Tutol si Senador Risa Hontiveros sa panukalang ibaba ang minimum age of criminal liability sa bansa.
Sa panayam sa Kapihan sa Manila Prince Hotel, inihayag ng senador na hindi solusyon ang pagpapababa ng edad ng pananagutang kriminal kasunod ng panawagang amyendahan ang batas matapos ang pamamaril sa isang paaralan sa Tacloban City.
Gayunman, bukas si Senador Hontiveros na repasuhin at amyendahan ang Republic Act No. 9344 o ang Juvenile Justice and Welfare Act upang mas mapalakas ang pagpapatupad ng nasabing batas.
Dapat aniyang pagtuunan ng pansin ang mas komprehensibo at epektibong intervention at diversion programs para sa mga batang nasasangkot sa krimen.
Binigyang-diin ni Senador Hontiveros na ang anumang pagbabago sa batas ay dapat nakabatay sa prinsipyo ng “best interest of the child,” habang tinitiyak na may sapat na suporta at rehabilitasyon para sa mga batang nagkakasala at mas napapalakas ang proteksyon sa mga biktima at komunidad.—sa panulat ni Jordan Gutierrez
