METRO PATROL

Naaresto ng mga awtoridad ang isang trenta’y otso (38)-anyos na bank messenger sa Makati City matapos umanong kunin ang 650,000 pesos mula sa pera ng bangko at gamitin ito sa online gambling.

Ayon sa pulisya, inutusan si alyas Jessie ng kanyang manager na magdeposito ng 1,050,000 ngunit habang nasa biyahe, hindi na siya makontak ng kanyang mga kasamahan.

Hanggang sa nagpadala siya ng mensahe at sinabing nasa isang gasolinahan sa Barangay Palanan.

Doon niya inamin na kinuha niya ang 650,000 pesos at ipinadala ito sa sarili niyang account para ipangsugal sa online card games. Agad naman itong ini-report sa mga awtoridad.

Narekober ng pulisya ang natitirang P400,000 mula sa suspek.

Nahaharap naman si Jessie sa kasong qualified theft.

Natagpuang patay sa kanyang tahanan ang ex-lover ng pumanaw na aktres at modelo na si Gina Lima.

Ayon sa mga awtoridad, ang modelong si Ivan Cezar Ronquillo ay natuklasang wala nang buhay sa parehong condo unit, kung saan natagpuan ni Ronquillo na patay si Lima ilang araw na ang nakakalipas.

Una rito, natagpuang patay si Lima noong Linggo ng gabi, Nobyembre 16

Ayon sa pulisya, dinala siya ni Ronquillo sa ospital, kung saan idineklarang dead on arrival si Lima.

Sa inisyal na ulat, cardio respiratory distress ang sanhi ng pagkamatay ni Lima.

Patuloy naman ang imbestigasyon ng mga pulis hinggil sa krimen.

#dwiz #dwiznews #aliw23

Nasawi ang isang Delivery rider habang nakapila sa bigayan ng ayuda sa Marikina City.

Ayon sa imbestigasyon, nakapila umano ang biktima sa bigayan ng tulong pinansiyal sa naturang lugar nang bigla na lang itong nawalan ng malay.

Kaagad naman itong naisugod sa ospital ngunit nasawi rin kinalaunan.

Ayon sa pulisya, inihayag ng ospital na “natural death” Ang dahilan ng kaniyang pagpanaw.

Hinala naman ng mga kamag-anak ng biktima na maaaring na-suffocate ito dahil sa tindi ng mainit na panahon at siksikan ng mga tao sa lugar.

Samantala, nagsasagawa rin ng imbestigasyon ang pulisya hingil sa pangyayari.

Nauwi sa trahedya ang masaya sanang birthday party sa Tondo, Maynila nang maganap ang isang insidente ng pananaksak na nagresulta sa pagkamatay ng dalawang indibidwal at pagkasugat ng dalawa pa.

Ayon sa awtoridad, nagsimula ang gulo nang bumaba ang isang lalaki mula sa motorsiklo upang lapitan ang isang pang lalaki.

Kung saan nilabas ng suspek ang isang balisong at nanaksak. Apat ang tinamaan sa kaguluhan, at dalawa sa kanila ang nasawi.

Batay sa imbestigasyon, ang suspek at ang isa sa mga biktima ay nagkaroon na ng alitan sa isang birthday party.

Umano’y lasing ang suspek at binastos ang mga babaeng bisita, kabilang ang kasintahan ng biktima. Sinundan ng suspek ang biktima matapos itong umuwi, na nagresulta sa marahas na pananaksak.

Nahuli naman agad ang suspek matapos ang insidente.

Depensa niya, kakausapin lamang niya sana ang biktima ngunit bigla umano siyang sinuntok, dahilan upang kuyugin siya ng ibang tao.

Kasalukuyan namang nagpapagaling ang mga sugatan, habang hinahanda na ng awtoridad ang mga kasong kakaharapin ng nahuling suspek.

Malubhang nasugatan ang isang Tricycle Driver matapos siyang saksakin ng isang pasahero na napagbalingan lamang umano siya ng galit sa Tondo, Maynila.

Sa juha ng CCTV sa lugar, pumarada sa gilid ng kalsada ang tricycle na minamaneho ng biktima at pinababa ang limang lalaki sa tricycle sa Lico Street.

