Magsasagawa ng imbestigasyon ang Quezon City Council hinggil sa insidente na kinasasangkutan ni QC Councilor Ranulfo “Tatay Rannie” Ludovica at isang enforcer ng Land Transportation Office (LTO) sa isinagawang rally sa People Power Monument, kahapon.
Ayon sa konseho, layunin ng imbestigasyon na matukoy ang buong pangyayari at malaman kung ang mga naging hakbang ng mga sangkot ay naaayon sa pamantayan ng pag-uugaling inaasahan sa mga lingkod-bayan.
Binigyang-diin din ng Quezon City Council na kinikilala nito ang dedikasyon ng mga pampublikong opisyal, kabilang si Councilor Ludovica.
Gayunman, sinabi nitong ang pananagutan at pagpapahayag ng mga lehitimong hinaing ay dapat isagawa nang may paggalang, propesyonalismo, at pagrespeto sa karapatan at dignidad ng iba.
Umaasa rin ang konseho na mabibigyan ng patas na pagdinig at due process ang lahat ng mga sangkot, at magsisilbing paalala ang insidente sa kahalagahan ng etikal na pamumuno, responsableng serbisyo publiko, at pananagutan.
Iginiit ng Quezon City Council na nananatili itong nakatuon sa pagpapanatili ng integridad ng pampublikong serbisyo at pagpapalakas ng tiwala ng publiko sa pamamagitan ng propesyonalismo at mabuting pamamahala. | via Jenn Patrolla (Patrol 38)
