Walang balak magsagawa ng kudeta ang National Unity Party (NUP) sa Kamara sa liderato ni House Speaker Faustino Dy III, sa kabila ng kanilang mga “concern” sa 2027 national budget.
Ito ang sinabi ni NUP Chairman at Antipolo Rep. Ronaldo “Ronnie” Puno, na tapat sila sa liderato ng Kamara, pero dapat malaya rin silang maglabas ng saloobin at pagkabahala nang hindi agad tinatawag na “rebelde.”
Para kay Puno, hindi dapat parusahan ang mga mambabatas dahil lamang sa pagpapahayag ng kanilang salungat na pananaw.
Kinumpirma rin ni Puno na nakausap na nila si House Majority Leader Sandro Marcos kaugnay ng mga isyu sa 2027 national budget.
Magsusumite ang NUP sa Budget Amendments Review Sub-Committee o BARSC ng listahan ng mga concern at special provisions sa panukalang budget, kabilang ang infrastructure, social services, at local government support funds.
Nais din nilang itigil ang “for later release” sa mga proyekto; ipagbawal ang pag-impound sa mga pondo; at unahing ipatupad ang programmed funds kaysa sa unprogrammed funds. | Sa panulat ni Geli Mendez
