DWIZ 882

Nilinaw ni dating Far Eastern University Institute of Law Dean Mel Sta. Maria na karapatan ni Vice President Sara Duterte na tumangging humarap bilang testigo sa kanyang impeachment trial.

Kasunod ito ng pahayag ng House Prosecution na nais nilang iharap si V.P. Sara bilang testigo sa kanyang impeachment case.

Ayon kay Atty. Sta. Maria, hindi maaaring pilitin ang Bise Presidente na magsalita o magbigay ng ebidensya na maaaring gamitin upang idiin o ipahamak ang kanyang sarili sa isang krimen.

Gayunman, sinabi ni Atty. Sta. Maria na maaari pa ring i-subpoena o ipatawag ng Senate Impeachment Court ang Pangalawang Pangulo.—sa panulat ni Reianne Antiquina

Aprubado na ng Regional Tripartite Wages and Productivity Board-National Capital Region ang 60 pisong dagdag sa arawang sahod ng mga manggagawa sa Metro Manila.

Sa ilalim ng Wage Order No. 28, tataas sa 755 pesos ang sweldo ng mga non-agricultural minimum wage workers mula sa umiiral na 695 pesos.

Habang itinakda naman sa 718 pesos ang sahod para sa sektor ng agrikultura, retail at service establishments na may labinglimang empleyado pababa, at manufacturing firms na may sampung empleyado pababa.

Inaasahan namang ipatutupad ang wage order sa Setyembre 26 o a-27.

Ayon sa Department of Labor and Employment, layunin ng umento sa sahod na palakasin ang purchasing power ng mga manggagawa at suportahan ang inklusibong paglago ng ekonomiya, alinsunod sa pangako ni Pangulong Ferdinand Marcos Jr.—sa panulat ni Reianne Antiquina

11 boto lamang ang kinakailangan mula sa senator-judges upang baligtarin ang unang ruling na nagsasabing kailangan ng labing-anim na boto upang mahatulan si Vice President Sara Duterte.

Ayon kay Impeachment Court spokesman Reginald Tongol, hindi kabilang sa botohan si Presiding Officer Francis “Chiz” Escudero dahil siya ang nagpasya sa 16-voting threshold.

Dahil anya apat na senador ang absent at hindi kasama sa pagbotong ang Presiding Officer, labing-siyam na senator-judge lamang ang boboto kaya’t sampung boto, o simpleng mayorya, ang kakailanganin upang baguhin ang threshold.

Gayunman, sinabi ng Tongol na kung magkakaroon ng tabla sa botohan lalo na kung may isa pang senador na hindi makadalo o kung dumalo naman ang isa pang absent na senador, mananatili ang naunang ruling ni Presiding Officer Escudero.

Nakatakdang isagawa ang botohan sa Setyembre a-bente-tres pagkatapos ng talakayan nina dating Chief Justices Hilario Davide Jr., Artemio Panganiban at Reynato Puno, gayundin ni dating Supreme Court Associate Justice Adolfo Azcuna.—sa panulat ni Reianne Antiquina

Umabot na sa 35 ang bilang ng nasawi sa sunog sa MV June Aster sa karagatan ng Coron, Palawan.

Ayon sa Philippine Coast Guard, 43 ang nakaligtas habang 53 pa ang naitalang missing.

Sa press briefing ng PCG ngayong Sabado, iniulat na 30 katawan ang narekober noong Biyernes mula sa nasunog na barko.

Sumiklab ang sunog noong Miyerkules matapos umanong makarinig ng malakas na pagsabog ang ilang nakaligtas, na sinundan ng usok at apoy.

Idineklarang patay na ang apoy bandang 10:15 ng umaga noong Biyernes.

Patuloy naman ang retrieval at identification of remains ng PCG, PNP-SOCO at iba pang ahensya.

Patuloy pa ring iniimbestigahan ang sanhi ng sunog.

Isinusulong ng Department of Interior and Local Government ang mas komprehensibong regulasyon tungkol sa armas.

Ayon kay Interior Secretary Jonvic Remulla, para sa mga may-ari ng mga loose firearms ang igagawad na amnestiya basta’t isusuko ito ng mga may-ari at wala itong kaugnayan sa anumang krimen.

Makatutulong anya ang nabanggit na hakbang upang maresolba ang dami ng kaso ng mga hindi-rehistradong baril at matukoy kung nagamit sa krimen ang mga ito.

Nanawagan din ang kalihim sa Kongreso na repasuhin ang Republic Act Number 8294, o ang Firearms Law Amendment of 1997, na nagtatakda sa mas mababang parusa para sa kasong illegal possession of firearms na may kaugnayan sa mga kriminal na aktibidad.—sa panulat ni Anjo Riñon

“Mumurahin kami ng mga tao!”

