NEWS

Napatunayan sa Day 25 ng impeachment trial ang kulang-kulang na cash declarations ni Vice President Sara Duterte sa kaniyang Statement of Assets, Liabilities, and Net Worth o SALN.

Ito’y matapos ibulgar sa presentasyon ni Private Prosecutor Atty. James Bryan Ibrahim Alih ang kakulangan sa mga dokumentong isinumite ng Bise Presidente sa kaniyang SALN.

Ayon sa witness stand na si Ombudsman Records Division Officer-in-Charge Karen Batu, mula nang manungkulan si VP Sara noong 2007, walang isinumiteng cash declaration si VP Sara mula sa taong 2013 hanggang 2015 at taong 2019 hanggang 2025.

Sa press conference, kinuwestiyon ni House Deputy Speaker Paolo Ortega V ang kakulangan sa cash declaration ng Bise Presidente.

Ayon kay Ortega, hindi siya naniniwalang walang cash na hawak si VP Sara, dahil maging ang mga ordinaryong manggagawa ay may barya ang kanilang sariling mga bulsa. | mula sa panulat ni Geli Mendez

Iginiit ng House Prosecution Panel na dapat maging pantay ang pamantayan sa pananagutan na ipinapatupad sa lahat ng opisyal at kawani ng gobyerno.

Ayon kay House Prosecutor Terry Ridon, may mga kawani at guro na naparurusahan dahil lamang sa hindi pagdedeklara ng kanilang maliliit na negosyo.

Natalakay kasi kahapon ni Retired Sandiganbayan Presiding Justice Amparo Cabotaje-Tang sa impeachment trial ni Vice President Sara Duterte ang mga patakaran sa SALN, hindi maipaliwanag na yaman, at financial interest sa mga public official.

Naniniwala si Ridon na hindi dapat magkaroon ng ibang pamantayan para sa mga matataas na opisyal ng gobyerno, kabilang ang Pangalawang Pangulo.

Ngayong Day 25 ng impeachment trial, asahan ang pagharap ng dalawa pang testigong haharap sa witness stand, kabilang na sina Ombudsman Records Division Officer-in-Charge Atty. Karen Batu at SEC Company Registration and Monitoring Department Director Atty. Gerardo Del Rosario. | mula sa panulat ni Geli Mendez

Tinawag na “makapal ang mukha” ni House Prosecutor Terry Ridon si Vice President Sara Duterte dahil sa panawagan nitong bumaba sa puwesto si Pangulong Ferdinand “Bongbong” Marcos Jr.

Ayon kay Ridon, “self-serving” ang panawagan ng bise presidente dahil siya ang constitutional successor at siya rin ang maaaring makinabang sakaling bumaba sa puwesto ang Pangulo.

Aniya, walang problema kung ang mga tagasuporta ni VP Sara ang manawagan sa Pangulo na magbitiw, pero nakakatawa umano na mismong ang bise presidente ang gumawa nito.

Iginiit ni Ridon na hindi niya matandaang may bise presidente noong kasagsagan ng EDSA Dos na nanawagan sa Pangulo na magbitiw sa puwesto.

Dagdag pa niya, walang ibang dapat sisihin ang bise presidente sa mga kinahaharap nitong problema kundi ang kaniyang sarili, kabilang ang impeachment trial at kasong grave threats sa Quezon City Regional Trial Court. | mula sa panulat ni Geli Mendez/DWIZ Patrol

Maaaring umaksyon ang House Committee on Ethics and Privileges kung mabibigong maipaliwanag ni Batangas Rep. Leandro Leviste ang kanyang patuloy na pagliban sa trabaho.

Ito ang sinabi ni House Deputy Speaker at La Union Rep. Paolo Ortega the Fifth, nang tanungin kung ano ang maaaring gawin ng Kamara sa patuloy na pag-absent ni Leviste.

Ayon kay Ortega, sa ngayon ay wala pa siyang naririnig kung may hakbang ang Kamara laban o kaugnay ng sitwasyon ni Leviste.

Una nang kinumpirma ni NBI Director Melvin Matibag na lumabas ng bansa si Leviste kasama ang kanyang ina na si Senator Loren Legarda noong Agosto dos.

Kasunod ito ng mga ulat na maaaring kasuhan ng NBI si Leviste at iba pang indibidwal kaugnay ng umano’y “honey trap” plot laban kay Executive Secretary Ralph Recto, bukod sa plunder case na may kaugnayan sa solar energy commitment.  | mula sa panulat ni Geli Mendez

Tatlo pang testigo ang nakatakdang iharap sa impeachment trial na may kaugnayan sa Article 1 o maling paggamit ng confidential funds ni Vice President Sara Duterte.

Kabilang sa i-prisinta ng House Prosecution Panel ang misis ni dating DepEd Special Disbursing Officer Edward Fajarda na si dating DepEd Assistant Secretary Sunshine Fajarda; Police Major Jovelyne Maggay; at COA Assistant Commissioner Bresilio Sabaldan.

Ito’y para patunayan ang misuse of confidential funds ng Bise Presidente na aabot sa P612.5 million, kung saan, ang P500 million ay nagastos sa ilalim ng OVP at ang P112.5 million naman ay nagastos sa ilalim ng DepEd noong si VP Sara pa ang namamahala nito.

Una nang sinabi ni House Lead Prosecutor Gerville Luistro na kanila nang tatapusin ang presentasyon ng testigo at ebidensya sa Article 1 ngayong linggo bago magtungo sa susunod na artikulo.

Matatandaang nilinaw kahapon ni Luistro na kanilang isusunod ang Article 2 na tumutukoy sa unexplained wealth o hindi maipaliwanag na yaman ni VP Sara bago talakayin ang Article 3 o bribery and corruption.

Sinabi ni Luistro na ang pagbabago sa presentasyon ng Articles of Impeachment ay hindi nangangahulugang mahina o ibinasura na ang Article 3, kundi dahil sa availability ng mga testigong haharap sa impeachment trial.

Nilinaw ng Lead Prosecutor na walang ilalaglag na artikulo at mananatili sa kanilang presentasyon ang Article 3. | mula sa panulat ni Geli Mendez

Handang harapin ni dating House Speaker at Leyte Rep. Martin Romualdez ang mga alegasyong ibinabato laban sa kaniya sa legal na proseso.

Kasunod ito ng kasong plunder na isinampa ng Office of the Ombudsman sa Sandiganbayan laban sa kaniya, kay dating Cong. Zaldy Co, at iba pang sangkot umano sa kickback scheme sa flood control projects.

Ayon kay Atty. Ade Fajardo, ang abogado at tagapagsalita ni Romualdez, iginagalang ng mambabatas ang mga korte at haharapin nito ang mga alegasyon laban sa kaniya alinsunod sa batas.

Ayon kay Fajardo, hindi dapat mapalitan ng public interest o malaking atensyon ng publiko ang judicial process, dahil ang criminal liability ay dapat matukoy batay sa mga ebidensiyang inilalahad sa korte.

Nilinaw din ng abogado na walang hinihiling na espesyal na pagtrato si Romualdez habang hinaharap ang mga paratang laban sa kaniya.

Ang hinihiling lamang umano ng dating Speaker ay ang parehong due process at makatarungang pagdinig na ipinagkakaloob sa bawat Pilipino.

Iginiit ni Fajardo na dapat manaig ang katotohanan, ebidensya, at patas na proseso sa paghatol ng kaso. | mula sa panulat ni Geli Mendez