Pero sa halip na magbayad ng pamasahe, agad lumapit ang isa sa mga pasahero at sinaksak ang driver sa dibdib.

Nakatakbo ang biktima pero hinabol pa rin siya ng suspek, na tinangka namang awatin ng kaniyang mga kasama.

Sa iba pang kuha ng CCTV, nadapa ang biktima kaya  naabutan siya ng suspek.

Sa salaysay ng kapatid ng biktima sa pulisya, napagbalingan umano ito ng galit matapos makaaway ng suspek ang isa sa na kasama nitong uminom sa isang bar.

Patuloy naman ang pagtugis ng mga awtoridad sa lalaki.

Himas-rehas ulit ang isang 50-anyos na lalaki matapos magwala at makuhanan ng sumpak sa Navotas City.

Ayon sa awtoridad, isinumbong ng mga kabataan ng barangay bangkulasi ang suspek na lasing at nagwawala sa kanilang lugar.

Sa pagresponde, nahuli sa akto ang suspek na nagwawala at nakuha sa kaniya ang isang improvised gun na may bala.

Nabatid na nabilanggo rin ang suspek dahil sa paglalaro ng sugal na cara cruz.

Nahaharap siya sa reklamong Alarm and Scandals at paglabag sa Comprehensive Firearms and Regulation Act.

Patay ang isang delivery rider habang kritikal ang kasama nitong babae matapos silang harangin at tangayin ng limang armadong lalaki na nagpakilalang mga pulis sa Carmona, Cavite.

Kinilala ng pulisya ang nasawing biktima na si John Mark Cruz Samonte, Delivery Rider, habang inoobserbahan sa ospital ang kasama nitong babae na si Marithe Ashley Tila, isang Online Seller.

Ayon sa pulisya, sakay umano ang mga biktima ng itim na sasakyan nang bigla silang harangin ng isang itim na kotse lulan ang mga suspek.

Mabilis umanong sumakay ang isa sa mga suspek sa sasakyan ng mga biktima saka sila tinangay.

Hindi pa man sila nakalalayo, bigla umanong pinababa ng suspek ang dalawang biktima saka pinagbabaril na bumulagta sa daan.

Agad na sumibat ang mga suspek tangay rin ang sasakyan ng mga biktima.

Patuloy namang nagiimbestiga ang mga pulis kasabay ng backtracking sa mga cctv sa lugar para matunton ang mga salarin.

Dead-on-the-spot ang isang lady rider nang bumangga sa plastic barrier ang sinasakyan niyang motorsiklo at masagasaan ng trailer truck sa Paco, Manila.

Kinilala ng awtoridad ang biktimang si alyas ‘Gianna’ habang nasa kustodiya naman ng pulisya ang driver ng truck na si alyas ‘Archie.’

Ayon sa Vehicle Traffic Investigation Section (VTIS) ng Manila District Traffic Enforcement Unit (MDTEU), lulan umano ang biktima ng kaniyang motor at binabagtas ang naturang lugar nang aksidente niyang mabangga ang isang plastic barrier sa lugar.

Dahil dito, sumemplang ang motorsiklo ng biktima at bumagsak siya sa kalsada.

Dahil sa bilis ng pangyayari, hindi na nagawa pang pumreno ng driver ng trailer truck at nasagasaan ang biktima, na agaran niyang ikinasawi.

Kalaboso ang isang 24-anyos na lalaki matapos niyang gahasain ang 52-anyos niyang kapitbahay na isang Person with Disability at bedridden sa Valenzuela City.

Lumabas sa imbestigasyon na nakitang umaaligid ang suspek malapit sa nakakandadong pintuan ng bahay ng biktima.

Nakakuha ng tyempo ang suspek nang lumabas ang kasama ng biktima para bumili ng pagkain at pinasok ang bahay nito

Ayon sa awtoridad, may mental at intellectual disability ang biktima kaya nahihirapan na itong tumayo, laging nakahiga o nakaupo sa wheelchair at hindi rin nakakapagsalita.

Sa tulong ng isa nilang kapitbahay humingi ito ng saklolo sa mga barangay tanod matapos makitang pumasok sa loob ng bahay ang suspek.

Sumailalim na sa medico legal examination ang bitkima.

 Samantala, nahahrap sa reklamong rape ang nahuling suspek.