SHOWBIZ

Nagsumite ng counter-affidavit si Nico Waje kaugnay ng reklamong acts of lasciviousness na isinampa ng dati niyang katrabaho na si Athena Imperial.

Ayon sa kanyang abogado, handa si Waje na sagutin ang mga paratang at naninindigan na wala siyang kasalanan.

Sinabi rin ng kampo ni Waje na nakahain na ang kaso para sa resolusyon ng piskalya, na maaaring abutin ng hanggang 60 araw bago maglabas ng desisyon.

Giit ng depensa, wala umanong itinatago si Waje at tiwala sila sa magiging resulta ng imbestigasyon. Samantala, hinihintay pa rin ang subpoena kaugnay ng isa pang reklamong isinampa laban sa kanya.

Nanindigan ang aktor na si Coco Martin na wala siyang planong pumasok sa pulitika.

Ayon kay Coco, madalas siyang tinatanong tuwing paparating ang eleksyon kung siya’y tatakbo para sa anumang posisyon sa pamahalaan.

Paliwanag ng action star, bagaman bilib siya sa kakayanan ng mga matitino at mahuhusay na public servants, naniniwala siya na makatutulong pa rin naman siya kahit wala siyang posisyon sa pamahalaan.

Giit ni Coco, sapat na para sa kanya ang makatulong sa simple at tahimik na pamamaraan.—sa panulat ni Reianne Antiquina

Masayang ibinahagi ng aktres at vlogger na si Alex Gonzaga na muli siyang nagdadalang-tao matapos mauwi sa miscarriage ang kanyang mga naunang pagbubuntis.

Sa isang video montage, ibinahagi ng vlogger ang ilan sa mga naging bahagi ng kanyang pregnancy journey.

Sinabi ni Alex na naghahanda na silang mag-asawa para sumailalim sa in vitro fertilization o IVF ngunit dumating ang hindi nila inaasahang blessing nang malamang buntis na siya.

Nagpaabot naman ng pagbati at suporta ang mga netizens at kaibigan ng aktres kabilang na ang kapwa vlogger na si Toni Fowler. —sa panulat ni Reianne Antiquina

Inakusahan ni Miss Universe co-owner Raul Rocha si Chavit Singson bilang isang “delusional fool” sa gitna ng nagpapatuloy na alitan kaugnay sa pagmamay-ari ng prestihiyosong pageant organization, habang iginiit ng Miss Universe Organization na nananatili pa rin itong pag-aari nina Rocha at Anne Jakrajutatip.

Sa isang Instagram story, tinawag ni Rocha ang isang “delusional fool at ang kanyang anak” dahil sa umano’y mga pahayag laban sa Miss Universe Organization, bagama’t hindi niya tahasang pinangalanan si Singson.

Gayunman, ang pahayag ng Mexican business mogul ay lumabas ilang sandali matapos igiit ng dating gobernador ng Ilocos Sur na hindi na umano sina Rocha at Jakrajutatip ang may-ari ng M.U.O.

Mariin namang itinanggi ng Miss Universe Organization ang naturang pahayag sa isang opisyal na pahayag na inilabas sa kanilang website at mga social media platform.

Tinuligsa rin ng organisasyon ang mga nagpapakalat ng umano’y “mali at mapanlinlang na mga pahayag” laban sa kanila.—Sa panulat ni John Riz Calata

Isinauli ni Zsa Zsa Padilla ang kanyang Aliw Lifetime Achievement Award matapos ipahayag ang pagkadismaya sa naging takbo ng Aliw Awards 2025 awarding ceremony.

Sa isang post sa kanyang Instagram account, sinabi ng beteranang singer-actress na una niyang ikinatuwa ang pagkilala at handa sana siyang magpasalamat sa mga taong tumulong sa kanyang karera.

Ngunit nabigo siya nang hindi sila bigyan ng pagkakataong magsalita sa entablado.

Ayon kay Zsa Zsa, matapos iabot ang nasabing pangaral, pinababa na agad sila sa stage ng mga production staff.

Pahayag pa ng singer na sa halip na maramdaman ang pagkilala ay panliliit ang kanyang naramdaman kaya ito anya ang dahilan kung bakit napagpasyahan niyang isauli ang award.

Hiling ni Zsa Zsa sa Aliw Awards na igalang nang wasto ang mga ginagawaran, at bigyan ng pagkakataong makapagsalita ang mga Lifetime Achievement awardees.

—sa panulat ni Jordan Gutierrez

Pumanaw na ang isa sa mga bokalista ng sikat na  bandang Aegis na si Mercy Sunot.

 Si Mercy ay binawian ng buhay dahil sa sakit na breast at lung cancer.

 Kahapon lamang ay nanawagan siya ng dasal sa publiko matapos itakbo sa ospital dahil nahihirapan itong huminga.

 Nakilala ang sikat na biritera dahil sa mga kantang “halik”, “luha”, at “basang-basa sa ulan”.  – Sa panulat ni Riz Calata

Binawian ng buhay sa edad na 73-anyos  ang Filipino music icon na si Coritha.

Kinumpirma ito ng kaniyang mister na si Chito Santos sa isang interview.

Matatandaan na naging bedridden si Coritha matapos itong ma-stroke dahil sa sakit na diabetes.

Si Coritha ang nagpasikat ng mga kantang “Oras Na,” “Lolo Jose,” at “Sierra Madre” noong dekada sitenta.