Iniimbestigahan na ng Philippine Army ang insidente ng pisikal na pang-aabuso ng isang instructor sa ilang national guard trainee sa isang fellowship activity ilang araw bago ang kanilang graduation sa loob ng Camp Capinpin sa Tanay, Rizal.
Batay sa salaysay ng isa sa mga national guard trainee, hindi bababa sa sampu ang pinagbuhatan ng kamay ng nirereklamong instructor, na may ranggong staff sergeant, na sinasabing lasing noong nangyari ang insidente.
Ayon kay Army 2nd Infantry Division spokesman Colonel Micahel Aquino, hindi kukunsintihin ng Philippine Army ang anumang paglabag sa disiplina ng alinman sa mga military personnel nito.
Kung mapatutunayan anyang ginawa ng nirereklamong instructor ang umano’y pang-aabuso laban sa mga trainee, maaari itong parusahan, ngunit hindi idinetalye kung kabilang ang pagharap nito sa court martial. — sa panulat ni Anjo Riñon
