Handog ng isang telco ang libreng access sa artificial intelligence (AI) tools sa milyun-milyong mobile at broadband customers nito ngayong holiday season sa pamamagitan ng AI Fiesta platform, sa layuning mas mapalawak ang paggamit ng makabagong teknolohiya sa bansa.
Batay sa limitadong offer, maaaring gamitin ng mga customer ng Globe Telecom ang iba’t ibang AI models at creative tools upang gumawa ng mga larawan at video, maghanda ng presentations, at bumuo ng websites nang walang bayad sa itinakdang panahon ng promo.
Sakop ng libreng access ang Globe Circle at Globe Platinum customers mula Nobyembre 15, 2026 hanggang Enero 16, 2027. Samantala, maaari namang gamitin ng Globe Prepaid, Postpaid, Broadband, at TM customers ang platform nang libre mula Disyembre 1 hanggang 31, 2026.
Nabatid na inanunsyo ang inisyatibo sa Holiday Edition ng “The Blueprint by Globe” bilang bahagi ng Christmas campaign ng kompanya na “Make Your Magic Happen.”
Sinasabing pinagsama-sama ng AI Fiesta sa iisang platform ang iba’t ibang AI models, kabilang ang Claude, Gemini, at ByteDance, gayundin ang mga tool para sa paglikha ng iba’t ibang digital content.
Napag-alaman na kasama sa mga feature nito ang Super Fiesta, na awtomatikong pumipili ng angkop na AI model batay sa tanong ng user, at Consensus, na pinagsasama ang mga sagot mula sa iba’t ibang AI models upang makapagbigay ng mas malawak na pananaw sa isang paksa.
Pahayag ni Globe President and CEO Carl Cruz, layunin ng inisyatiba na gawing mas accessible ang AI sa mga customer upang magamit nila ang teknolohiya sa pag-aaral, trabaho, at pagtuklas ng mga bagong oportunidad.
“Technology makes the greatest impact when people know how to use it for their inherent benefits and advantages,” sabi ni Cruz.
Giit niya, nais ng telco na mas maraming Pilipino ang makinabang sa AI, kasunod ng naging papel ng internet access sa pagbabago ng paraan ng pakikipag-ugnayan, pag-aaral, at paglikha ng mga oportunidad.
Kasabay nito, ipinaliwanag naman ni Globe Chief Commercial Officer Darius Delgado na sa pamamagitan ng pagsasama-sama ng iba’t ibang AI tools sa iisang platform, mas mapapadali para sa mga customer ang pagtuklas at paggamit ng teknolohiya sa kanilang pang-araw-araw na gawain.
“AI should be accessible, easy to use, and meaningful to everyday life,” dagdag ni Delgado.
Sa nabanggit na alok, inaasahang mas maraming customer ang magkakaroon ng pagkakataong subukan at gamitin ang AI-powered tools para sa trabaho, pag-aaral, at content creation ngayong holiday season.
