METRO PATROL

Nasakote ng awtoridad ang isang 39-anyos na lalaki matapos pagtatagain ang kaniyang 35-anyos na kapitbahay gamit ang 13-pulgadang butcher knife sa Barangay Potrero, Malabon City noong Nobyembre 5.

Nangyari ang pananaga bandang alas-10:15 ng umaga habang naglalakad pauwi ang biktima kasama ang kaniyang 3-anyos na pamangkin sa Doña Juana Road.

Batay sa kuha ng CCTV, biglang sinugod ng suspek ang nakatalikod na biktima bago ito paulit-ulit na pagtatagain.

Nagtamo ang babae ng malalalim na sugat sa batok, likod, balikat, braso at likod ng tainga kaya agad siyang isinailalim sa operasyon. Patuloy naman siyang inoobserbahan ng mga doktor at sasailalim din sa Magnetic Resonance Imaging (MRI).

Positibong kinilala ng asawa ng biktima ang suspek, habang narekober naman ng mga pulis ang ginamit na butcher knife na may bahid pa ng dugo.

Lumabas sa imbestigasyon na dating magkaibigan ang biktima at suspek na miyembro ng LGBTQIA+ community ngunit nagkaroon sila ng hindi pagkakaunawaan.

Sinabi ng suspek na ginawa niya ang krimen dahil umano sa matagal na pangungutya at pananakot sa kaniya ng biktima.

“Basta wala po akong pinagsisisihan,” giit pa nito.

Mariin namang pinabulaanan ng kapatid ng biktima ang alegasyon ng suspek at tiniyak na gagawin nila ang lahat upang makamit ang hustisya.

Nanawagan din ito sa publiko na huwag nang ipakalat ang video ng insidente upang hindi na madagdagan ang paghihirap ng kanilang pamilya.

Bukod sa kasong frustrated murder, desidido rin ang pamilya na magsampa ng reklamong child abuse laban sa suspek dahil sa trauma na idinulot ng insidente sa pamangkin ng biktima nang mangyari ang pananaga.

Inulan ng batikos mula sa mga netizen si Valenzuela City Mayor Wes Gatchalian matapos ang kaniyang social media post bilang tugon sa reklamo ng isang solo parent ID applicant na umano’y nakaranas ng hindi patas na pagtrato habang inaasikaso ang kaniyang solo parent ID na halos tatlong buwan na ngunit hindi pa rin ito nakukuha.

Nag-viral sa social media ang video ng social media user na “Isang Gunting Isang Suklay,” na kinilala ni Gatchalian bilang si Amanda. Sa video, ipinahayag nito ang pagkadismaya sa matagal na proseso at inireklamo ang umano’y diskriminasyon dahil sa pagiging bahagi ng LGBTQIA+ community.

Sa unang tugon ng alkalde, humingi siya ng paumanhin sa mga umano’y mapanlait na komento na narinig ng residente at sinabing hindi tama ang ganitong pagtrato. Nangako rin siyang aalamin ang nangyari sa pamamagitan ng pakikipag-ugnayan ng kaniyang staff sa residente at sa City Social Welfare and Development Office (CSWD).

Sa isang Facebook post, ipinaliwanag ni Gatchalian na naantala umano ang aplikasyon dahil sa mga kulang na dokumento, kabilang ang valid ID at patunay ng relasyon ng aplikante sa mga batang kaniyang inaalagaan.

“July 22, 2026 ka nag-apply. Hindi kumpleto ang requirement mo. Photo ID nga ay wala ka,” ani Gatchalian.

Ayon sa alkalde, kulang ang mga dokumentong isinumite ni Amanda upang patunayan ang kaniyang legal na ugnayan sa kaniyang mga pamangkin.

“Nasa akin po ang ID niyo. Pumunta ka na lang sa office para i-claim,” dagdag pa niya.

Gayunman, may mga netizen ding bumatikos sa naging tono ng tugon ng alkalde sa comment section ng kaniyang post at tinawag itong hindi propesyonal.

Kinuwestiyon din ng ilan kung kailangan pa bang mag-viral ang reklamo ng isang residente bago maaksyunan ng kinauukulang tanggapan.

Habambuhay nang hindi makakapagmaneho ang driver at rehistradong may-ari ng SUV na sangkot sa insidenteng ikinasawi ng tatlong-taong-gulang na bata sa F. Victorino Street sa Pasig City.

