FOREIGN

Kinumpirma ni National Assembly President Jorge Rodriguez nitong Linggo, Hulyo 12, na umabot na sa 4,490 ang bilang ng mga nasawi sa kambal na lindol na tumama sa Venezuela noong Hunyo 24. Hindi pa rin natutukoy ang pagkakakilanlan ng 315 sa mga nasawi. Ayon sa pinakahuling tala, 16,740 katao ang nasugatan, 6,462 ang nasagip, at halos 17,907 ang napilitang lumikas o nawalan ng tirahan.

Iniulat din ni Rodriguez na 856 na gusali ang naapektuhan ng lindol, kabilang ang 190 na tuluyang gumuho o nagtamo ng matinding pinsala sa imprastraktura. Dagdag pa niya, nakatakdang simulan sa susunod na linggo ang pamamahagi ng pabahay para sa mga naapektuhang pamilya sa pangunguna ni acting President Delcy Rodriguez.

Sa tinatayang 25,000 pabahay na kinakailangan para sa mga apektado, nasa 200 pa lamang ang unang nakatakdang ipamahagi. Ayon sa pamahalaan, mayroon nang natukoy na humigit-kumulang 40 lupang pagtatayuan ng housing projects sa Osma at Chuspa, na may kabuuang lawak na 584,000 metro kuwadrado.

Patuloy naman ang isinasagawang search and rescue operations sa kabila ng dumaraming bilang ng mga nasawi, ayon kay Rodriguez. “As long as there is life, there is hope.

We still have one or two sites where the situation remains uncertain, active sites where we are searching for survivors.,” dagdag pa niya

Dalawang lalaki ang nasawi at anim na iba pa ang nasugatan sa pamamaril na naganap sa taunang Salsa on Street Clair Festival sa Toronto, Canada.

Ayon kay Toronto Police Deputy Chief Frank Barredo, apat sa mga sugatan ang nagtamo ng malalang tama ng bala na agad isinugod sa ospital.

Tinatayang nasa labing tatlong libong indibidwal ang dumalo sa naturang street festival, at nakarekober ang mga otoridad ng dalawang baril sa pinangyarihan ng insidente.

Patuloy ang imbestigasyon at paghahanap ng pulisya sa mga suspek sa pamamaril.

Inanunsyo ni US President Donald Trump na natapos na ang tigil-putukan ng kanyang bansa at ng Iran matapos maitala ang panibagong palitan ng missile at drone sa Gitnang Silangan.

Gayunman, iginiit ni Trump na pinag-iisipan pa ng Estados Unidos kung ano ang mga susunod na hakbang nito.

Ginawa ng Pangulo ng Amerika ang pahayag habang nasa Turkey ito para sa NATO Summit.

Samantala, tinawag naman ng Iran na “kasuklam-suklam” ang “Memorandum of Understanding” sa pagitan nito at ng Amerika, na naging batayan ng nasabing tigil-putukan. | Sa panulat ni Anjo Riñon

Ayon sa Iranian State Media, inhatid sa huling hantungan ang labi ni Khamenei dalawang araw matapos itong manatili sa Grand Mosalla Mosque sa Tehran sa loob ng dalawang araw.

Nabatid na tatlo sa mga anak ni Khamenei ang nanalangin katabi ng kabaong niya, ngunit kapansin-pansin naman na hindi dumalo ang kanyang panganay na anak at kahalili bilang supreme leader na si Ayatollah Mojtaba Khamenei.

Matatandaang nasawi si Ali Khamenei matapos ang airstrike ng Israel sa tinutuluyan niyang tahanan sa Tehran noong Pebrero 28.

Nasugatan naman sa naturang airstrike si Mojtaba, habang namatay naman ang asawa nito. | sa panulat ni Anjo Riñon

Isinagawa ng Society of Saint Pius the Tenth, o mas kilala bilang SSPX, ang ordinasyon ng apat na pari nito bilang mga obispo kahit na tutol dito ang Vatican.

