Aabot sa 156 na mga armas at nasa 10 improvised explosives device (IED) ang nakumpiska ng Armed Forces of the Philippines (AFP) mula sa bandidong Abu Sayyaf.
Ito ang inihayag ni AFP Chief of Staff Gen. Gilbert Gapay kasunod ng pagtitiyak nito na paiigtingin pa nila ang kampaniya laban sa bandidong grupo.
Batay sa datos, aabot na sa 68 bandido ang kanilang napatay sa operasyon habang nasa 128 naman ang sumuko na sa pamahalaan.
Magugunitang sumuko sa militar nitong Biyernes ang nasa 15 Abu Sayyaf kabilang na ang sub-leader nito sa ilalim ni Radullan Sahiron na sina Alvin Yusop at Arab Puti.
Kasamang isinuko ng mga bandido sa Joint Task Force Sulu ang nasa 14 na matataas na kalibre ng armas na nasa pag-iingat ng mga ito.