“Eleven over ten”
Ito ang ibinigay ni House Lead Prosecutor Gerville Luistro nang matanong kung anong grado ang kaniyang maibibigay kay House Prosecutor Joel Chua matapos manguna sa presentasyon ng mga ebidensya sa impeachment trial laban kay Vice President Sara Duterte.
Matatandaang si Chua ang inilagay na lead prosecutor para sa Article 1 o misuse of confidential funds ng Office of the Vice President (OVP) at Department of Education (DepEd) sa ilalim ng pamumuno ni VP Sara.
Ayon kay Luistro, naging maayos, malinaw, at matagumpay ang presentasyon ng mga ebidensya ni Chua sa dalawang stand witness ng prosecution.
Pinuri ni Luistro si Chua sa kaniyang direct examination kina Violeta Constantino, ang dating manager ng LandBank of the Philippines-Shaw Blvd. Branch, at Nenita Camposano, ang dating manager ng LandBank of the Philippines-DepEd Branch.
Binigyang-diin ni Luistro na patunay lamang ito na ginagawa nila ang kanilang tungkulin bilang public prosecutors at bilang miyembro ng House of Representatives dahil na rin sa kanilang pagmamahal sa bayan. | via Geli Mendez (Patrol 30)
