NEWS

Iniimbestigahan ng National Police Commission ang insidente ng tangkang pag-aresto ng ilang tauhan ng Philippine National Police sa dalawang photojournalist na nagko-cover ng protesta sa Maynila kahapon, Hulyo 22.

Bago nito, pinangalanan ng Photojournalists’ Center of the Philippines ang mga photojournalist bilang sina Bullit Marquez at Rene Dilan, na nasa lugar ng protesta kaugnay ng naturang protesta.

Tiniyak ng NAPOLCOM sa publiko at sa media community na iimbestigahang mabuti ang naturang insidente.

Sakaling may inilabag na batas ang mga pulis na sangkot sa insidente, hindi mag-aatubili ang NAPOLCOM na panagutin ang mga ito.

Ayon kay NAPOLCOM Commissioner Rafael Calinisan, hindi magkasalungat ang pagtatanggol sa press freedom at pagpapanatili ng kapayapaan at kaayusan, lalo na sa mga demonstrasyon.

Dagdag pa ni Calinisan, kailangang pairalin ng mga pulis ang otoridad nito sa pamamagitan ng pagtalima sa batas at sa paggalang ng mga ito sa karapatan ng mga mamamahayag na gampanan ang mga tungkulin nito. | Sa panulat ni Anjo Riñon

Pormal nang nanungkulan bilang bagong Superintendent ng Philippine Military Academy ang tinaguriang “Barefoot General” na si Michael Logico.

Ayon kay PMA Spokesman, Lt. Cdr. Jesse Nestor Saludo, pinalitan ni Logico Si Vadm. Caesar Bernard Valencia, miyembro ng PMA “Bigkis-Lahi” Class of 1990, na nag-retiro makalipas ang dalawang taon bilang Superintendent at apat na dekada sa serbisyo.

Kaugnay ng bagong assignment, na-promote din si Logico sa ranggong Lieutenant General, na personal na iginawad ni bagong Armed Forces of the Philippines Chief of Staff, Gen. Antonio Nafarrete.

Nakilala si Lt. Gen. Logico, na bahagi naman ng PMA “Maalab” Class of 1993, hindi lamang sa kanyang masidhing pagtatanggol sa West Philippine Sea at sa pagiging masigasig sa pagsasanay ng sundalo bilang hepe ng Philippine Army Training Command, kundi pati na rin sa kanyang personal na fitness style sa pagtakbo ng nakayapak.

Sa kanyang talumpati bilang bagong pma Superintendent, hinimok niya ang mga kadete na isapuso at isaisip ang katagang “Train to Win,” o ang pagsasanay upang magtagumpay. | sa panulat ni Anjo Riñon

Tuloy-tuloy ang libreng sakay ng Q City Bus sa walong ruta sa Quezon City upang matulungan ang mga commuter na maaapektuhan ng transport strike ng grupong Manibela ngayong Hulyo 22 hanggang 23. Maaga ring nagdeploy ang QC Traffic and Transport Management Department (TTMD) ng mga tauhan upang umalalay sa mga motorista at pasahero at mabawasan ang abala sa biyahe.

Narekober ng mga awtoridad ang tinatayang 30 gramo ng hinihinalang shabu na nagkakahalaga ng P204,000 mula sa isang menor-de-edad na estudyante sa isang high school sa Barangay Banago, Bacolod City.
Natuklasan ang ilegal na droga sa isinagawang routine inspection ng school security personnel. Nasa protective custody na ang estudyante habang nagpapatuloy ang imbestigasyon ng pulisya upang matukoy ang pinagmulan ng hinihinalang shabu at kung may sangkot na drug trafficking group.