Inaprubahan na ng Civil Service Commission (CSC) ang qualification standards para sa 10,000 bagong posisyon ng School Counselor Associate I, na magpapalakas sa mental health services sa mga pampublikong paaralan.
Ayon kay Education Secretary Sonny Angara, malaking hakbang ito sa pagpapatupad ng Republic Act No. 12080 na naglalayong palakasin ang mental health support sa mga paaralan.
Sa ilalim ng batas, maaaring maging counselor associate ang mga nagtapos ng psychology, behavioral science, o guidance and counseling na may 200 oras ng kaukulang pagsasanay, kahit wala silang lisensya mula sa Professional Regulation Commission.
May nakalaan nang humigit-kumulang P2 bilyong pondo para sa unang 10,000 posisyon, habang naghahanda na ang DepEd ng mga panuntunan para sa recruitment at deployment ng mga ito.