Nabatid na nangyari ang pag-konsagra sa apat na obispo sa seminaryo ng SSPX sa Écône, Switzerland, kung saan libo-libong mananampalataya ang dumagsa.

Nauna nang sumulat ng liham si Pope Leo XIV sa superior general ng kongregasyon na si Father Davide Pagliarani na itigil ang pag-ordina sa apat na pari.

Gayunman, iginiit ni Fr. Pagliarani na kailangan itong gawin upang maipagpatuloy ang misyon ng SSPX sa mga pinangangasiwaan nitong mga simbahan sa iba’t ibang bahagi ng mundo, kabilang na ang Our Lady of Victories Church sa New Manila, Quezon City.

Dahil sa pagtuloy ng kongregasyon sa ordinasyon, inaasahan namang papatawan ng Vatican ng excommunication ang apat na bagong-ordinang obispo, at maging ang dalawang obispo na nag-konsagra sa kanila. | Sa panulat ni Anjo Riñon

Hindi bababa sa 14 na menor-de-edad ang namatay matapos bumagsak ang bubong ng isang tutoring center sa lungsod ng Lahore sa Pakistan.

Ayon sa mga otoridad, walo pang bata ang sugatan, habang inaresto naman ang dalawang indibidwal, kabilang ang may-ari ng establisyimento.

Patuloy rin ang search, rescue, and retrieval operation dahil may iba pang mga bata ang sinasabing na-trap sa gumuhong gusali.

Nakiramay naman si Pakistani President Asif Ali Zardari sa mga magulang at kamag-anak ng mga biktima ng naturang insidente; habang iginiit din niyang dapat matiyak na hindi na ito muling maulit. | Sa panulat ni Anjo Riñon

Pormal nang kumalas ang bansang Niger sa Rome Statute, o ang kasunduang batayan ng pagtatatag sa International Criminal Court.

Nabatid na nagsumite ng sulat ang nasabing bansa sa United Nations upang simulan ang pagkalas nito sa naturang korte, kung saan isinaad nito na ginagamit umano ang Korte sa maling paraan.

Bukod sa Niger, plano na ring kumalas sa ICC ang Mali at Burkina Faso.

Nanghihinayang naman ang ICC sa pagkalas ng naturang bansa sa Rome Statute.

Matatandaang pinatalsik ng Niger ang Pangulo nito noong 2023 sa pamamagitan ng kudeta, at unti-unting pumanig sa Russia, kung saan may arrest warrant ang ICC na ihahain kay Russian President Vladimir Putin.

Ang Niger na ang ikatlong bansa na kumalas sa ICC matapos ang Burundi at Pilipinas. — sa panulat ni Anjo Riñon

Inanunsyo na ni British Prime Minister Keir Starmer na magbibitiw na sa pwesto makalipas ang dalawang-taong panunungkulan.

Sa kanyang talumpati sa labas ng 10 downing street sa london, inamin ni Starmer na, bagaman siya ang tamang pinuno ng labour party upang ilunsad ang mga reporma sa ilang aspeto ng buhay para sa mga taga-Britanya, hindi siya ang nararapat na mamuno upang matiyak na muling mamamayagpag ang kanyang partido sa susunod na eleksyon.

Kasabay nito, nanumpa na rin bilang miyembro ng House of Commons si Andy Burnham, na sinasabing posibleng ideklara bilang bagong pinuno ng Labour Party at bagong prime minister sa gaganaping leadership election sa Hulyo.

Iginiit naman ni Starmer na bababa lamang siya sa pwesto sa sandaling mayroon nang hahalili sa kanya.

Sa huli, sinabi ni Starmer na tututok siya sa kanyang pamilya matapos ang kanyang pagbibitiw, na ikinukonsidera niyang “pinakamahalagang trabaho” sa kanyang buhay. — sa panulat ni Anjo Riñon