Hiniling ng House Prosecution Panel sa Senate Impeachment Court na ipasubpoena si Davao City Mayor Sebastian “Baste” Duterte para magsilbing witness stand sa impeachment trial laban sa kaniyang kapatid na si Vice President Sara Duterte.
Ayon kay House Trial Spokesperson Zia Alonto Adiong, inihahanda na ng prosecution ang mga karagdagang ebidensya kaugnay sa GenCorp., isang kumpaniyang nakalista sa mga idineklarang business interests ng Bise Presidente.
Paliwanag ni Adiong, hindi dapat tingnan ang pag-imbita sa alkalde bilang testigo dahil lamang sa pagiging kapatid ng Bise Presidente kundi dahil mayroon itong personal at opisyal na kaalaman tungkol sa mga usaping bahagi ng presentasyon ng prosecution sa Article II.
Nabatid na si VP Sara mismo ang nagdeklara sa kaniyang Statement of Assets, Liabilities and Net Worth o SALN na mayroon siyang interes sa naturang kumpanya.
Matatandaang natuklasan sa mga pagdinig ng komite sa Kamara na nakakuha ang GenCorp ng milyun-milyong pisong food at catering contracts mula sa Davao City Government na nakatanggap ng tinatayang P14.32 million mula 2022 hanggang 2025.
Target namang isulong ng prosecution sa Senate Impeachment Court na gawing hostile witness si Mayor Baste Duterte.
Bukod sa alkalde, inaasahan ding haharap sa susunod na linggo ang SEC official na si Gerardo Del Rosario para magbigay ng testimonya sa mga record na may kaugnayan sa business interest ng Bise Presidente. | mula sa panulat ni Geli Mendez
