NATIONAL NEWS

Nagkaroon ng pagpupulong sina Pangulong Bongbong Marcos Jr. at French President Emmanuel Macron sa sidelines ng 77th United Nations General Assembly (UNGA) sa Estados Unidos.

Sa social media post ni Presidential Son at Ilocos Norte Rep. Sandro Marcos makikita sa larawan na nagkamayan ang dalawang lider.

Ngunit kahit wala pang detalye sa naganap na pagpupulong nina Pang. Marcos at ng French President, matatandaan na nagkausap na ang dalawa sa telepono ilang araw bago ang UNGA.

Dito, kanilang napag-usapan ang higit na pagpapalakas ng bilateral relation ng Pilipinas at France at higit na paigtingan ang ugnayan sa larangan ng depensa, food security at low-carbon energy.

Kaugnay nito, kinumpirma naman ng palasyo na maaring magkaharap na sina PBBM at US President Joe Biden sa darating na Biyernes,  oras sa Pilipinas. - sa panunulat ni Jopel Pelenio (Patrol 17).

Nanawagan ang isang grupo ng taxi operator sa Land Transportation Franchising and Regulatory Board (LTFRB) na payagan silang gawing 60 pisong flag-down rate para makatulong na maibsan ang kanilang kalagayan na dala ng pagtaas ng presyo ng produktong petrolyo.

Ayon kay National Taxi Operators Association President, Attorney Jesus Manuel Suntay, hindi sapat ang kamakailan lamang na limang pisong dagdag sa flag-down rate ng mga taxi at Transport Network Vehicle Services (TNVS).

Katumbas lamang aniya ito ng karagdagang 100 piso kung mayroon silang average na 20 pasahero kada araw.

Giit pa ni Suntay na walang tulong ang limang pisong flag-down rate sa tumataas na presyo ng gasolina.

Kaya’t ang panukalang 60 pisong rate ay nakabase sa kasalukuyang halaga ng produktong petrolyo at bilang ng mga pasahero kada araw.

Matatandaan na inaprubahan ng LTFRB ang pisong provisional increase sa minimum na pasahe sa traditional at modern jeepneys.

Nasa 15 imported cases ang naitala ng Hong kong na mula sa Pilipinas.

Ito ay bagama’t bumababa na ang kaso ng infection sa Hong Kong na umaabot na lamang ng halos 6,000 kada araw.

Bukod sa Pilipinas, nakapagtala rin ang Hong Kong ng imported cases mula sa United Kingdom, Thailand, United States of America at Indonesia.

Sa halos 6,000 bagong COVID cases sa Hong Kong, 135 dito ang imported.

Isa ring 2-taong gulang na COVID patient sa Hong Kong na may cerebral edema ang nasa malubhang kalagayan.

Aaksyunan ni Quezon City Representative Patrick Michael Vargas sa liderato ng kamara ang panukalang batas na nagsusulong ng P 10K na teaching supplies allowance para sa pampublikong mga guro sa ating bansa.

Ayon kay Vargas na siyang may akda ng House Bill 1472 , magandang regalo ngayong National Teachers Month na matugunan ng kongreso ang iba’t ibang pangangailangan o panawagan ng mga guro.

Paraan din ito ng pasasalamat sa mga teacher na ang dedikasyon at sakripisyo ay natatangi para lamang matiyak ang dekalidad na edukasyon para sa mga estudyante sa gitna pa rin ng COVID-19 pandemic.

Aniya, ang teaching supplies allowance ay ipagkakaloob sa mga pampublikong guro taon-taon.

Sinabi ni Vargas, ang P 10K teaching supplies ay uubra ngang pambili ng mga gamit para sa pagtuturo ng mga guro.

Nakumpiska ng mga otoridad ang mahigit 900 gramo na umano’y shabu na nagkakahalaga ng P6.2 -M mula sa isang high-value target sa Pasig City.

Dahil dito, arestado sa operasyon ang 18- taong gulang  na suspek na kinilalang si Jun Lawrence Lao alyas payat.

Samantala, mahaharap naman ang naturang suspek sa kasong paglabag sa Republic Act 9165 o Comprehensive Dangerous Drugs Act of 2002.

Inihayag ng Department of Information and Communications Technology (DICT) na kakulangan sa budget at kawalan ng manggagawa ang dahilan na pumipigil upang hindi  makapagpatayo ng isang Government Data Center.

Ito ang sinabi ni DICT Undersecretary David Almirol Jr. ang naturang suliranin nitong Martes kasabay ng pagdinig ng Senate Finance Committee para sa P 7.23-B proposed budget ng ahensya sa 2023.

Aniya, mababa rin ang sahod ng mga IT kaya’t walang nananatili sa mga ito.

Samantala, kung maitatatag aniya ito, mapag-iisa na ng Government Data Center ang lahat ng impormasyon sa buong Pilipinas malayo sa kasalukuyang sistema na kalat-kalat at hindi organisadong information systems.

Mahigpit na binabantayan ng mga tauhan ng Manila Police District (MPD) ang ilang mga freedom parks sa Lungsod ng Maynila.

Partikular na rito ang Mendiola, Plaza Miranda at Liwasang Bonifacio kung saan inaasahan ang pagdagsa ng mga magpo-protesta kaugany sa ika-limampung anibersaryo ng pagdeklara ng Martial Law.

Ayon kay MDP Director Police Brigadier General Andre Dizon, tanging sa Liwasang Bonifacio lamang papayagang magkasa ng rally habang ipapatupad ang “No Permit, No Rally” sa Mendiola at Plaza Miranda.

Batay sa utos ni Manila Mayor Honey Lacuna, nag-deploy ang MPD Civil Disturbance Management (CDM) ng ilang mga tauhan upang magbantay at matiyak ang kaayusan sa mga naturang lugar.

Bukod dito nagtalaga na rin ang Manila Fire District ng kanilang mga trucks at may naka-stand by na ring mga ambulansya.  –  mula sa ulat ni Aya Yupangco (Patrol 5)

Nilinaw ng isang grupo na tataas ang presyo ng lokal na bigas sa susunod na buwan.

Sa panayam ng DWIZ, ipinaliwanag ni Bantay Bigas Spokesperson Cathy Istavillo na domino effect ang nangyayari sakaling tumaas ang presyo ng imported na bigas ay maapektuhan din ang lokal na produksyon nito.

Sinabi pa ng tagapagsalita na napakalaki ng apat na piso hanggang limang pisong pagtaas ng presyo ng bigas.

Samantala, sinabi ni Istavillo na dapat paghandaan ito ng gobyerno dahil hindi kakayanin ng mamamayan ang mataas na presyo ng naturang produkto.

Itinuturing ng Ibon Foundation na ito na ang pinakamalalang paghina ng piso sa kasaysayan.

Sa panayam ng DWIZ, nilinaw ni Executive Director Sonny Africa ng IBON Foundation na hindi lamang ang digmaan ang maituturing na pangunahing problema sa pagbagsak ng piso.

Kundi kabilang aniya rito ang pagtaas ng interest rate sa Estados Unidos.