Posibleng maging permanente ang pagbabawal sa online game na GoreBox sa Pilipinas matapos umanong tumanggi ang developer nito na ipaliwanag sa mga awtoridad ang mga safety measures ng laro.
Ayon sa Cybercrime Investigation and Coordinating Center (CICC), mananatiling naka-block ang access sa GoreBox hangga’t hindi napapatunayan ng developer na may sapat itong age verification at iba pang proteksyon upang hindi ito magamit ng mga menor de edad.
Matatandaang pansamantalang ipinatigil ng CICC ang access sa laro noong Hunyo 23, kasunod ng pamamaril sa isang paaralan sa Tacloban City na ikinasawi ng tatlong estudyante at ikinasugat ng iba pa.
