Nag-alok ng P10-M pabuya si Pangulong Rodrigo Duterte para sa sinumang Pilipino na makakadiskubre o makagagawa ng bakuna laban sa coronavirus disease 2019 (COVID-19).
Ito ang inanunsyo ni Presidential Spokesperson Harry Roque sa kanyang televised press briefing.
Ayon kay Roque, inanunsyo ito ng pangulo dahil sa anito’y pagiging public enemy ng COVID-19 hindi lamang sa Pilipinas kundi maging sa ibang bansa.
Kasabay nito, sinabi rin ni Roque na magbibigay si Pangulong Duterte ng substantial grant sa University of the Philippines at Philippine General Hospital para sa paggawa ng posibleng bakuna laban sa COVID-19.
Una nang sinabi ni Pangulong Duterte na nakahanda ang Pilipinas na makibahagi sa clinical trial at medical studies ng mga posibleng bakuna at gamot laban sa COVID-19 tulad ng avigan na isang Japanese flu drug.