Sa direktiba ni Land Transportation Office (LTO) Chief, Assistant Secretary Markus V. Lacanilao, naglabas ng Show Cause Order (SCO) ang LTO laban sa driver at rehistradong may-ari ng isang sedan na nakahadlang sa pagresponde ng Bureau of Fire Protection (BFP).
Makikita sa viral video, naka-double parking ang sasakyan sa masikip na bahagi ng kalsada kaya nahirapang makadaan ang rumerespondeng BFP truck. Nasagi rin ng fire truck ang pinto ng sedan habang nagtatangkang makadaan.
Inatasan ng LTO ang driver at may-ari na humarap sa Intelligence and Investigation Division sa Setyembre 18 upang magsumite ng kanilang mga salaysay at kaukulang dokumento kaugnay ng mga alegasyong Parking in Prohibited Places at Obstruction of Traffic.
Bukod sa 90-araw na preventive suspension, posible ring tuluyang makansela ang lisensya ng driver kung mapatunayang isa siyang Improper Person to Operate a Motor Vehicle. Inatasan din siyang agarang isuko ang kanyang lisensya habang isinasagawa ang imbestigasyon. Isinailalim na rin sa alarm status ang naturang sasakyan.
