FOREIGN

Sususpendihin ng administrasyon ni U.S. President Donald Trump ang immigrant visa processing mula sa pitumpu’t limang bansa simula sa Enero a-bente uno.

Kabilang sa mga maaapektuhang bansa na nakalista sa memo ng U.S. State Department ang Somalia, Russia, Iran, Afghanistan, Brazil, Nigeria, at Thailand.

Ipapatupad ang pansamantalang pagpapatigil ng visa processing sa gitna ng malawakang immigration crackdown ni U.S. President Trump mula nang maupo siya sa pwesto.

Noong Nobyembre, magugunitang ipinabatid din ng U.S. President ang permanenteng pagpapahinto ng migration sa lahat ng third world countries, kasunod ng pamamaril ng isang Afghan national malapit sa White House na ikinamatay ng isang miyembro ng National Guard.

Magkakaroon ng pagpupulong ang Estados Unidos at Denmark sa susunod na linggo para talakayin ang plano ni US President Donald Trump na pag-take over sa Greenland.

Ito’y kasunod ng pagkumpirma ng White House sa nasabing plano dahil sa nakikita ni Trump ang lugar bilang isang “national security priority” upang mapigilan ang kanilang mga kalaban sa Arctic region.

Maliban dito, iniulat din ang posibleng paggamit ni Trump ng military force para mapasakamay ang teritoryo ng Greenland, matapos din ang paggamit ng puwersang militar ng US para madakip si Venezuelan President Nicolas Maduro.

Nabatid na mariin nang tinututulan ng European leaders, partikular ng Denmark, ang naturang plano ng Amerika lalo’t maaari anyang magresulta ang pag-atake ng US sa pagkabuwag ng NATO military alliance.

Nagkasundo na ang Thailand at Cambodia para sa ‘immediate’ ceasefire o agarang tigil-putukan sa kanilang borders.

Sa isang joint statement, nangako ang dalawang bansa na itigil na ang ilang linggong ‘deadly border clashes’ na pumatay ng mahigit isandaang katao at naglikas sa mahigit kalahating milyong indibidwal.

Nilagdaan ang naturang ceasefire agreement nina Thai Defense Minister Natthaphon Narkphanit at kaniyang Cambodian counterpart na si Defense Minister Tea Seiha.—Sa panulat ni John Riz Calata

Tatlo katao ang patay habang labing-isang iba pa ang sugatan matapos ang pag-atake ng isang lalaki gamit ang kutsilyo sa pampublikong lugar sa Taipei, Taiwan.

Ayon sa mga otoridad, naghagis muna ng smoke grenade ang 27-anyos na lalaking kinilalang si Chang Wen at saka nito inilabas ang kanyang patalim.

Kasunod nito, pumunta ang suspek sa may Eslite Spectrum Nanxi Department Store, malapit sa Zhongshan Station, kung saan sinasabing naghagis din ito ng smoke grenade at umatake sa mga sibilyan na nasa una at ikaapat na palapag ng naturang gusali.

Matapos nito, nagtungo naman ang suspek sa isang bookshop at department store, kung saan pinalibutan ito ng mga otoridad.

Nasawi ang naturang suspek matapos umano itong malaglag sa ikaanim na palapag ng naturang gusali.

Ipinag-utos naman ng Taiwan President William Lai na agarang imbestigahan ang naturang krimen.—sa panulat ni John Riz Calata

Muling ipagbabawal ng Thailand ang cannabis, tatlong taon matapos itong gawing legal for recreational use.

Ang desisyon ay kasunod rin ng pagkalas ng Bhum-Jai-Thai Party na pangunahing tagasuporta ng legalisasyon ng cannabis, mula sa koalisyon ng Thai government.

Kaugnay nito, naglabas na ng kautusan ang Ministry of Health ng Thailand na nagbabawal sa pagbebenta ng cannabis para sa recreational use at tanging mga may reseta ng doktor lamang ang makakabili nito.

Una nang umusbong ang libo-libong tindahan ng cannabis lalo na sa mga sikat na lugar nang gawin itong ligal sa Thailand.

Mahigit sa dalawandaang preso ang nakatakas matapos yanigin ng malakas na lindol ang Pakistan.

Ayon sa ulat, sinamantala ng mga preso ng Malir Jail sa Karachi, Pakistan ang nangyaring pagyanig kung saan sinira nila ang mga bintana at mga kandado ng piitan para makatakas.

Nahuli ang nasa 80 preso habang patuloy namang pinaghahanap ang mahigit sa 100 iba pa.

Bunsod ng insidente ay napilitang gumamit ng dahas ng ilang tagabantay para pigilan ang mga presong nagpumilit na makatakas.

Kaugnay nito, iginiit ng mga opisyal ng naturang kulungan na ang pangyayari ay hindi security lapses, sa halip ay isang natural disaster.

—sa panulat ni Jasper Barleta

Pumanaw na ang dating pangulo ng Uruguay na si José Mujica, at tinaguriang “pinakamahirap na pangulo sa buong mundo,” sa edad na 89.

Kilala si Mujica sa kanyang payak na pamumuhay at progresibong pamumuno, kabilang ang legalisasyon ng marijuana.

Sinasabing siya ay ilang taon nang nakakaranas ng sakit na oesophageal cancer; ngunit wala pang pormal na anunsyo kung ano ang sanhi ng kanyang kamatayan.—sa panulat ni Jasper Barleta

Magbabawas ng opisyal ang World Health Organization dahil sa kakulangan sa pondo.

Ito ay matapos ma-cut ng US ang pondo; kung saan mula 11, sinasabing mayroon na lamang anim na matitirang miyembro ng pamunuan simula a-desi sais ng Hunyo.

Kabilang sa tatanggalin ay sina Mike Ryan at Bruce Aylward.

Mananatili si Jeremy Farrar at papalitan naman ni Dr. Sylvie Briand ang dating posisyon niya bilang chief scientist.

Aabot naman sa 650 million US dollar ang kakulangan sa pondo, kung saan hindi na inaasahang magbibigay ng kontribusyon ang US Ngayong 2024 at 2025.

Inatasan ni  US President Donald Trump ang Commerce department at US Trade Representative na magpataw ng isandaang porsyentong taripa sa mga pelikulang gawa ng ibang mga bansa.

Ayon kay Trump, namamatay na ang movie industry sa amerika dahil sa mga insentibong iniaalok ng ibang mga bansa sa mga US Filmmaker.

Matatandaang itinalaga ni Trump bilang “Special ambassadors” sina Jon Voight, Sylvester Stallone at mel Gibson upang palakasin ang Hollywood.

Sa ngayon, hindi pa malinaw kung paano maipapataw ang nasabing taripa sa mga pelikula sa streaming services, maging sa mga ipinapalabas sa sinehan.