“Nothing to cross.”
Ito na lang ang binitawang pahayag ni Defense Legal Counsel Atty. Michael Poa matapos ang naging direct examination ng House Prosecution Team sa impeachment trial.
Kasunod ito ng naging testimonya sa witness stand ng prosecution na si Violeta Constantino, ang dating branch manager ng LandBank of the Philippines Shaw Blvd. Branch, bilang unang testigo para sa Article 1 o misuse of confidential funds.
Mismong si House Prosecutor at Manila Rep. Joel Chua ang nanguna sa direct examination o pagtatanong sa testigo.
Natalakay ang apat na cheque kung saan kinumpirma ni Constantino na ang kaniyang mga tauhan sa naturang branch ang lumagda para sa encashment na nakapangalan kay Special Disbursing Officer Gina Acosta.
Kinumpirma ni Constantino na ang bawat chequeng nilagdaan ay nagkakahalaga ng P125 million.
Nabanggit din sa testimonya ni Constantino ang tatlo hanggang apat na duffle bags na naglalaman ng mga pera.
Nang matapos ang direct examination ng prosecution, sinabi ni Atty. Poa na hindi na sila magsasagawa ng cross-examination sa unang testigo.
Dahil dito, nagdesisyon ang Senate Impeachment Court na bigyan na lamang muna ng oras ang mga senator-judges para sa clarificatory questions.
Sa ngayon, nagpapatuloy ang talakayan sa Day 10 ng impeachment trial laban kay Vice President Sara Duterte. |via Geli Mendez (Patrol 30)
