTS.

Ayon sa PNP Anti-Cybercrime Group, bumagsak sa kanilang kamay ang naturang suspek, na isang IT professional, matapos ang isang entrapment operation sa Maynila.

Ikinasa anila ang operasyon matapos magsampa ng reklamo ang isa sa mga biktima nang malamang na naibenta na pala sa ibang tao ang nabili nitong ticket para sana sa Philippine leg ng Arirang World Tour ng naturang boy band sa Marso 2027.

Kinasuhan ang suspek ng paglabag sa Article 315 ng Revised Penal Code at Section 6 ng Republic Act No. 10175, o ang Cybercrime Prevention Act of 2012.

Paalala ni PNP-ACG Director Maj. Gen. Wilson Asueta sa mga nais makadalo sa mga konsyerto ng mga live performer na bumili lamang ng ticket at merchandise mula sa mga authorized seller.

Nauna nang nagbabala ang record label ng BTS na BigHit Music laban sa mga scammer na nag-aalok umano ng membership sa mga fans ng nabanggit na grupo. | Sa panulat ni Anjo Riñon

Nasakote na sa Pasay City ang tatlong suspek sa pagpatay kay dating Abuyog, Leyte Vice Mayor James Bohol at anak nitong si Carlo James.

Kinilala ang isa sa mga suspek na si alyas “Mak” na umaming humingi umano sa nakatatandang Bohol ng palugit sa pagbabayad ng tseke at nagbanta pa ang dating bise alkalde laban sa kanya at kanyang pamilya, kaya’t dinukot ang mag-ama.

Naaresto sina alyas “Mak,” na pawang residente ng Basey (Ba-say), Northern Samar, sa tulong ng Anti-Kidnapping Group at Criminal Investigation and Detection Group matapos matunton ng mga awtoridad ang ginamit nilang sasakyan sa krimen.

Ayon kay Brig. Gen. Jason Capoy, director ng Police Regional Office-8, natunton ang iniwang Mitsubishi GLX Mirage sa Barangay Tingib habang nakatulong ang Global Positioning System footage recorder na ibinigay ng car rental company upang masundan ang galaw ng mga suspek.

Lumabas din sa imbestigasyon na iniwan ng mga suspek ang isang Toyota Hilux sa Sariaya, Quezon bago sila naaresto sa Pasay City.

Patay na nang matagpuan si dating Abuyog, Leyte Vice Mayor James Bohol at anak nitong si Carlou James o Jimbo sa Silago, Southern Leyte tatlong araw matapos silang napaulat na dinukot.

Narekober ang bangkay ng mag-ama mag-a-alas diyes kahapon ng umaga sa isang bangin na nasa pito hanggang walong metro ang lalim sa gilid ng kalsada.

Kinumpirma ni Abuyog Mayor Lemuel Gin Traya ang pagkamatay ng dalawa matapos ipabatid ng Philippine National Police.

Kinondena naman ng alkalde ang insidente at nagpaabot ng pakikiramay sa pamilya ng mga biktima habang tiniyak ang suporta ng lokal na pamahalaan upang makamit ang hustisya.

Blangko pa ang P.N.P. sa pagkakakilanlan ng mga suspek at maging sa motibo sa krimen.