Ito ang reaksyon ni Sandiganbayan Third Division Associate Justice Ronald Moreno sa rekomendasyon ng isa sa mga doktor ni dating House Speaker Martin Romualdez na posibleng umabot ng mula apat hanggang anim na linggo ang recovery timeline nito.

Naunang sinabi ng cardiologist ni Romualdez na si Doctor Rody Sy na unstable ang kondisyon ng mambabatas dahil sa stress, kakulangan sa tulog, at blood pressure fluctuation.

Samantala, ipinag-utos na ng Sandiganbayan na ilipat si Romualdez mula as Cardinal Santos Medical Center patungong Philippine General Hospital.—sa panulat ni Anjo Riñon

Nanindigan ang Senate Impeachment Court na impartial ito sa pagpili ng apat na retiradong mahistrado ng Korte Suprema bilang mga amici curiae o “friends of the court” sa usapin ng interpretasyon ng two-thirds voting rule ng Senado sa isang impeachment trial.

Nauna nang inanunsyo ng naturang korte na hihingin nito ang legal expertise nina dating Supreme Court Chief Justices Artemio Panganiban, Reynato Puno, at Hilario Davide, at retiradong Associate Justice Rodolfo Azcuna tungkol sa isyu.

Ayon kay Senate Impeachment Court spokesman Reginald Tongol, nagsilbing chairman ng Consultative Committee na nagsuri sa 1987 Constitution noong administrasyong Duterte; habang naging bahagi naman sina Davide at Azcuna ng 1986 Constitutional Commission na nagbalangkas ng kasalukuyang Saligang Batas.

Nag-ugat ang isyu matapos unti-unting nalagas ang mga senador na dumadalo sa pagdinig ng Impeachment Court dahil sa pagkakakulong, medical leave, personal na dahilan, at pagtatago sa batas.—sa panulat ni Anjo Riñon

Inaasahang tataas ang singil ng mga water concessionaire sa Metro Manila sa susunod na buwan.

Ito’y matapos kumpirmahin ng Metropolitan Waterworks and Sewerage System Regulatory Office na inotorisa nito ang Foreign Currency Differential Adjustment para sa Maynilad at Manila Water sa ikaapat na quarter ng 2026.

Walong sentimos ang idaragdag sa kada cubic meter na konsumo para sa mga customer ng Manila Water.

Nangangahulugan ito ng dagdag na 34 centavos para sa mga kumokonsumo ng 10 cubic meters pababa; dagdag na 75 centavos para sa 20 cubic meters na konsumo; at piso-singkuwenta’y-tres para sa 30 cubic meters na konsumo.

Samantala, bente-kwatro sentimos naman ang idaragdag ng Maynilad sa kada cubic meter ng konsumo.

Ibig sabihin nito, madaragdagan ng 67 centavos ang mga kumokonsumo ng 10 cubic meters pababa; 2 pesos, 54 centavos para sa 20 cubic meters na konsumo; at singko-disi-nwebe para sa 30 cubic meters na konsumo. | Sa panulat ni Anjo Riñon

Ipinag-utos ng Sandiganbayan Third Division ang paglipat kay dating House Speaker Martin Romualdez sa Philippine General Hospital ngayong araw upang doon ito suriin.

Ayon sa direktiba ng anti-graft court, ibeberipika ng mga doktor ng PGH ang resulta ng mga doktor ni Romualdez sa Cardinal Santos Medical Center matapos dinggin ang testimonya mula sa mga ito.

Matatandaang inaresto si Romualdez at tatlo pang iba dahil sa pagkakadawit ng mga ito sa ₱7.4-bilyong plunder case kaugnay sa flood control scandal.

Inaasahang ililipat si Romualdez mula Cardinal Santos patungong PGH mamayang 10 ng umaga. | Sa panulat ni Anjo Riñon

Itinutulak ni DILG Secretary Jonvic Remulla ang pagbalik ng age requirement sa Sangguniang Kabataan (SK) candidates na 15 hanggang 19 anyos.

Giit ni Remulla, ito’y para mas mapalapit ang mga kabataan batay sa kanilang edad at karanasan sa sektor na kanilang nirerepresenta.

Sa ilalim ng kasalukuyang batas, dapat ay 18 hanggang 24 anyos ang mga SK official sa araw ng halalan.

“My recommendation is to bring it back to 15 to 19 years old, so that they would still be staying in the community,” ani DILG Sec. Jonvic Remulla.