NATIONAL NEWS

Isinusulong ni Cebu City Rep. Eduardo Roa Rama sa Kamara ang House Bill 4607 na layong magtayo ng  dengue virus testing at  screening center sa bawat siyudad at munisipalidad sa buong bansa.

Ilalagay ang nasabing testing centers sa mga pampublikong ospital bilang pangunahing laboratoryo para  matukoy ang dengue virus.

Ito aniya ay upang maagang masuri ang dengue sa pamamagitan ng clinical examination kasama ang simple at  mabilis na diagnostic tool na ibibigay ng libre sa pasyente.

Iginiit pa ni Rama na napatunayan  na ang mahalagang papel ng mga community-based testing sa pag-iwas at pagkontrol sa iba’t ibang sakit, na malaki ang naitutulong sa  pagtatala at pag-uulat ng mga kaso.

Naobserbahan ng Department of Health ang bahagyang pagsirit ng mga kaso ng COVID-19 sa kalagitnaan ng Agosto o nang magsimula ang face-to-face classes ng mga estudyante.

Sinabi ni DOH officer-in-charge Maria Rosario Vergeire na tumaas ang mobility patterns sa Metro Manila at iba pang rehiyon sa ikatlong linggo ng naturang buwan.

Paliwanag ng opisyal, ang pagtaas ng mga kaso ay bunsod ng kumpiyansa ng publiko sa proteksyon na ibinibigay ng bakuna at pagbubukas ng iba pang sektor gaya ng edukasyon.

Binigyang diin naman ni Vergeire na ang mahalaga ay nananatiling mababa ang severe at critical cases at hindi rin tataas ang hospital admissions.

Sinabi pa nito na ang opsyonal na paggamit ng face mask ay walang direktang kaugnayan sa pagtaas ng trend ng mga kaso ng COVID-19.

Umabot sa 20 minuto ang naging talumpati ni Pangulong Ferdinand Marcos Jr., sa 77th session ng United Nations General Assembly na ginanap sa New York City, USA.

Sa kanyang pagsalang sa UN General Debate, iba’t ibang malalaking usapin ang tinalakay ng Pangulo kabilang ang food security, rule of law at climate change.

Inihayag din ni Pangulong Marcos ang mahahalagang ginampanan ng mga Filipino health workers sa iba’t ibang bansa upang labanan ang pandemya.

Hinimok din nito ang lahat na patuloy na isaalang-alang ang kapayapaan at magpatupad ng paghihigpit sa mga patakaran sa pagkakaloob ng armas.

Samantala, nanawagan din ang Punong Ehekutibo na tulungan ang mga maliliit na bansa upang hindi mahuli sa mithiing makamit ang pandaigdigang pag-unlad. —ulat mula kay Jopel Pelenio (Patrol 17)

Ipinag-utos ni Department of Migrant Workers secretary Susan Ople sa Overseas Workers Welfare Administration ang pagbibigay ng tulong sa Overseas Filipino Workers sa Japan na naapektuhan ng Typhoon Nanmadol.

Maliban sa OWWA, inatasan din ni Ople ang Philippine Overseas Labor Offices (POLOs) na patuloy na bantayan ang sitwasyon ng mga OFW, gayundin ang pagiging handa sa pagkakaloob ng tulong sa mga ito.

Nabatid na nasa 13,904 OFWs ang saklaw ng POLO-Osaka na nananatiling ligtas sa Typhoon Nanmadol, kung saan  5,368 OFWs ang nasa Fukuoka, 660 sa Saga, 1,001 sa Nagasaki, 2,520 sa Kumamoto, 1,607 sa Oita, 786 sa Miyazaki, at 1,962 sa Kagoshima.

Mayroon namang 22,000 OFWs na sakop ng POLO-Tokyo.

Samantala, inatasan na rin ni Ople ang Polo at iba pang labor officials sa Taiwan na magbigay sa kanya ng updates matapos ang malalakas na lindol na tumama sa lugar.

Bumilis pa ang internet speed sa Pilipinas sa buwan ng Agosto.

Batay sa internet speed monitoring firm speedtest ng OOKLA, umakyat sa ika-45 pwesto ang Pilipinas sa 182 na  bansa.

Ito ay matapos bumilis sa 78.33 megabits per second o mbps ang fixed broadband median download speed ng bansa, mula sa 75.62 mbps noong Hulyo.

Pagdating naman sa mobile internet median speed, umakyat sa ika-82 ang pwesto ng Pilipinas mula sa ika-84 noong Hulyo.

Kasunod ito ng pagbilis ng mobile median download speed sa 22.35 mbps.

Sa 50 asian countries, nasa ika-14 na pwesto ang Pilipinas pagdating sa fixed broadband at ika-29 naman sa mobile.

Nasa 12th spot naman ang bansa sa fixed broadband at 17th naman sa mobile sa Asia Pacific Region.

Umamin ang Firearms and Explosives Office na nagkaroon nga ng system glitch o problema sa kanilang online system at sang-ayon ito kay PCol. Paul Kenneth Lucas ang hepe ng PNP Firearms and Explosives Office (FEO).

Sinabi ni Col. Lucas sa isang panayam na naimpormahan siya ng mga taga FEO IT at napagalaman na nagkaroon ng problema matapos ang system upgrade at migration na isinagawa ng Firearms and Explosive Office.

Ayon nga kay Col. Lucas, double-time na inaayos ng FEO IT provider ang online system ng FEO at humingi ng paumanhin sa publiko lalong-lalo na sa mga nagmay-ari ng baril na naapektuhan ng system glitch at nadagdagan ng mga baril ang kanilang online registration.

Humihingi ng pag-intindi si Col. Lucas sa mga naapektuhang mga tao at sinisikap nila na maayos ang online system ng FEO bago nila muling buhayin ang kanilang online system at tinitiyak na ito ay maayos sa lalong madaling panahon.  —ulat mula kay Raoul Esperas (Patrol 45)

Nagpaalala sa mga pampublikong sasakyan ang Land Transportation Franchising and Regulatory Board (LTFRB) na hindi pa maaaring maningil ang mga tsuper na wala pang panibagong fare matrix o taripa na nakapaskil sa kanilang mga sasakyan.

Kasunod ito ng pag-apruba ng LTFRB sa hiling ng mga grupo ng transportasyon hinggil sa inaasahang pagtaas ng pamasahe na magsisimula sa October 3, 2022.

Kabilang sa mga pampublikong sasakyan na magtataas ng singil sa pamasahe ay ang mga traditional modern jeepney, pampasaherong bus, taxi at TNVS.

Ayon sa LTFRB, dapat na nakikita ng mga pasahero ang fare matrix sa kanilang pagsakay upang matiyak na tama ang singil sa kanila ng mga tsuper at konduktor.

Ang mga tsuper at konduktor na hindi susunod o lalabag sa alituntunin ng ahensya ay posibleng maharap sa kaukulang parusa.