NATIONAL NEWS

Nasa 50,000 estudyante sa grade 1 hanggang 3 sa NCR ang hirap magbasa base sa isang assessment na ng DepEd.

Sa survey ng DepEd, higit 384,000 mag-aaral mula sa mga nasabing baitang ang dumaan sa comprehensive rapid literacy assessment bago simulan ang kasalukuyang school year.

Ayon kay DepEd-NCR Director Wilfredo Cabral, patuloy na hinahanap sa eskwelahan ang mga non-numerates at non-literates.

Tinitiyak ng DepEd-NCR na handa na sila sa mandatory full in-person classes simula Nobyembre 2. —sa panulat ni Jenniflor Patrolla

Pumalo na sa P193 million ang jackpot prize ng Grand Lotto 6/55 para sa susunod na bola ngayong araw.

Ayon sa Philippine Charity Sweepstakes Office (PCSO), maaari pang tumaas ang pa-premyo ng Grand Lotto 6/55 sakaling hindi parin ito masungkit ng mga mananaya.

Nabatid na walang nakahula sa kakatapos lamang na bola ng six-digit winning combination number ng Grand Lotto 6/55 na 30-46-20-17-34-15 kaya’t hindi rin naiuwi ang katumbas nitong premyo na P184,889,840. 40 centavos.

Nasa 12 mananaya naman ang nanalo ng tig-P100-K para sa second prize matapos mahulaan ang tig-limang tamang numero.

Hinikayat naman ng PCSO ang publiko na tangkilikin ang kanilang palaro upang magkaroon ng tiyansang maging susunod na milyonaryo.

Aabot sa 12 million pesos na halaga ng dalawang Solar-Powered Irrigation System (SPIS) ang ipinagkaloob ng Department of Agrarian Reform (DAR) katuwang ang National Irrigation Administration (NIA) sa grupo ng mga magsasaka sa bayan ng Tanza at Magallanes, Cavite.

Ayon sa DAR-Cavite, nasa 32 ektarya ng agricultural land ang kayang patubigan ng SPIS at mapapakinabangan ng 34 na Agrarian Reform Beneficiaries (ARB).

Maka-titipid sa gastos ang mga magsasaka dahil mas mura ang solar energy kumpara sa diesel at gasolina.

Makatutulong din ito sa pagbibigay ng maaasahang pagkukunan ng kuryente lalo sa mga rural areas.  —sa panulat ni Jenniflor Patrolla

Tiniyak ng LTO sa publiko na protektado at secured ang kanilang personal information.

Ito’y sa kabila ng ulat na may isang LTO District Office ang nag-o-obliga sa mga kliyente nito na magbigay ng ID at password para sa pag-a-apply ng renewal ng motor vehicle registration sa ilalim ng Land Transportation Management System Company Portal.

Ayon kay LTO Chief Teofilo Guadiz, III, hindi ina-access ng ahensya at mga empleyado ang mga personal account ng kliyente kapag nagpo-proseso ng kanilang transaksyon.

Mag-iisyu anya sila ng comrehensive set ng guidelines para sa paggamit ng ID at impormasyong nakuha mula sa aplikasyon para matiyak ang pagsunod sa data privacy act.

Ipinag-utos na rin ni Guadiz ang pagsasagawa ng imbestigasyon sa nasabing insidente at tiniyak na mananagot ang sinumang empleyado na lumabag sa naturang batas. —sa panulat ni Jenniflor Patrolla

Nasa 318 preso ang inaasahang mapapalaya ng Department of Justice ngayong taon alinsunod sa Good Conduct Time Allowance (GCTA) Law upang mapaluwag ang mga kulungan sa bansa.

Ayon kay Justice Secretary Jesus Crispin Boying Remulla, ang mga bilanggo ay naghihintay na lang ng pirma ni Pangulong Ferdinand Marcos Junior upang mabigyan ng clemency, pardon at commutation of sentence.

Una nang pinalaya ang nasa 371 persons deprived of liberty (PDL) noong September 13 dahil sa maayos na record at base sa iba pang kondisyon na nakasaad sa nasabing batas.

Inatasan na rin ng kalihim ang Bureau of Corrections (BuCor) na dalasan ang pagbibigay ng karpeta sa Parole and Probation Administration at sa Public Attorney’s Office (PAO) para mapabilis ang pagpapalaya sa mga nakapiit.

Iginiit naman ni PAO Chief, Atty. Persida, target na makapagpalaya ng bagong batch ng PDL sa October 25.  —sa panulat ni Jenniflor Patrolla

Pabor si House Appropriations Committee Vice Chairman at Iloilo Representative Janette Garin na tanggalin na ang hybrid session sa kamara sa halip ay bumalik na sa face-to-face sessions.

Ayon kay Garin, magiging maayos ang ekonomiya ng bansa kung makikitang balik na sa normal ang trabaho sa mga pangunahing tanggapan ng gobyerno.

Kinatigan naman ni Albay Representative Edcel Lagman sa pahayag ni Garin sa plenaryo.

Aminado si Lagman na mahirap din ang hybrid lalo’t hindi naman stable lahat ng internet connection ng mga kongresista.

Sinimulan ang hybrid session ng senado at kamara noong Mayo 2020 dahil sa COVID-19 pandemic.

Sa Setyembre 30 magsisimula break ng kamara habang sa Nobyembre 6 ang balik ng sesyon. —sa panulat ni Jenniflor Patrolla