Ipinasubpoena ng House Prosecution Panel sa Senate Impeachment Court ang pitong bangko at pitong insurance at financial companies na may kaugnayan kay Vice President Sara Duterte at asawang si Atty. Manases Carpio.
Ito’y bilang paghahanda ng prosecution sa presentasyon ng mga financial records ng mag-asawang Duterte-Carpio sa impeachment trial.
Kabilang sa mga bangkong pinahaharap sa Oktubre 6 ang mga kinatawan mula sa Land Bank of the Philippines, BPI, BDO, Metrobank, PNB, PSBank at Asia United Bank para ilatag ang mga financial records na kailangan ng prosecution.
Kabilang naman sa mga insurance company na ipinatawag ang Prudential Life, Allianz, Manulife, FWD Life, BPI-AIA Life, BDO Securities at BDO Life.
Ayon kay House Lead Prosecutor Gerville Luistro, ihaharap ang mga testigo batay sa pagkakasunud-sunod ng subpoena request.
Ito’y bilang bahagi ng presentasyon ng prosecution sa Article II ng impeachment case, na tumatalakay sa umano’y hindi maipaliwanag na yaman at mga financial transactions ng Bise Presidente. | Sa panulat ni Geli Mendez
