Asahan na ang mas mataas na pamasahe sa eroplano simula Agosto 1 hanggang 15 matapos itaas ng Civil Aeronautics Board (CAB) sa Level 13 ang passenger fuel surcharge mula sa kasalukuyang Level 8.
Ayon sa CAB, ang fare increase ay dulot ng pagtaas ng presyo ng jet fuel sa pandaigdigang merkado kasunod ng nagpapatuloy na tensyon sa Gitnang Silangan.
Sa ilalim ng Level 13, aabot na sa 423-pesos hanggang 1,237-pesos ang fuel surcharge para sa domestic flights, habang 1,396-pesos hanggang 10,385-pesos naman para sa international flights na nagmumula sa Pilipinas, depende sa layo ng biyahe.
Mas mataas ito kumpara sa kasalukuyang Level 8 na may surcharge na 253-pesos hanggang 787-pesos sa domestic at 835-pesos hanggang 6,208-pesos sa international flights.
Ang fuel surcharge ay hiwalay sa base airfare at maaaring ipataw ng mga airline upang mabawi ang dagdag na gastos sa pabagu-bagong presyo ng jet fuel.—sa panulat ni Jordan Gutierrez
