DWIZ 882

Umani ng batikos si Interior Secretary Jonvic Remulla sa pag-aalok ng sampung milyong pisong pabuya para sa impormasyong magtuturo sa pag-aresto sa negosyanteng si Charlie “Atong” Ang.

Kasunod ito ng mga alegasyong nagsasabing alam na ng mga otoridad ang kinaroroonan ni Ang kaya’t madali na lamang anilang maibubulsa ang nasabing pabuya.

Pinabulaanan ni Sec. Remulla ang mga alegasyon kasabay ng paggigiit na personal niyang inaprubahan at pinondohan ang reward at labag sa kanyang interes ang patagalin pa ang pag-aresto sa negosyante.

Kinilala ng kalihim na hamon ang pagtugis sa isang puganteng may malaking pera, ngunit iginiit niyang mas malawak ang kakayahan at pondo ng pamahalaan.

Binigyang-diin ni Sec. Remulla na patuloy na tinutugis si Ang saanman ito naroroon, at walang espesyal na trato na ibibigay sa kahit sinumang akusado.

Aminado si Interior Secretary Jonvic Remulla na malabong mapauwi sa Pilipinas si dating Congressman Zaldy Co sa pamamagitan ng deportation.

Tugon ito ng kalihim sa panawagan ni ML Party-list Rep. Leila de Lima na makipag-negosasyon ang pamahalaan upang maipa-deport ang dating mambabatas at mapanagot sa batas.

Ayon kay Sec. Remulla, bagama’t lohikal ang mungkahi, hindi ito madaling maisakatuparan dahil kailangang dumaan sa tamang proseso ng batas.

Hindi anya sapat ang pagkansela ng Philippine passport ni Co dahil sinasabing mayroon itong Portuguese passport na nagbibigay sa kanya ng karapatan at pribilehiyo bilang mamamayan ng Portugal.

Iginiit ni Sec. Remulla na wala ring extradition treaty ang Pilipinas at Portugal, kaya’t kakain lamang anya ng mahabang panahon at malaking pagsisikap ang pagbuo ng kasunduan para lamang sa isang kaso.

Matatandaang kabilang sa mga kinasuhan si Co sa sinasabing 289-million pesos ghost flood control projects sa Oriental Mindoro, na pinaniniwalaang nagtatago sa Portugal.

Tiniyak ni Interior Secretary Jonvic Remulla sa publiko na walang magiging ‘special treatment’ para kay dating senador Ramon “Bong” Revilla Jr. kasunod ng pagsuko nito kaugnay ng kasong malversation sa sinasabing “ghost” flood control project sa Pandi, Bulacan.

Sinabi ni Sec. Remulla na personal siyang tinawagan ni Revilla, na inilarawan niya bilang matagal na niyang kaibigan, matapos maglabas ang Sandiganbayan ng warrant of arrest.

Ayon sa kalihim, pinayuhan niya ang dating senador na kusang-loob na sumuko sa mga otoridad.

Binigyang-diin din niya na ituturing si Revilla tulad ng sinumang akusado na nahaharap sa kasong kriminal.

Itinuturing ni Senador Imee Marcos na panibagong drama series na tatagal ng isang taon ang inihain na impeachment complaint laban sa kanyang kapatid na si Pangulong Ferdinand Marcos Junior.

Ayon kay Senador Marcos, kilala naman kung sino ang nag-file at anong background nito kaya’t kumbinsido siyang hindi seryoso ang inihain na reklamo laban sa pangulo.

Nang tanungin naman ang senadora kung maaaring batayan ang sinasabing paggamit ng droga ng pangulo sa impeachment, sinabi ng mambabatas na hindi pa niya nababasa nang buo ang impeachment complaint subalit natatawa sa hitsura nito.

Ginawa ni Senador Marcos ang reaksiyon sa reklamong inihain ni Atty. Andre de Jesus na inindorso ni Pusong Pinoy Representative Jett Nisay laban kay Pangulong Marcos.

Naniniwala si House Senior Deputy Minority Leader at Caloocan 2nd District Rep. Edgar “Egay” Erice na mababasura lang ang kauna-unahang impeachment complaint laban kay Pangulong Ferdinand Marcos Junior.

Ayon kay Congressman Erice, “hilaw” pa ang inihain na reklamo ni Atty. Andre de Jesus, na inendorso naman ni Pusong Pinoy Party-list Rep. Jett Nisay.

Aminado ang kongresista na nagtataka siya kung bakit si De Jesus ang nag-file ng reklamo, gayong naging abogado ito ni First Lady Liza Marcos.

Pinayuhan naman ni Cong. Erice ang ilang grupo, tulad ng Makabayan bloc sa Kamara, na dapat nang kumilos kaagad ang mga ito habang wala pang panibagong impeachment case laban kina Pangulong Marcos at Vice President Sara Duterte.

