Ibinabala ng Department of Education na maaaring mapatawan ng non-readmission o expulsion ang mga estudyanteng mapatutunayang nagdadala ng nakamamatay na armas sa paaralan o gumagawa ng bomb threats.
Ayon kay Education Secretary Sonny Angara, layunin ng mas mahigpit na parusa na mapigilan ang karahasan sa mga paaralan kasunod ng mga insidente tulad ng pamamaril sa Tacloban City at iba pang pananaksak na kinasangkutan ng mga estudyante.
Batay sa pinalakas na Ensuring a Safe and Motivating Learning Environment Guidelines ng DepEd na ganap nang ipinatutupad sa lahat ng pampublikong paaralan, kabilang sa mga mabibigat na paglabag ang pagsali sa street gangs, pandaraya sa pagsusulit, pagdadala ng iligal na droga at alak.
Gayundin ang pananakit na nagdudulot ng malubhang pinsala, acts of lasciviousness, at pagpapakalat ng mapanlait o sexual video ng sarili, kapwa mag-aaral, o kawani ng paaralan.
Inatasan din ang mga paaralan na agad iulat ang mga nabanggit na kaso sa mga kinauukulang otoridad para sa kaukulang legal at social welfare intervention.—sa panulat ni Jordan Gutierrez