Matatandaang nagulungan ng driver ang bata, na kaagad nitong ikinasawi habang tumatawid ito sa nasabing lugar.

Ayon sa imbestigasyon ng LTO, napatunayang sangkot ang driver sa reckless driving at idineklarang “improper person to operate a motor vehicle.”

Dahil dito, pinatawan ng perpetual revocation, o habambuhay na ban sa pagkuha ng lisensya, ang nasabing driver.

Samantala, nananatili sa alarm status ang sasakyang nadamay sa insidente. | Sa panulat ni  Anjo Riñon

Naapula kaninang umaga ng mga bumbero ang sunog na naganap sa isang commercial building sa Barangay San Isidro, Parañaque City.

Ayon sa mga otoridad, sumiklab ang sunog sa apektadong gusali sa panulukan ng Dr. A. Santos Avenue at Filipinas Avenue bandang 11 P.M. kahapon, Setyembre 26.

Umabot pa ang sunog sa ikalimang alarma, o fifth alarm, bago ito naideklarang fire under control kaninang 6:29 A.M.

Walang nasaktan sa sunog at wala rin itong epekto sa daloy ng trapiko dahil madaling araw nangyari ang sunog.

Patuloy namang iniimbestigahan ng Parañaque City Fire Station ang sanhi ng insidente. | Sa panulat ni Anjo Riñon

Nasawi ang isang 65-anyos na babae habang walong iba pa ang nagtamo ng injuries matapos tumaob ang isang pampasaherong jeep sa Rizal Avenue Extension, Sta. Cruz, Manila nitong Sabado ng hapon, Setyembre 12.

Batay sa imbestigasyon ng District Traffic Enforcement Unit, sinabi ng driver na bigla umanong nawalan ng preno ang minamanehong jeep kaya ibinangga niya na lang ito sa isang metal post. Dahil sa lakas ng impact, tuluyang tumaob ang sasakyan.

Nasa kustodiya na ng mga awtoridad ang driver at inihahanda ang pagsasampa ng kaso laban sa kaniya dahil sa reckless imprudence resulting in homicide and multiple injuries.

Isang lalaki na tinatayang nasa 60a hanggang 65-anyos ang natagpuang patay sa kahabaan ng Libertad Channel sa Pasay City ngayong Huwebes ng umaga.

Ayon sa Philippine National Police, nasa 400 hanggang 500 metro ang layo ng pinangyarihan mula sa Senate premises.

Batay sa paunang imbestigasyon, nakita ng mga saksi ang lalaki na nagsusuka ng dugo bandang alas-nuwebe ng gabi noong Miyerkules, August 12.

Inalok anila ito ng pagkain ngunit tumanggi at sa halip ay humiga at natulog pagsapit ng alas-sais hanggang alas-sais’y medya ng umaga, at doon na natagpuang walang buhay.

Giit ng PNP na wala namang nakitang malinaw na palatandaan ng pananakit sa katawan ng biktima kaya’t posibleng natural causes ang ikinamatay nito, ngunit isasagawa pa ang medical examination upang matukoy ang eksaktong sanhi ng pagkamatay.

Patuloy naman ang imbestigasyon para makumpirma ang pagkakakilanlan ng lalaki at malaman ang buong pangyayari.

Nanawagan ang Southern Police District sa sinumang nakakakilala sa biktima o may mahalagang impormasyon na makipag-ugnayan sa Pasay City Police Station, at hiniling sa publiko na iwasan muna ang pagpapakalat ng haka-haka habang nagpapatuloy ang imbestigasyon.—sa panulat ni Reabelle Medina

Nahulog sa isang hindi natatakpang drainage project ang isang person with disability (PWD) habang tumatawid sa F.B. Harrison Street sa Barangay 73, Pasay City.

hindi napansin ng biktima ang bukas na drainage kaya tuluyang nahulog dito. Agad naman siyang tinulungan ng mga residente at iba pang nakasaksi upang maiahon at dalhin sa pinakamalapit na ospital.

Batay sa Barangay Kagawad, halos isang linggo na umanong nakatiwangwang at walang anumang harang ang ginagawang drainage project. Matapos ang insidente, nilagyan na ito ng takip at naglagay na rin ng mga kahoy at sako ng buhangin bilang babala sa mga dumaraan.

Samantala, sinabi ng Department of Public Works and Highways (DPWH) na pinatawan na ng kaukulang parusa ang contractor ng proyekto dahil sa hindi pagsunod sa itinakdang safety protocols.