NATIONAL NEWS

Inihayag ng Commission on Elections (COMELEC) na mula sa 60 araw, paiikliin na sa apatnapu hanggang 45 araw ang campaign period para sa Barangay at Sangguniang Kabataan (BSK) Elections.

Ayon kay COMELEC chairman George Garcia, babawasan nila ang araw ng kampaniya ng mga kandidato upang maiwasang maharass ng mga tatakbo sa eleksiyon ang taumbayan.

Sinabi ni Garcia na wala pang pinal na desisyon sa paglipat ng mga petsa particular na ang araw ng pagsisimula ng election period, at gun ban kasabay ng paghahain ng Certificates of Candidacy mula October 6 hanggang 13.

Dagdag pa ni Garcia, maglalagay din ang National Printing Office (NPO) ng mga bagong feature sa mga balota na ascending serial number na makikita ng publiko partikular na ng mga botante.

Layunin ng ahensya na maipakita ang kanilang kahandaan sa paghawak ng eleksiyon anuman ang magiging sitwasyon o desisyon ng Kamara at Senado.

Umani ng batikos mula sa mga netizen ang isang kilalang lechon manok brand matapos magpatupad ng “No Tattoo” job requirement.

Nagviral ang naturang food outlet matapos ipost ng isang netizen sa kaniyang facebook account, ang larawan ng job opening ng Baliwag Lechon Manok at Liempo, dahil sa diskriminasyon nito sa kanilang hiring process.

Mabilis na nakatawag ng atensiyon ang post ng facebook user kung saan, malinaw sa nakasaad na job requirement na hindi umano tatanggapin ang mga mag-aapply na mayroong tattoo sa balat o katawan.

Ayon sa mga netizen, diskriminasyon ang nasabing kwalipikasyon sa mga taong may mga tattoo sa katawan para sa trabahong grillman at food handler.

Agad namang naglabas ng pahayag ang pamunuan ng naturang brand at humingi ng paumanhin sa publiko.

Iginiit din nito na hindi nila dini-discriminate ang sinuman at kung anuman ang kanilang mga personal na kagustuhan lalo na sa pagkakaroon ng mga tattoo sa katawan.

Sa kabila nito, tiniyak ng nasabing outlet na hindi na mauulit sa kanilang mga susunod na job openings, ang nangyaring pagkakamali sa kanilang job requirement.

Nanawagan din si Pangulong Bongbong Marcos ng patas na “international system” para sa lahat ng bansa upang matuldukan na ang krimen laban sa “Asian Hate” at Racism.

Sa kanyang talumpati sa 77^th session ng United Nations General Assembly sa New York City, USA, umaasa si Pangulong Marcos na gagana ang nasabing sistema sa mga pinaka-lantad na sektor ng lipunan.

Nasaksihan na rin anya ng mundo ang ambag ng mga migrante sa kampanya laban sa Covid-19 pandemic kaya’t dapat mabigyan ng patas na karapatan ang mga ito laban sa diskriminasyon.

“Dapat mag move on na tayo!”

Ito ang reaksyon nina Senators Jinggoy Estrada at Robin Padilla sa tanong kung dapat bang mag-apologize ang Pamilya Marcos sa nangyari noong Martial Law na ginugunita ang ika-50 anibersaryo ngayong araw.

Ayon kay Senator Estrada, ano ang dapat na ihingi ng tawad ng mga Marcos at makabubuting mag-move on na lang ang lahat, lalo’t nakakuha ng pinakamataas na boto sa nakalipas na eleksyon si Pangulong Bongbong Marcos.

Iginiit naman ni Padilla na kung may kasalanan man umano si dating Pangulong Ferdinand Marcos Sr., ay hindi naman ito kasalanan ng anak.

Kahit anya sa Relihiyong Islam at Katoliko ay hindi kasalanan ng lahat ang kasalanan ni Adan.

Para naman kay Senate Minority Leader Koko Pimentel, karapatan ng mga pamilya ng mga biktima ng batas militar ang paliwanag kung ano ang nangyari sa mga mahal nila sa buhay na napatay o nasaktan. —ulat mula kay Cely Ortega Bueno (Patrol 19)

Namemeligro umanong mauwi sa humanitarian crisis ang deportasyon ng mahigit 40K overstaying POGO workers sa bansa.

Inamin ito ni Justice secretary Jesus Crispin Remulla sa budget hearing sa Senado.

Ibinatay anya ang datos sa 216 Philippine Offshore Gaming Operators (POGO) na hindi na nag-renew ng lisensya kung saan aabot sa average na 200 chinese workers mayroon ang mga ito.

Ayon kay Remulla, hindi basta tatanggapin ng China ang mga POGO worker dahil mayroong protocol at kondisyon na dapat dumaan sa testing procedures ang mga pababalikin sa kanilang bansa kaya’t posibleng magkaroon ng humanitarian crisis.

Halimbawa na lamang nito ang nangyari sa Quezon City Police Station kung saan isang taong itinira sa isang bahay ang nasa 300 nahuling Chinese na natagalan ang deportasyon dahil may COVID-19 pandemic.

Mag-uusap anya sila ng Ambassador ng China upang maresolba ang naturang issue.

Tinanong naman ni Senate Minority Leader Koko Pimentel kung maaaring magkusang umuwi sa China ang mga illegal staying na sa halip na gobyerno ng Pilipinas ang mag-asikaso sa kanila.

Gayunman, aminado ang kalihim na takot ang mga Chinese dahil kapag umuwi sila at nakumpirma na naging POGO worker ay hindi na sila makabibiyahe muli palabas ng tsina bukod pa sa mga multa nilang babayaran. —ulat mula kay Cely Ortega Bueno (Patrol 19)

Nasa 500 traffic enforcer ang idedeploy ng MMDA para sa inaasahang pagbigat ng daloy ng trapiko sa isasagawang 55th Asian Development Bank annual meeting sa susunod na linggo.

Ipakakalat ang mga enforcer sa mga ADB-Dedicated Routes upang matiyak ang tuloy-tuloy na biyahe ng mga delegado mula airport hanggang hotel, venue at iba pang engagement area.

Ayon kay MMDA acting Chairman Carlo Dimayuga, katuwang ng MMDA road emergency group ang Office of the Civil Defense, Department of Health at Bureau of Fire Protection, na naka-standby upang magbigay ng emergency assistance.

Bukod dito, kokontrolin din anya ng traffic personnels mula sa PNP, Mandaluyong at Pasig Local Government Units, at security forces ng Ortigas Center ang daloy ng trapiko sa kahabaan ng ADB Routes.

Magsisimula ang ADB Annual Meeting sa September 26 hanggang 30 na inaasahang dadaluhan ng nasa 300 delegado sa Ortigas Center, Mandaluyong City.

Nilinaw naman ni Dimayuga na walang isasarang mga kalsada pero asahan na ang mabigat na daloy ng trapiko sa bahagi ng Ortigas at iba pang apektadong ruta, gaya sa EDSA mula Magallanes hanggang Ortigas, Julia Vargas, ADB Avenue, San Miguel Avenue, Guadix Drive, Bank Drive at Saint Francis Street.