One-third ng mga Pilipino ang pabor na masibak sa pwesto sina Pangulong Ferdinand Marcos Jr. at Vice President Sara Duterte.

Batay sa non-commissioned survey ng market research firm na Tangere, 33 percent ng mga respondents ay suportado ang impeachment nina Pangulong Marcos at VP Sara, kung saan karamihan sa mga ito ay dating mga taga-suporta ng Marcos-Duterte “UniTeam.”

Sakali mang mabakante ang dalawang pinakamataas na pwesto sa pamahalaan, mahigit kalahati ng respondents ang gusto na si dating Vice President Leni Robredo ang magsilbing caretaker ng bansa, habang ‘quarter’ naman ang suportado si San Miguel Corp. chairman at chief executive officer Ramon Ang.

Napag-alaman din sa survey na mas maraming Pilipino ang pabor sa impeachment ni Pangulong Marcos na umabot sa 68%, habang 42% ang suportado ang impeachment ni VP Sara.

Isinagawa ang Tangere survey noong January 14 hanggang 16 ng kasalukuyang taon sa 1,200 participants sa buong bansa, sa pamamagitan ng mobile-based respondent application.

Naalarma ang women’s rights group na Gabriela dahil sa patuloy na pagtaas ng kaso ng karahasan laban sa mga kabataan at kababaihan sa bansa.

Ayon sa Gabriela, senyales ito na nabigo ang pamahalaan na itaguyod at protektahan ang karapatan ng mga babae at mga bata.

Giit naman ni Gabriela Secretary General Clarice Palce, dulot ito ng bulok na sistema sa bansa na ginagawang normal ang misogyny.

Binanggit din ng grupo ang lumalalang problema sa A.I., partikular na ang “deepfakes,” na ginagamit upang mangharass ng kababaihan.

Hinimok din ni Secretary Palce ang mga biktima upang magsumbong at makiisa sa pagsugpo sa karahasan.

Iginiit ng political analyst na si Dr. Froilan Calilung na mahihirapan ang kampo ni Pangulong Ferdinand Marcos Junior na tapatan si Vice President Sara Duterte sakaling tumakbo ito.

Ayon kay Calilung, habang papalapit ang 2028 presidential elections, inaabangan anya ng taumbayan kung sino sa mga matutunog na pangalan ang kakandidato sa nasabing eleksyon.

Ngunit, kung ang pag-uusapan ay ang bise-presidente, iginiit ni Calilung na hindi pa ito tahasang nagde-desisyon sa ngayon.

Samantala, bagama’t malabo anyang makipag-koalisyon ang mga taga-suporta ni Pangulong Marcos at ang mga mas progresibong mga kampo, tulad ng mga “Kakampinks,” sa 2028, hindi naman ito imposibleng mangyari kung ang katunggali ay si VP Sara.

Tiniyak ni Batangas Rep. Gerville Luistro na kakayanin ng House Committee on Justice na pagsabayin ang trabaho para sa impeachment complaint laban kay Pangulong Ferdinand Marcos Jr. at ihahaing reklamo laban naman kay Vice President Sara Duterte.

Ayon kay Congressman Luistro, ang chairperson ng justice panel ng Kamara, buo ang kanyang tiwala sa kakayahan ng komite dahil magagaling ang mga kongresistang kanyang kasama.

Iginiit ng kongresista na magagampanan pa rin nila ang kanilang mandato kahit isa o dalawa pang impeachment complaint ang mairekomenda sa kanilang komite.

Matatandaang inihain sa Kamara ang impeachment complaint laban kay Pangulong Marcos, kahapon, Enero a-disi nwebe, habang umuugong din ang balitang may maghahain ng panibagong reklamo laban naman kay Vice President Duterte sa susunod na buwan.

Tinabla ni Senate Blue Ribbon Committee Chairman at Senate President Pro Tempore Panfilo “Ping” Lacson ang mga kritiko na sinasabing pilit sinisiraan at minamaliit ang imbestigasyon ng Senado kaugnay sa maanomalyang flood control projects.

Ayon kay Senador Lacson, walang basehan ang mga kasinungalingang wala pa silang nagagawa sa kanilang pagdinig sa Senate Blue Ribbon Committee.

Marami na anya silang isiniwalat at nagawa mula sa paglabas ng korapsyon sa DPWH Bulacan 1st District Engineering Office na nagmula sa sworn affidavit nina dating DPWH District Engineer Henry Alcantara, dating Asst. District Engrs. Brice Hernandez at Jaypee Mendoza.

Bahagi ng pahayag ni Senate Blue Ribbon Committee Chairman Panfilo “Ping” Lacson sa pagdinig ng Senado sa maanomalyang flood control project, kahapon, Enero 19.