Nilinaw ni Education Secretary Sonny Angara na hindi pa madaling maipatupad ang online classes para sa karamihan ng mga estudyante sa kabila ng pangamba ng ilang magulang sa kaligtasan sa paaralan.
Ayon kay Secretary Angara, may ilang paaralan na nag-aalok ng nasabing setup, ngunit limitado ito dahil marami pa ring pamilya ang walang sapat na internet access at kinakailangang teknolohiya.
Sa halip na palawakin ang online learning, iginiit ng kalihim na nakatuon ang DepEd sa pagpapalakas ng seguridad sa mga paaralan.
Kabilang sa mga hakbang ang pagdaragdag ng presensya ng pulisya at mga security guard, paggamit ng CCTV cameras, at pagpapatupad ng iba pang safety protocols upang matiyak ang ligtas na face-to-face classes.
Ginawa ang mga hakbang sa seguridad kasunod ng mga insidente ng karahasan at banta sa mga paaralan, kabilang ang pamamaril sa Tacloban City at mga pekeng ulat na nagdulot ng takot sa ilang paaralan sa Quezon City at Cebu City.—sa panulat ni Jordan Gutierrez
